PROVERBIOS 8 - Qullan Arunaka DC

Yatiñ kankañan arunakapa

1Yatiñ kankañax jach'at arnaqasiski,

ch'ikhi kankañasti arup ist'asiyaraki.

2Qullu amsta chiqanakaruw sayt'asi,

thakhi pallqanakaruw sayt'asi,

3markar mantañ punkunakan

arunakap ist'ayaski, akham sasa:

4“Chachanaka, aka arunakaxax

jumanakatakiwa.

5Jan yatiñ kankañan waynanaka, ch'ikhi kankañanïñ yatiqapxam,

pisi chuymanaka, amuyt'asirïñ yatiqapxam.

6Ist'apxita, nayax yatiyapxämawa

suma chiqa arunaka.

7Kuntix sapkäma ukax chiqawa,

janiw nayatakix k'ari arunak parlañax askïkiti.

8Taqpach arsutanakaxax chiqapawa,

janiw uka arunakaxanxa k'arisiñax utjkiti.

9Ch'ikhi jaqitaki, amuyt'asir jaqitakixa,

arunakaxax qhana jan kamskayawa.

10Qullqit sipana, suma qurit sipansa,

yatichäwinakampi, yatiñ kankañamp jikxatapxam” sasa.

11Yatiñ kankañax suma k'ajkir qalanakat sipana,

juk'amp jila alaniwa;

¡janiw kunatix wali munkayäki ukampis kikipaskaspati!

12“Naya, yatiñ kankañax, ch'ikhi kankañamp chikaw jakta,

suma iwxa arunak jikxatañ yatta.

13Tatitur axsartañaxa, jan walir uñisiñawa.

Nayax, jach'a jach'a tukuñarusa,

jan walin sarnaqañarusa, k'arisiñarus uñistwa.

14Nayankiw amtäwisa, amtäwin phuqhasiñapasa,

nayätwa chiqap kankañaxa, ch'aman kankañasa.

15Nayïpan reyinakas markar apnaqapxi,

marka apnaqirinakas chiqap kamachinak utt'ayapxi.

16Nayïpan markan jilïr sarayirinakapax munañanïpxi,

marka apnaqirinakas chiqapar uñjapxaraki.

17Nayar munasirinakarux munastwa,

nayar thaqhirinakasti, jikxatapxituwa.

18Nayaw qamir kankañampi, aytat kankañamp churta,

jan tukuskir jach'a kankañampi, nayrar sartañamp churarakta.

19Nayan churañaxax suma q'umachat qurit sipana,

suma qullqit sipan juk'amp jilawa.

20Nayax chiqap thakhinjam sarta,

chiqa kankañ thakhinjama.

21Nayar munirinakarux qamiriptaytwa,

utanakaparus suma imasitanakampiw phuqhantarapta.

22“Tatituw nayarux luräwinakap nayra irnuqitu,

taqi kun lurañ janïr qalltkän ukapacha.

23Nayarux qalltan luritu,

aka uraqi janïra lurkän ukapacha.

24Nayarux jach'a qutanakax janïra utjkän ukkhatpach uskusitu,

jawiranakasa, uma jalsunakas janïra utjkän ukapacha.

25Jisk'a qullunakasa, jach'a qullunakasa janïra utjkän ukkhawa

Tatitux nayar utjayasitu;

26janïraw ukkhaxa Tatitux aka uraqsa, pampanaksa lurkänti,

kuna laq'attix aka uraqix luratäki uka laq'sa lurkänti.

27Kunapachatix Tatitux alaxpacha jach'a quta patxar utt'aykän ukkhaxa,

nayax ukankäyätwa.

28Kunapachatix qinayanak alaxpachan utjaykän ukapachax ukankäyätwa,

quta manqhankiri uma jalsunaksa utjaykäna ukapachasa ukankäyätwa,

29kunapachatix qutan umanakaparusa waña uraqiru jan makhatañapataki arskän ukkhasa,

aka uraqi utt'aykän ukkhasa,

30nayax Tatitump chikaw jan saraqtas ukankäyäta.

Nayaw jupan sapür kusisiñapäyäta,

jupan nayraqatapansti taqi urunakan k'uchirt'asïyäta;

31jupan lurat uraqin anatasïyäta,

¡nayax jaqinak uñjasin kusisiyätwa!

32“Jichhasti, wawanakaxay, ist'apxita;

nayat yatiqasipxita, jumanakasti kusisitaw sarnaqapxäta.

33Yatichäwinakar ist'apxam,

yatiñ kankañar jan jisk'achapxamti.

34Nayar ist'ir jaqix kusisiñaniwa,

uta punkuxan sapürus suyxatir jaqisa kusisiñaniwa.

35Nayar jikxatirixa, jakañ jikxatani,

Tatitun khuyapayasiñap jikxatarakini;

36ukampis nayar apanukurixa,

jakañap aynacht'añaruw apaski;

¡nayar uñisiñax jiwar munasiñawa!”