ESDRAS 8 - Qullan Arunaka DC

Kutt'anirinakan sutinakapa

1Artajerjes reyin marka apnaqäwipan Babilonia markat Esdrasamp chik kutt'anipkäna uka wila masinakan jilïrinakapan sutinakapax akanakawa:

2-3Finees wila masit saraqir Guersón;

Itamar wila masit saraqir Daniel;

David wila masit saraqir Hatús;

Parós wila masit saraqir Zacarías, jupamp chikasti patak phisqa tunka chachanakan sutinakapaw qillqatäna.

4Pahat-moab wila masit saraqir Eliehoenai, jupamp chikasti pä patak chachanaka;

5Zatú wila masit saraqir Secanías, jupamp chikasti kimsa patak chachanaka;

6Adín wila masit saraqir Ébed, jupamp chikasti phisqa tunkan chachanaka;

7Elam wila masit saraqir Isaías, jupamp chikasti paqallq tunkan chachanaka;

8Sefatías wila masit saraqir Zebadías, jupamp chikasti kimsaqallq tunkan chachanaka;

9Joab wila masit saraqir Abdías, jupamp chikasti pä pataka tunka kimsaqallqun chachanaka;

10Baní wila masit saraqir Selomit, jupamp chikasti pataka suxta tunkan chachanaka;

11Bebai wila masit saraqir Zacarías, jupamp chikasti pä tunk kimsaqallqun chachanaka;

12Azgad wila masit saraqir Johanán, jupamp chikasti patak tunkan chachanaka;

13Adonicam wila masit saraqir Elifélet, Jeiel, Semaías, jupanakamp chikasti suxta tunka chachanakaw qhipar purinipxäna.

14Bigvai wila masit saraqir Utai, Zabud, jupanakamp chikasti paqallq tunka chachanakaw purinipxäna.

Diosan utapan yanapasirinaka

15Naya Esdrasax Ahavá jawirar jikxatki uka jawir lakxan taqi jupanakar tantachthapta, ukawjan kimsa uruw utjnuqtapxarakta. Ukatsti, jaqinakampiru, sacerdotenakampir sutipatkam jawskäyäta ukkhasti, ukanak taypin janiw mayni levitarus jikxatkti.

16Ukatwa Eliézer, Ariel, Semaías, Elnatán, Jarib, Elnatán, Natán, Zacarías, Mesulam uka aytat jilïrinakar khitta, ukhamarak Joiarib, Elnatán yatichirinakaru,

17Casifiá sat chiqan Idó sat jilïripar tumpanipxañapataki; ukatsti jupampiru, masinakapampiru mayipxañapataki, Tatitusan utapan yanapasir jaqinak khithanipxañapataki.

18Tatitusti yuspagaratäpan, Serebías wali q'apha chacharuw irpanipxäna, wawanakapampiru, jilanakapampir kuna; jupax Mahli sat mä Levitat saraqirïnwa, taqpachanix tunka kimsaqallqunïnwa.

19Ukxarusti, Merarí wila masit saraqir Hasabiasaru, Isaiasaru, yuqanakapampiru, jilanakapampiruw khithanipxarakitu, taqpachanix pä tunkanïnwa.

20Ukhamarus jupanakxarux pä patak pä tunkan jaqinaka, Tatitun utapan yanapasirinak khithanipxitu, jupanakan nayra awkinakapax Davidan utt'ayatänwa, sacerdotenakan yanapirinakapar yanapt'añataki. Ukatsti, sapa maynin sutinakapaw qillqantasïna.

21Uka qhipatsti, Ahavá sat jawir jak'an tantacht'asipxta, ukawjansti, mä ayuno lurañatakiw arsurakta, ukhamat Tatitun nayraqatapan alt'at chuymamp juchanakax uñt'asiñataki, ukhamarak nanakar sumaki irpañapataki, wila masinakaxarusa, nanakan yänakaxarus Jerusalenar puriñkam imañapataki.

