1 SAMUEL 8 - Qullan Arunaka DC

II. REYINAKAN MARKA APNAQÄWI UTT'AYASITAPA(8—12)Israelitanakax reyinïñ munapxi

1Chuymaniptxasinsti Samuelux, jupan yuqanakaparuw Israel markan jilïrinakapat utt'ayäna.

2Jilïri yuqapasti Joel satänwa, sullkïristi Abías sataraki, jupanakasti Beerseba markan apnaqapxäna.

3Ukampis Samuelun yuqanakapax janiw awkipjam sarnaqapkänti, jan ukasti taqi kun muniriw tukxapxäna, qullqimpiw chilltayasipxäna, janirakiw kuns chiqapar uñjapkänti.

4Ukatsti Israel markan taqpach jilïrinakapaw tantacht'asipxäna, ukat Samuelumpi parliriw Ramá chiqar sarapxäna,

5juparusti sapxarakïnwa: “Jumax sinti chuymanïxtawa, yuqanakamasti janiw jumjam sarnaqapkiti; uka layku jumax mä rey utt'ayam nanakar apnaqañapataki, kunjämatix taqi markanakan utjki ukhama” sasa.

6Samuelutakisti ukham mä reyi markar apnaqañapatak mayipxatapax janiw walïkänti, ukat Tatitut mayisïna,

7Tatitusti juparux sänwa: “Kuntix markax mayktam ukarux jaysaskakim, ukampix janiw jumaruti jisk'achapktamxa, jan ukasti nayaruw jisk'achasipkitu, jupanakax janiw nayan apnaqatäñ munapkiti.

8Kuna urutix Egiptot apsunkta ukürut jichhakamax, kuntix nayar lurapkitu ukarak jumarux lurasipktamxa, nayarusti yaqha diosanakar yupaychañatakiw apanukupxitu.

9Ukhamasti kuntix mayipktam ukarux jaysaskakim; ukampisa nayraqatax qhan jupanakar yatiyam, kuntix uka reyix jupanakar lurkani taqi ukanaka” sasa.

10Samuelusti rey mayir markarux kuntix Tatitux siskatayna uka arunak yatiyäna,

11sarakïnwa:

—Jichhax kawkïr reyitix jumanakar apnaqapkätam ukampix akhamaw suyt'apxtam: Wawanakamar jawsthapisax nuwasiñ carronakaruw uchani, yaqhipanakarusti caballeriaruw uchani, mayninakarusti jupan uñjiripatakiw uchasini.

12Mayninakarusti waranqa, ukhamarak phisqa tunka soldadonakan jilïrïñapatakiw uchani. Yaqhipanakarusti yapunak yapuchiritaki, yapunakat apthapiritaki, nuwasiñ carronakan yänakap lurañatakiw ucharakini.

13Phuchhanakamsa jupar luqtiritakiw jawsayani, jupar q'apkir qullanakamp jawiñapataki, phayirïñapataki, t'ant'a lurañapataki.

14Jumanakan suma uraqinakamsa, suma uva yapunakamsa, olivo quqanakamsa katuntasiniwa, taqi ukanaksti jilïrinakaparuw churarakini.

15Waña juyranakata, uva achunakatsa sapa tunkat mayäki ukanak aparasax jach'a utapan apnaqirinakaparuw churarakini.

16Ukhamarakiw jumanakan uywatanakamsa, suma urqu vacanakamsa, asnonakamsa jupanakatak irnaqañapatakiw aparapxätam.

17Ukhamarus uywanakamatxa sapa tunkat mayäki uk katuntasipxani, jumanakas jupanakaruw luqtapxäta.

18Ukampis kunürutix uka jumanakan ajllit reyitak arusipkät ukkhaxa, Tatitux janiw jumanakarux ist'apkätamti —sasa.

19Markasti Samuelun arunakapar jan ist'asax sasipkakïnwa:

—Janiw ukax kunäkisa, nanakax mä reyinïñ munapxta,

20jupan nanakar apnaqañapataki, ukhamarak nanakamp chik nuwasir sarañapataki —sasa.

21Samuelusti markan arunakap ist'asinxa, Tatituruw yatiyäna.

22Tatitusti juparux sarakïnwa:

—Mayitanakapar ist'am, ukatsti mä rey jupanakatak utt'ayarakim —sasa.

Ukatsti Samuelux israelitanakar kawki markanakattix jutapkatayna ukaruw khithanukxäna.