1 SAMUEL 15 - Qullan Arunaka DC

Diosan Saúl reyir apanukutapa

1Mä uruw Samuelux Saúl reyir säna:

—Tatitux Israel markapan reyipäñamatak utt'ayiriw khithanitu. Ukhamasti, kuntix Tatitux sañ munktam uk ist'am.

2Taqi ch'amani Tatitux akham siwa: “Nayax amalecita jaqinakarux israelitanakar jan wali luratanakapat mutuyäwa, jupanakax chika thakhiruw sayantasipxäna kunapachatix israelitanakax Egiptot jutapkäna ukapachaxa.

3Ukhamasti jichhax saram, ukatsti nuwantanim, yänakapamppach tukjanim, janirak jupanakat khuyapt'ayasimti. Chachanaksa, warminaksa, wawanaksa, asu wawanaksa, ukhamarak vacanaksa, ovejanaksa, camellonaksa, asnonaksa taqpach jiwarayanim” —sasa.

4Saúl reyisti taqi jaqinakaruw jawsayäna, ukat Telaim chiqan tumpthapïna. Kayuk sarantir soldadonakasti pä patak waranqa chachanakänwa, Judá uraqinkir chachanakasti tunka waranqaraki.

5Ukatsti Saúl reyix Amalec jach'a markaruw saräna, mä jawira jak'aruw utjnuqtäna.

6Quenitas sat jaqinakarusti sarakïnwa:

—¡Jithiqtapxam! ¡Amalecita jaqinak taypit mistupxam, ukhamat nayan jumanakar jan jupanakamp chika tukjañaxataki; jumanakasti israelitanakarux sum uñjapxäyätaxa kunapachatix Egiptot jutapkän ukaxa! —sasa.

Quenitanakasti amalecita jaqinak taypit mistuwayxapxänwa.

7Ukat Saúl reyix amalecita jaqinakarux nuwantas arktäna, Havilá chiqata Sur markar mantañäkis uka chiqkama, ukasti Egipto qurpankiwa, jupanakarusti atipjarakïnwa;

8Agag sata amalecitanakan reyiparusti katuntänwa, taqi ejercitoparusti espadampkamaw jiwarayarakïna.

9Ukampisa, Saúl reyimpi ejercitopampix janiw Agag reyirux jiwayapkänti, janirakiw suma ovejanaksa, urqu vacanaksa, lik'i vaca qallunaksa, urqu ovejanakapsa jiwarayapkänti, wali jila alani yänaksa t'unjapkänti, jan ukasti, juk'a alani yänakak t'unjapxäna.

10Ukatsti Tatitux Samueluruw parlxayäna, sarakïnwa:

11—Saúl chachar reyit utt'ayataxat walpun amtasta, jupasti nayat jithiqtituwa, janirakiw arsutanakaxsa phuqkiti —sasa.

Uk ist'asasti Samuelux wali mayjt'asïna, uka arum paqarirakiw Tatituru achikt'asïna.

12Qhipürusti Samuelux Saúl reyimpi jikisir sarañatakiw wali willjtat sartasïna, ukampis juparux Saúl reyin Carmel chiqaru sarxatap yatiyapxäna, uka chiqan jupatak mä jach'a chuta sayt'ayatapa, ukatsti Guilgal tuqir sarxatap yatiyapxarakïna.

13Ukatsti Samuelux Saúl reyin ukaruw saräna, juparusti sänwa:

—Tatitux jumar jach'añchpan. Nayax Tatitun arsutanakaparux phuqxtwa —sasa.

14Samuelusti saskakïnwa:

—¿Kunatarak ovejanakana, vacanakan wararitapas ist'asiskisti? —sasa.

15Saúl reyix sarakïnwa:

—Amalec chiqat ukanak apanipxi, jaqinakasti Tatit Diosaru wilañcha luqtañatakix suma ovejanaka, suma vacanak imaqapxi. Ukat uksarusti q'al tukjanipxta —sasa.

16Samuelusti ukxarux sänwa:

—¡Amukt'am, kuntix Tatitux wasayp'ux siskitu uk yatiyäma! —sasa.

Saúl reyisti sarakïnwa:

—Parlaskakim —sasa.

17Ukat Samuelux säna:

—¿Janit jumasti jan yäqatjam amuyaskäyätasti? Ukampis jichhax israelita ayllunakan jilïripaw tukxtaxa, Tatitusti Israelan reyipat utt'ayaraktamxa.