22Nayax p'inqasiyätwa reyit caballería soldadonak mayiña, nanakar thakhin uñisirinakat imañapataki, nanakax reyirux sapxayätwa: “Diosax imiwa taqi khitinakatix jupar thaqhapki ukanakaruxa, ukampis jupar apanukupki ukanakarux jach'a phiñasiñapampiw mutuyi” sasa.

23Ukhamasti ayuno lurapxta, taqi ukanakat nanakar imañapatakiw Tatitur achikt'asipxta, jupasti ist'apxituwa.

24Ukxarusti aytat jilïr sacerdotenakat tunka payaniruw yaqhachta: Serebías, Hasabías ukanakaru, jupanakan tunka masinakapampiru.

25Ukatsti qullqimpi, qurimpxa, tupt'asaw churta, ukhamaraki kawkïr yänaktix reyisa, amuyt'ayirinakapasa, ukan jikxatasir taqi israelitanakas Tatitun utapatak churapkitäna ukanaksa. Taqi ukanak sacerdotenakaruw katuyxayäta,

26ukanakasti akanakawa: Pä tunk mayan waranqa pusi patak phisqa tunkan kilo qullqi, qullqit lurat patak yänaka, ukhamarak kimsa waranqa kimsa patakan kilo quri;

27ukxarusti kimsaqallqu kiloni qurit lurat pä tunka qirunaka, ukhamarak broncet suma lurat pä yänaka, uka yänakasti qurïkaspas ukham wali jila alanïnwa.

28Ukatsti, jupanakarux sistwa: “Jumanakax Tatitur luqtatäpxtawa, uka yänakas Tatitur luqtatarakiwa. Qullqimpi, qurimpix nayra awkinakasan Diosapatakiwa.

29Sum uñjapxam, Jerusalenan Tatitun utapar puriyañkama, ukan sacerdotenak nayraqatana, yanapirinakap nayraqatana, Israelan wila masinakap nayraqatan tupt'atäñapataki” sasa.

30Ukatsti sacerdotenakaxa, yanapirinakapasa uka qullqi, quri, ukhamarak yänak tupt'apkäna ukanak katuqapxäna, ukatsti Jerusalenankir Diosan utaparuw apxapxäna.

31Abib sat qallta phaxsina, tunka payan uru saraqataruw Ahavá jawirat Jerusalén marka tuqir sartanxapxta. Tatitusaw thakhin uñisirinakata, lunthatanakatsa imapxitu.

32Jerusalén markar purisax kimsa uruw samarapxta.

33Pusïri urunsti Tatitusan utaparuw sarapxta, ukan qullqimpi, qurimpi, yänakampi tupt'apxta, ukatsti Uriasan yuqapa Meremot sacerdoteruw taqpach katuyxapxta. Ukankapxarakïnwa Finees chachan Eleazar yuqapa, Leví wila masit saraqir Josué chachan Jozabad yuqapa, ukhamarak Binuy chachan Noadías yuqapasa.

34Uka pachpa uruw uka yänakax taqpach tupt'atäxäna, jakhutäxäna, ukatsti qillqantatäxarakïnwa.

35Uka qhipatsti, Babilonia markat kuttanipkatayna ukanakaxa, tunka payan vaca qallunaka, llätunk tunka suxtan khariñ ovejanaka, paqallq tunka paqallqun mä maran ovejanaka, tunka payan chivonaka apanipxäna, israelitanakan sutipxaru nakt'at luqtäwinaka Israelan Tatitupar luqtatäñapataki. Tatitur jach'añchasaw uka uywanak nakt'ayapxäna.

36Ukatsti, reyin arsüwip qillqat katuyapxarakïna, Éufrates jawirat inti jalanta tuqinkir suyun jilïr apnaqirinakaparu, jupanakasti: “Walikiwa” sasaw markarusa, Tatitun utaparus yanapapxäna.