DEUTERONOMIO 21 - Qullan Arunaka DC

Jiwatanakxat jan sum qhanstatapa

1Moisesasti saskakïnwa: “Tatit Diosamax churkätam uka uraqintix mä jiwayat jaqir uñjapxäta, janirak khitin jiwayatapas yatiskani

2ukapachasti, jilïr jaqinakampi, taripirinakampiw uk uñjani, ukat kawkhantix jiwat jaqix jaquski uka chiqata, kawkïr markanakatix jak'ankki ukakam tupt'apxani.

3Ukatsti uka jak'ankir markan jilïri jaqinakapax mä vaca qallu katupxani, yukump janïr ayxatat vaca qallu.

4Ukatsti uka vaca qallxa mä qhirwaruw apapxani, kawkhantix kuna yapus jan luratäki, kunas jan satatäki, uma jalaskir jawiras jan wañskaraki ukaru, ukan uka vaca qallun kunkap q'iwinukupxani.

5“Ukapachasti levita sacerdotenakaw ukar jak'achasipxani, Tatitux jupanakaruw ajllisi jupar luqtiritaki, yupaychiritaki, Diosan sutipar markar aski waxt'äwinak churiritaki. Taqi ch'axwañanakansa, tuqisiñanakansa jupanakan arsutanakaparjam t'aqañataki.

6Ukatsti markan jilïr jaqinakapax uka jiwat vaca qallxan amparanakap jariqasipxani,

7aka arunak arsupxarakini: ‘Diosaxay, janiw nanakax aka jaqir jiwayapkti, janirakiw kunjämat jiwatapsa uñjapkti.

8Dios Tatay, juman qhispiyat Israel markamarux pampachakimaya, aka jan juchan jaqin jiwatapat janirak juchañchamti’ sasa. Ukhamat uka jaqin jiwatapat jan juchañchat uñjasipkätati,

9jumanakasti kunatix chiqäki ukanak Diosan nayraqatapan lurapxäta, jumanak taypitsa uka jan juchani jaqin jiwatapat juchañchäwi apaqapxäta.

Nuwasïwin katuntat jaqinakxat kamachinaka

10“Kunapachatix uñisirinakamamp nuwasir sarapxäta, ukatsti Diosamax uñisirinakamar atipjasin amparamar katuyapxätam,

11ukatsti, jumanakat khitis uka jaqinak taypin mä suma warmir uñjani, ukat jupan warmipäñapatak munarakin ukapachasti, akham lurani:

12jupax utaparuw irpasini, ukansti uka warmix ñik'utanakap mururasini, ampar sillunakap khuchhurasirakini.

13Ukxarusti uchatäkän uka isip apsusisin machaq isimpiw uchasini, ukatsti uka utan jakiriw qhiparxarakini. Awkiparu, taykapar jaytjanitapatsti, mä phaxsiw jachani; ukanak qhipatsti, israelit jaqix uka warmimpiw jaqichasxani; ukatsti chacha warmïxapxaniwa.

14Ukattix israelit jaqix uka warmir jan munkxani ukkhasti, khithanukxaniwa; ukampis janiw qullqir aljkaspati, janiw t'aqhisiyat uywatarjamas uñjkarakispati, jupan warmisitap layku.

Jilïr wawan katuqañapxata

15“Mä jaqitix pä warminïni, mayni warmiparusti wal munasini, maynirusti janirak munaskaniti, ukatsti panpach warmirak jupatakix wawanïni, ukatsti tayna wawax jan munat warmïkis ukankarakini,

16ukatsti uka jaqin yänakap wawanakapar jaljañ urux purinkani ukkhaxa, janiw munat warmin wawapäkis ukarux tayna wawäkaspa ukham uñjkaspati, ukham lurasasti jan munat warmin wawaparux jan wal luraspa, chiqpachan tayna wawapäki uka wawaru.

17Uka uñisita warmin wawaparuw tayna yuqall wawapat uñt'asiñapa, ukatsti taqi yänakapat mä ukkhamp churañapa; uka wawaw nayrïr wawapaxa, juparurakiw tayna wawa kankañax wakt'i.

Qallasir wawanakatak mutuyäwi

18“Jumanakat khititix jan ist'asiri, qallasir wawanïchi, uka wawasti janirak awkiparusa, taykaparus jaysirïkchi, qawqha jawq'katas janipun ist'asirïkchi ukapachasti,

19awkipampi, taykapampix marka mantañankir jilïrinakan ukaruw wawapar irpapxani.

20Ukat jupanakar sapxani: ‘Aka wawaxax jan ist'asiri, qallasiriwa; janiw kun satas yäqapkituti, munañap sarnaqiriwa, ukhamarus machirirakiwa’ sasa.

21Ukatsti markankir taqpach jaqinakaw qalamp k'upjasin uka qallasir wawar jiwayapxani. Ukhamat jumanakax markaman uka ñanqha luririnak tukjapxäta, uk yatisinsti israelit jaqinakax wal axsarapxani.

Kunayman kamachinakxata

22Moisesasti sarakïnwa: “Khiti jaqitix mä quqar warkkatat jiwayatäkani mä jach'a jucha luratap layku,

23uka jaqin janchipax janiw uka arumax uka quqan warkusiñapäkiti, jan ukasti ukürpachaw imt'xapxäta; quqar warkkatat jiwir jaqix Diosan ñanqhachatawa, Tatit Diosamax jumanakar churapkätam uka uraqxa, janiw jumanakax ñanqhachapxañamäkiti.