GÉNESIS 47 - Qullan Arunaka DC

1Ukatsti Joseax faraonar yatiyiriw saräna. Awkipampi, jilanakapampin Canaán uraqit purinitapa, ukhamarak niya Gosen chiqankapxatapa, ovejanakapampi, vacanakapampi, taqi kunanakapatix utjki ukanakampi.

2Joseasti jilanakapat phisqanir ajlliwayasaw faraonan ukar uñt'ayir irpäna.

3Ukatsti faraonax Josean jilanakaparux akham jiskt'äna:

—¿Kun lurañsa yatipxta? —sasa.

Jupanakasti ukxaruw sapxäna:

—Nanaka, juman luqtirinakamax nayra awkinakaxatpachsa oveja awatirïpxtwa.

4Jichhasti nanakax aka markan jakasiriw jutxapxta, Canaán uraqin mach'ax sintipuniwa, janiw kuna ch'uxña alis uywanakaxatakix utjkarakiti. Tata, Gosen chiqan nanakan jakasipxañax munakimaya —sasa.

5Ukat faraonax Josear säna:

—Niyakixay awkimampi, jilanakamampix jumampi akankañatak jutxapxchixa,

6Egipto uraqix jumar katuyatawa, Gosen uraqi jupanakar churam, ukan jupanakax jakasipxañapataki, ukasti taqi aka markpachanxa wali suma uraqiwa. Jupanak taypintix ch'ikhi jaqinak utjatap yatsta ukasti, uywanakax uñjirit usküta —sasa.

7Ukxarusti Joseax awkiparuw faraonan ukar uñt'ayir irpäna. Jacobusti wali yäqañ arunakampiw faraonarux aruntäna.

8Faraonasti jiskt'arakïnwa:

—¿Qawqha maranïxtasa? —sasa.

9Jacobusti sarakïnwa:

—Patak kimsa tunkan maranïxtwa, uksa aksa sarnaqarakta, uka juk'a maranakansti jakañax nayatak ch'amänwa, janïraw qawqha maranakatix nayra awkinakaxax jakapkäna ukar purkti —sasa.

10Ukatsti Jacobux wali yäqañ arunak arsusaw faraonan ukat mistuwayxäna.

11Joseasti faraonan arsutaparjamaw phuqhäna, ukatsti awkipampiru, jilanakapampirux wali suma uraqinak Egipto uraqinkirit churäna. Jupanakasti Gosen chiqan utjnuqtapxäna, uka chiqasti jaya qhipatxa Ramsés sutimpi uñt'atäxänwa.

12Ukhamarus Joseax wila masinakaparux sapa utankirinakan wakisitaparjamaw manq'añ churarakïna.

Josean apnaqäwipa

13Janipuniw kawkhansa manq'añax utjkxänti, mach'asti sintipunïxänwa. Egiptonsa, Canaán uraqinsa, jaqinakax manq'atjam jiwarapxäna.

14Joseasti egipcionakaru, cananeonakaru trigo aljat qullqxa, faraonan jach'a utaparuw imxäna.

15Kunapachatix qullqix Egiptonsa, Canaán uraqinsa jan utjkxän ukkhasti, egipcionakax Josear jikxatiriw sarapxäna, akham sapxarakïna:

—Janiw qullqinïkxapkti. Jumay manq'añ churapxita, jan ukasti jank'akiw jiwxapxä —sasa.

16Joseasti ukxaruw säna:

—Qullqinakamatix pist'xchi ukaxa, uywanakam apanipxam, uka lantsti trigo churapxäma —sasa.

17Egipcionakasti Josean ukarux caballonakapa, ovejanakapa, vacanakapa, asnonakap anakipxäna, Joseasti marpachaw uka uywanakatxa trigo churarakïna.

18Uka mara qhipatsti wasitat Josean ukar sarxapxarakïna, akham sasa:

—Tata, janiw jumarux k'arintapkirismati, janiw qullqix utjkxapxituti sasaxa, ukhamarus uywanakaxas jumankxarakiwa. Janiw kunas churañatakix utjkxapxituti, inas jumar uraqinakaxampi, nanak pachpampi churxapxirisma.

19Jumay jichhax trigo lanti uraqinakaxsa, nanaksa alasxapxita. Nanakasti faraonan t'aqhisiyat luqtiripäpxäwa, jupatakirakiw uraqinakaxsa yapuchapxä, jumax jathaki yapuchañatak churapxita, nanakan jakañanakaxataki, uraqinakaxan jan inamayakïñapataki ¿Kunatarak jumasti nanakar uraqinakaxamp chika jiwaraskir uñjapxitätasti? —sasa.

20Ukhamasti Joseax Egiptonkir taqi uraqinak faraonatak aläna, egipcionakax manq'a laykuw uraqinakap aljarasxapxäna. Ukhamaw uka markan taqi uraqinakax faraonankamakïxäna,

21ukatsti taqiniw Egipto uraqinxa, faraonan t'aqhisiyat luqtiripäpxäna.

22Ukampisa, Joseax janiw sacerdotenakan uraqinakap alkänti, uka sacerdotenakasti janiw uraqinakap aljarasipkänti, faraonaw jupanakarux manq'añ churäna.

23Ukxarusti Joseax egipcionakar sarakïnwa:

—Jichhax uraqinakam yapuchañatakix akax jathaxa; ukampis amtasipxapunim, jumanakasa, uraqinakamasa faraonankatapa, nayax jupatakiw alta,

24ukampis faraonarux yapu achunakamat chikatan chikatap churapxäta; ukxarüki uka chikatanakasti jathatakïniwa, ukatsti jumanakana, wawanakamana, khitinakatix jumanakampïki ukanakan manq'añapatakïniwa —sasa.

25Jupanakasti ukxaruw sapxarakïna:

—Tata, jumax nanakatakix wali suma jaqïtawa, jakañanakaxatsa khuyapt'ayasiraktawa. ¡Jichhasti taqi chuymaw faraonan luqtiripäpxä! —sasa.

26Joseax ukham mä kamachi utt'ayäna taqi Egipto markan achunak apthapitanakat chikatan chikatap faraonar churañataki; uka kamachisti jichhakamaw utjaski, sacerdotenakan uraqinakapakiw jan faraonankkänti.

Jacobun qhipa arunakapa

27Ukatsti israelitanakax Egipto uraqin utjnuqtapxäna, Gosen uksa chiqana, ukansti uraqinak alasipxäna, sum jakapxarakïna, jupanakasti waljanipuniw mirantxapxäna.

28Jacobux tunka kimsaqallqun maraw Egipton jakäna, jupasti pataka pusi tunk paqallqun marankamaw jakawayäna.

29Mä urusti Jacobux jiwirjamäxänwa, ukat José yuqapar jawsayasin jupar säna:

—Chiqpachapuni munaschista ukaxa, amparam lankhu charax manqhar ucham, ukatsti kuntix maykäma uk phuqhañatak juramento lurarapita. ¡Janipuniw Egipto uraqir imayitätati!

30Nayax jiwxä ukkhasti, nayan amayax Egiptot apsxätawa, ukatsti nayra awkinakaxax imt'atäpki ukkharuw imt'ayxitäta —sasa.

Joseasti sarakïnwa:

—Walikiwa, ukham lurä —sasa.

31Ukampis awkipax saskakïnwa:

—¡Juramento lurarapita! —sasa.

Joseasti juramento lurarapïna, ukatsti Jacob awkipax ch'ijmapxaruw alt'awayäna.