CANTARES 7 - Qullan Arunaka DC

Chacha

1 1 (2) ¡Reyin phuchhapa, kayunakamax

wiskhumpi uchatax wali jiwakiwa!

Thixniman muytapas,

suma qurit lurat k'achachañanakar uñtatawa

amparampi lurañ yatirin lurt'atjama.

2 2 (3) Kururumasti muruq'u qirur uñtatawa,

suma vinox janiw ukan pist'kiti;

purakamax trigo phinar uñtatawa,

rosa panqaranakamp muyukipata.

3 3 (4) Ñuñunakamax taruja ispa qallunakar uñtatawa.

4 4 (5) Kunkamax marfilat lurat torrer uñtatawa;

nayranakamax Hesbón markankir uma jalsur uñtataw paqi;

nasamasti Líbano qullunkir torrer uñtatawa,

Damasco marka tuqir uñxatata.

5 5 (6) P'iqimax Carmelo qullur uñtatawa;

ñik'utamasti chupik juch'usa ch'ankhar uñtatawa:

¡chhiri ñik'utamaw reyin chuymap luqhiptayi!

6 6 (7) Munasitaxay, munkañ warmi,

¡sinti jiwakipunïtawa!

7 7 (8) Sayt'asitamax palmera quqar uñtatawa;

ñuñunakamasti palmeran achunakapar uñtataw warkusi.

8 8 (9) Nayax uka palmera quqar makhatañ munta,

achunakap katuntasiri.

Ñuñunakamax nayatakix uva wayunakjamäniwa;

samanamasti,

manzananakan suma q'aphipjamäniwa;

9 9 (10) lakamax suma vinor uñtatawa,

suma quñaki laka ispillunakaxana,

laka ch'akhanakaxan muyti.

Warmi

10 10 (11) Nayax munasitaxanktwa:

jupan chuymapax naya tuqir uñtatawa.

11 11 (12) ¡Nayan munasitaxay, jutam, pampar sarañäni!

Alheña panqaranak taypin qhantatiñäni.

12 12 (13) Willjtarusti uva yapunakaruw sarañäni,

inach ch'uxñatatxpacha,

panqaranakapas amuchrantxpacha,

granado alinakas panqarxpacha.

¡Nayax ukawjan jumar munart'asïma!

13 13 (14) Mandrágora alinakax niyaw q'aphinakap q'aphitatayi;

punkusansti kunayman muxsa achunakaw utji:

waña muxsa achunaka, jichha apaqat muxsa achunaka,

munasitaxay, jumatakiw taqi ukanak imta.