1 1 (2) Israelan Diosapa,
jumax chiqapar uñjir Diosätawa;
janikiy p'inqachjat uñjasiyistati.
¡Qhispiyasikitaya, jumaruw katuyasinsma!
2 2 (3) Ist'akitaya,
¡jank'akiy nayar qhispiyir jutita!
Nayan imantasiñ qarqaxaruy tukum,
¡qhispiyasiñ utaxaruy tukurakim!
3 3 (4) Jumaw arxatir qarqaxätaxa,
imantasiñ utaxätasa.
Sutim laykuy irpita, imarakita.
4 4 (5) ¡Sipit uchatanakat wayst'ita,
jumakïtaw nayan arxatirixaxa!
5 5 (6) Amparamaruw ajayux katuyassma;
¡Tatay, chiqpach Diosay, qhispiyasikitaya!
6 6 (7) Yaqha diosanakar yupaychirirux uñisipuntwa.
Nayasti Tatituruw taqi chuymamp katuyasta.
7 7 (8) Munasiñamaw kusisiñ churitu.
Jumaw llakinakax amuyista,
jakañaxan chijinakapsa uñjarakta;
8 8 (9) uñisirinakaxat qhispiyista;
¡suma thakhiruw kayunakax takt'ayista!
9 9 (10) Tatay, nayat khuyapt'ayasita,
jan walt'añar jalantirjamätwa.
Nayranakaxax llakimp ch'amakt'atawa,
taqpach janchixasa, chuymaxas tukusiskiwa.
10 10 (11) ¡Jakañaxax llakimpiw aynacht'aski,
sarnaqañ urunakaxax ayquñampiw tukusiski!
Llakisiñaw ch'amaxarux tukuntaski;
¡janchixas jan ch'amaniw jikxatasi!
11 11 (12) Uñisirinakaxatakix larusiñakïxtwa,
uta jak'a masixatakis sawkasiñakïxtwa,
nayar uñt'irinakatakis axsarkañätwa.
¡Nayar uñjasax kawkhansa jaltxapxakiwa!
12 12 (13) Jiwatarjamaw armanukxapxitu,
t'unjat qirur uñtatakïxtwa.
13 13 (14) Jaqinakan nayxat parlasitanakap ist'ta:
“Taqi chiqas axsarañan phuqhantatawa.”
Mayar tukt'asakiw nayar aynacht'ayañatakix amtapxi;
¡nayar jiwayañatakiw amtapxaraki!
14 14 (15) Nayasti, Tatay, jumaruw katuyassma;
“¡jumaw nayan Diosaxäta!” saraksmawa.
15 15 (16) Jakañaxax amparamankiwa;
¡nayar arknaqir uñisirinakaxat qhispiyita!
16 16 (17) Uywatamarux khuyapayasiñampiy uñtanim,
munasiñam laykuy qhispiyita.
17 17 (18) Tatay, jumaruw art'asinsma,
¡janikiy p'inqa tukuñar nukt'istati!
¡Ñanqha lurir jaqinakar p'inqa tukuyam;
jupanakarux manqhapachar jaquntam!
18 18 (19) K'arisir jaqinakax amukt'apxpan,
jisk'achjasiñampiw aski jaqinakxat parlas
chuymanakap ust'ayapxi.
19 19 (20) ¡Tatay, kunja jach'as munasiñamax
jumar waqaychirinakatakixa!
Mä qurïkaspas ukham imtaxa,
jumar katuyasirinakarusti,
taqin uñjkañaw munasiñam lakirpaytaxa.
20 20 (21) Jupanakampïtamat ñanqha luririnakan
jan wali amtäwinakapat qhispiytaxa;
uñisirinakapampi jan tuqiyañatakisti
jupanakarux utamaruw imanttaxa.
21 21 (22) Tatitux jach'añchatäpan,
jupax llakisiñ urunakaxan,
munasiñapampiw muspharkañanak lurarapitu.
22 22 (23) Llakimp atipjatax säyätwa:
“Tatitux nayraqatapat jaqunukxituwa” sasa;
jumar arnaqasinsma ukapachasti,
art'asitaxarux ist'istawa.
23 23 (24) Tatitur iyawsirinaka,
jupar munasipxam.
Tatitux aski arkirinakaparux imiwa,
jach'a jach'a tukurinakarusti
lurataparjamaruw juchañchi.
24 24 (25) Tatitur suyt'irinaka,
ch'amañchasipxam, jan axsarapxamti.
Who We AreWhat We EelieveWhat We Do
2025 by iamachristian.org,Inc All rights reserved.
