EZEQUIEL 31 - Qullan Arunaka DC

Faraón reyix mä cedro quqampi sasiwa

1Tunka mayanïr marana, kimsïr phaxsina mä uru saraqatarusti, Tatitux nayar sarakituwa:

2“Egiptonkir faraón reyiparu, taqi jaqinakaparus sarakim:

“ ‘¿Kunampisa uñtasispa juman jach'ätamaxa?

3Libanonkir cedro quqar uñtatawa,

walja layminakan phuqhantata,

wali jach'araki, qinayanakkamaw puri.

4Jallumpi, uraqinkir umampiw

jumarux jiltayapxtam;

ayruntatäkäyäta uka chiqanxa

jawiranakaw uñstarakïna;

uka jawiranakan umanakapasti

uksa tuqinkir taqi quqanakaruw qarpäna.

5Walja umanïtap laykux,

taqi quqanakat sipan juk'ampi jach'aw jiltäyätaxa;

layminakamasti walipuniw jilantäna,

taqi tuqiruw jilatatarakïna.

6Markanakasti jumat yanap mayiriw jutapxäna;

jamach'inakar uñtataw layminakamarux

tapanakap tapachasipxäna,

ch'uminkir animalanakjamaw

quqa kayunakam ch'iwipar jutapxäna.

7Mä suma jach'a quqar uñtatapunïyätawa,

layminakamax wali jach'anaka,

saphinakamas uma jak'an saphintataraki.

8Tatitun yapupan janipuniw

kawkïr cedro quqas jumjamax utjkänti;

janipuniw kawkïr pinos layminakamjam layminakanïkänti,

janipuniw kawkïr castaño quqas jumjam laphinakanïkänti,

janipuniw kawkïr quqas Tatitun yapupanxa

jumjam sumax utjkänti.

9Nayaw jumarux ukham sum lursma,

walja layminakan kuna;

Tatitun Edén yapupankir yaqha quqanakasti,

jumjamäñarak munapxäna.

10“ ‘Israel markan Diosapax nayätwa, ukatsti may yatiñam munta: Jumax mä jach'a quqar uñtataw tuktaxa, alayankir layminakamas alaxpachkamaw purïna; ukatpï jach'a jach'a kankañampix phuqhantastaxa.

11Ukatpï nayax jumarux apanukuraksmaxa. Jichhax mä yaqha markankir reyipan amparaparuw katuyäma, jupasti ñanqha luratanakamat katuqañamax wakiski ukhamarjamaw mutuyätam.

12Uka yaqha markanakankir qhuru jaqinakax pampar liwinukusin apanukuwayapxätam; layminakamasti p'akirtasax qhirwanak tuqiru, qullunak tuqiru, jawiranak tuqiruw williranttani, kawkïr markanakatix quqa kayuman ch'iwicht'asiri jutapkän ukanakasti apanukuwayapxätamwa.

13Ukham liwinukut uñjasxät ukkhasti, jamach'inakaw tapanakap tapachasirix jutapxani, ukatsti kunayman monte animalanakarakiw uka layminakam taksupxani.

14Akat qhiparusti, janipuniw kuna quqas ukham wali jach'ax jilkxaniti, qawqhas uma jak'ankaskpan, wali suma qarpatäskpasa, janipuniw alay laymipax qinayanakkam makhatkxaniti, wali alayarus jilkxarakiniti. Taqpachaw jiwarani, manqhapachar jaquntatäpxaniwa, kawkhankkitix jupanakat nayra jiwirinakax ukkharu.

15“ ‘Naya, Tatituw akham arsta: Uka quqax jiwañ manqha pachar jaquntatäni ukkhasti, llakisiñatsa jach'a qutar wañt'ayäwa; jawiranaksa, jalir umanaksa wañt'ayarakïwa; jupa laykuw Líbano qullux llakt'at uñjasini, pampankir taqi quqanakas wañsuwayxarakini.

16Uka urux purinkani ukkhasti, jiwañ manqha pachar liwiranttatamax taqi markanakaruw khathatiyani. Uka manqha pachansti, Edenankir quqanaka, Líbano qullunkir wali suma umampi qarpata quqanakax chuymachataw jikxatasipxani.

17Khitinakampitix sumar mantkäyäta, yanapamsa thaqhapkän ukanakasti, nuwasïwin jiwarapxani, ukatsti jumampi chikaw uka manqha pacharux mantapxani.

18Edenankir quqanakatsti janipuniw maynis jumampi uñtasirix utjkänti. Janipuniw maynis jumjam jach'a, wali sumasa utjkänti. Ukampisa, Edenankir yaqha quqanakamp chikaw uka manqha pachar jaquranttäta, ukan Tatitur jan uñt'irinakampi, nuwasïwin jiwirinakampi chikax jakarakïta.

“ ‘Uka quqasti faraón reyimpi, taqi jaqinakapampiruw uñtasi. Naya, Tatituw uk arsta.’ ”