18Jichhasti, Tatitutix jumaru uka jucharar amalecita jaqinakar q'al t'unjaniñamatak khitchïyätam ukaxa,

19¿kunatarak jumasti Tatitun arsutanakapar jan ist'asin kuntix uñisirimat aparapkta uk jumatak katuntastasti? —sasa.

20Saúl reyix sarakïnwa:

—Nayax Tatitun arsutanakaparux jaystwa, kuna lurañtix churkitu uksa phuqharaktwa: Amalec markan Agag reyiparus katuntasin apanirakta, amalecitanakarusti q'al tukjarakta.

21Ukampis soldadonakax kunatix tukjañatak satäki uka suma ovejanaka, suma vacanaka jilt'ayasipxi, Guilgal chiqan Tatitu Diosamar wilañcha luqtañataki —sasa.

22Ukat Samuelux sarakïna:

“Tatitutakix arsutanakapar

phuqhañaw juk'ampi sumaxa,

wilañchanaka,

nakt'at luqtäwinakat sipansa;

arsutap phuqhaña,

jupar ist'añaw sumaxa,

ovej lik'inaka wilañchanak luqtañat sipansa.

23Jupar kutkatirixa,

layqasiñanak luririmpi sasiwa;

jan ist'asirïki ukasti,

yaqha diosanakar yupaychirimpi sasiwa.

Juman arunakapar jan jaysatamatsti,

jupax janirakiw juman reyïñam munkiti” sasa.

24Ukat Saúl reyix Samuelurux säna:

—Jïsa, Tatitun arunakapar jan yäqasa, juman arsutanakamar jan ist'asaw juchachasta. Soldadonakaruw axsaräyäta, ukat mayitanakapar jaysta.

25Ukampis juchaxat pampachakitaya, ukatsti nayampi chika Tatitur yupaychañatak saram —sasa.

26Samuelusti sarakïnwa:

—Janiw jumamp chik sarkiristti, jumax Tatitun arunakapar janiw jaysktati, ukat jichhax Israelan reyipäñat jumar apanukxtam —sasa.

27Samuelusti sarxañatakiw kutikipstäna, ukampisa Saúl reyix isipat waythapisin isip ch'iyaqäna.

28Ukat Samuelux Saúl reyirux säna:

—Kunjämtix isix ch'iyaqkista ukhamarakiw Tatitux Israel marka apnaqañ apaqaraktam. Juman mayni marka masimar katuyxañatakiw apaqxtam, kawkïritix jumat sipansa juk'ampi askïki ukaru.

29Israelan jach'a Tatitu Diosapäki ukaxa, janiw k'ariskaspati, janirakiw amtkaspasa, jupasti amtañatakix janiw aliqa jaqikïkiti —sasa.

30Saúl reyix mä kutimpiw arsüna:

—Chiqpachansa nayaw juchachasta. Ukampis taqi Israel markan jilïri jaqinak nayraqatana, taqi jaqinak nayraqatana, nayarux mä reyirjam uñjañamatakiw achikt'assma. Ukhamax nayampi chika Tatit Diosamar yupaychañatak sarañäni —sasa.

31Ukatsti Samuelux Saúl reyimp chikaw kuttawayäna, ukat jupax Tatituruw yupaychäna.

32Ukspachaw Samuelux sarakïna:

—Amalecita jaqinakan Agag reyip akar irptanirapipxita —sasa.

Agag reyisti jan kunakiw Samuel nayraqatarux uñstäna, juparux janiw khitis jiwaykxaniti ukham amuyäna.

33Ukampis Samuelux sänwa:

—Kunjämatix jumax espadamampi walja warminakar jan wawani uñjasiytaxa. Ukhamarakiw taykamax jupanakjam uñjasini —sasa.

Guilgal chiqansti, Samuelux jan axsart'asaw Tatit nayraqatan Agag reyirux pusir kharinuqäna.

34Ukatsti Samuelux Ramá chiqaruw sarxäna, Saúl reyisti Guibeá chiqankir utaparuw kutt'xäna.

35Samuelusti janipuniw mayampsa Saúl reyirux uñjkxänti, chuymapansti jupat wal llakt'asiskäna, ukhamarakiw Tatitux Saúl reyiru Israel markan reyipat utt'ayasax llakisïna.