1Jerusalenankir jaqinakax, Joram lantix Ocozías sullka yuqaparuw reyit utt'ayapxäna, mä tama ñanqha jaqinakampi árabe jaqinakampiw campamentor mantasin Judá markankir Joram reyin jilïr yuqanakaparux jiwarayatayna. Ukhamat Judá markankir Joram reyin Ocozías sullka yuqapax marka apnaqañ qalltäna.
2Kunapachatix jupax pä tunka payan maranïkän ukkhaw marka apnaqañ qalltäna, ukatsti Jerusalén markanxa mä maraw marka apnaqäna. Taykapax Atalía satänwa, jupax Omrí chachan allchhipänwa.
3-4Ocozías reyisti Ahab reyin wila masinakapan sarnaqäwipa arkarakïna, taykapaw juparux jan wali amuyunak churäna, Ahab chachan wila masipampi sumankatap laykusti, jupan luräwinakapax Tatit nayraqatan janiw askïkänti. Awkipan jiwatap qhipatsti jupax uka jaqinakan amtatap luräna, ukhamat aynacht'añar puriwayäna.
5Jupanakan iwxa arunakapar arkatap laykusti, Ocoziasax Israelankir Ahab chachan Joram yuqapampiw mayacht'asïna, Siriankir Hazael reyimpi Galaad uraqinkir Ramot chiqan nuwasiñataki. Ukampis sirio jaqinakaw Joram reyirux usuchjapxäna,
6ukat jupax Jezreel chiqar kutt'äna, Ramot chiqan siriankir Hazael reyimpi nuwasisin usuchjapkatayna ukanakat qullasiñataki. Ocozías reyisti, Joram chachan usutätap laykux Jezreel chiqaruw jupar uñjt'aniñatak saräna.
Jehú chachan Ocozías reyir jiwayatapa(2 R 9.27-29)7Diosaw wakichäna Ocozías reyin Joram reyin ukar uñjt'ir sarkasin jiwañapataki. Ocoziasan puritapatsti, Joram reyimpiw mistüna Nimsí chachan Jehú yuqapampi jikisiñataki. Diosaw Jehú chachar ajllisitayna Ahab reyin wila masipar jiwarayañataki.
8Kunapachatix Jehú chachax Ahab reyin wila masinakapar taripaskän ukkhaxa, Judá markankir jilïrinakaparu, Ocozías reyin wila masinakaparuw jikxatäna, jupanakasti Ocoziasan luqtirinakapänwa, ukat jupanakar jiwarayäna.
9Ukatsti Ocozías reyiruw thaqtayarakïna, jupax Samaria markan imantasitayna, jupar katuntasinxa Jehú chachan ukaruw irpapxäna, ukat jiwayapxäna. Ukampis juparux imt'xapxänwa, sapxarakïnwa: “Jupax Josafat chachan yuqapawa, Josafatax taqi chuymaw Tatitur thaqhirïna” sasa. Uka qhipatsti, Ocozías reyin wila masip taypit janiw khitis Judá marka apnaqirix utjkxänti.
Atalía warmin marka apnaqañ aparatapa(2 R 11.1-21)10Ocozías reyin Atalía taykapax yuqapan jiwxatap yatisinxa, jupasti Judá uraqinkir reyit saraqir wila masinakarux q'al jiwarayäna.
11Ukampis Joram reyin Joseba phuchhapax, Ocozías reyin Joás yuqaparuw wayuqasïna, reyin maynïr yuqanakapar jiwarayasipkäna ukapacha, ukatsti jupax Joasampiru, jupar uñjir warmimpirux mä ikiña utaruw imantäna. Ukhamat Joasax jan jiwkänti. Aksti Joram reyin Joseba phuchhapaw ukham luräna, jupax Ocozías reyin kullakapänwa, Joiadá sacerdoten warmiparakïnwa.
12Joasasti Tatitun utapan jupamp chika imantatäskänwa. Ukchañkamax Atalía warmiw marka apnaqäna.
Who We AreWhat We EelieveWhat We Do
2025 by iamachristian.org,Inc All rights reserved.
