JOB 37 - Qullan Arunaka DC

1Jach'a thaya uñjasax chuymaxax putuqiwa,

chuymax mistuñ munxarakitu.

2Diosan jach'a ch'amampi arsutap ist'apxam,

lakapat mistki uka jach'a arupa.

3Jupaw lliju llijunak alaxpachan saratatayi,

uraqinsti mä thiyat mä thiykam ukanak puriyaraki.

4Uka qhipatsti mä jach'a qhixu qhixuw ist'asi,

jupax jach'a arupa arski ukkhaxa;

uka qhixu qhixunakan ist'asiñapkamasti,

lliju llijunakax janiw sayt'kiti.

5Diosax arunakap ist'asiyki ukapachasti,

jach'a muspharkañanakaw lurasi;

jan khitinsa amuyt'kaya jach'a luräwinakaw utjaraki.

6Khunurux uraqxar puriniñapatakiw arsu,

jallurusti ch'amampiw purxatayaniraki.

7Jaqinakarusti utanakaparuw qhiparayi,

ukhamat taqinis amuyapxañapataki,

jupan taqi ukanak luraskatapa.

8Animalanakax putunakaparuw mantxi,

ukaruw imantasxapxaraki.

9Jach'a tutukax aynach tuqit juti,

amsta tuqitsti wali thayaw jutaraki.

10Diosan phust'atapampiw umax chhullunkt'i,

walja umanakas luxuntaraki.

11Jupaw qinayanakarux umampi phuqhanti,

uka qinayanakat qhixu qhixunaksa mistuyaniraki;

12qhixu qhixunakasti q'iwi q'iwiw alaxpachanjam sari,

taqi aka uraqpachar phuqhantasa,

Diosan arsutanakaparjam phuqhasa.

13Diosax taqi ukanakxa

akapachar t'aqhisiyañatakiw utjayi,

jan ukax, khuyapayasiñap uñacht'ayañatakiraki.

14Job, jumax llamp'u chuymamp ist'am.

Diosan muspharkañ luräwinakap amuyt'am.

15Jumax yattati ¿kunjämsa Diosax taqi ukanak luri,

kunjämsa lliju llijunakas qinayan llijtkaraki ukxa?

16Jumax yattati,

¿kunjämsa qinayanakax alaxan tuynaqapxi,

ukax Diosan aski luräwipätapxa?

17Aynach thayax uraqir samarayki ukkhax,

jumax isimamp isintatax junt'jata jikxatastaxa.

18¿Jumax Diosar yanapt'asmati alaxpach janatatañanxa,

metalar uñtat ch'ullqhi tukuyañsa?

19Kuntix Diosar sapkä uk yatichapxita,

janiw kuns yatipkti, janiw kuna arsuñas utjapkituti.

20Nayax janiw kun arsuñsa munkiristti,

ukasti t'unjayasiñsa munkirista ukhamäspawa.

21Janiw intin qhanapax uñjañjamäkiti,

qinayanakax imantki ukapachaxa;

ukampisa thayt'anki ukapachasti,

alaxpachax q'aljtawayxiwa.

22Quri lliphipirinakaw amsta tuqit uñstani,

Diosax jach'a kankañapamp muyuntayaski ukapachaxa.

23Taqi ch'aman Diosax jan amuyt'kayawa,

jupax jach'a ch'amani chiqaparakiwa;

chiqapar uñjañ kankañapax jach'awa, janiw khitirus t'aqhisiykiti.

24Ukat jaqinakax jupatak axsartapxi;

yatiñan jaqinakax janiw jupatakix kunäpkisa.