JEREMÍAS 35 - Qullan Arunaka DC

Jeremiasampi, recabita jaqinakampi

1Josías chachan, Joacín yuqapax Judá uraqin reyïkän ukapachaw Tatitux wasitat nayar parlitu ukatsti sarakituwa:

2“Recabita jaqinakan ukar saram ukatsti jupanakampi parlanim. Jupanakarusti Utaxan utjkis ukanakat mä utar irpantam, ukankxapxani ukkhasti, vino umt'apxañapatak churarakim” sasa.

3Naya Jeremiasasti Jaazanías jaqir thaqhiriw sarta (uka Jaazaniasti yaqha Jeremías sata jaqin yuqapawa, Habasinías sat jaqin allchhiparakiwa), jilanakaparu, wawanakaparu, taqi recabita jaqinakar kuna,

4ukatsti Tatitun utaparuw jupanakar irpta, Hanán sat jaqin yuqanakapan utaparuw irpantta, uka Hanán jaqisti Igdalías sat jaqin yuqapänwa, Tatitur wali katuyatarakïnwa. Uka utasti, Tatitun utapan jilïrinakapäkis ukanakan utap jak'ankänwa, Salum jaqin Maasías sat yuqapan utap patana, khititix Tatitun utapar mantañ punku uñjirïkän uka.

5Ukansti recabita jaqinakarux wayuchanakaru, qirunakaru phuqwa vino churtxa, jupanakarusti saraktwa: “Aka mä juk'a vino umt'asipxam” sasa.

6Jupanakasti ukxarux sapxarakiwa: “Nanakax janiw vino umapkti, Recab jaqin yuqapa Jonadab sat nayra awkixaw mä iwxa jaytapxitu: Jumasa, wawanakamasa, janipuniw vino umapxätati sasa.

7Ukhamarak iwxa jaytapxitu: Janipuniw utanaksa lurasipxätati, yapunaksa yapuchapxätati, uva alinaksa ayrusipxätati sasa. Chhujllanakan utjasiñatakikiw jaytapxitu, aka uraqin walja maranak jakasipxañaxataki, kawkhantix jaya markat jutir jaqinakjam sarnaqapkta ukana.

8Nanakax Jonadab nayra awkixax jaytawayapkitu uka arunak phuqhapxapuntwa, ukatsti janipuniw nanakasa, warminakaxasa, wawanakaxas vino umapkti,

9janiw utanaksa ukan jakañatak utachasipkti, janirakiw uva alinakaxasa, yapunakaxasa utjapkituti.

10Chhujllanakanak jakasipxta, kunjämtix Jonadab nayra awkixax jaytawayapkitu uka arunakarjam phuqhasa.

11Ukampisa, kunapachatix Babiloniankir Nabucodonosor reyix aka markar mantantankän ukapachaw nanakax aka Jerusalén markar jakir jutxapxta, ukhamat caldeonakana, sirionakan ejercitopat jaltxañataki; ukat aka Jerusalén markan jakasipkta” sasa.

12Ukatsti Tatitux Jeremiasaruw parlxayäna, juparusti sarakïnwa.

13“Naya, Israelan Diosapa, taqi ch'aman Tatituw arsta. Jumarusti saraksmawa, jichhax Judá uraqinkiri, Jerusalén markankir jaqinakan ukar saram, jupanakarusti sarakim: ‘Recabita jaqinakat aka yatichäwi yatiqapxam, ukatsti arunakaxar ist'apxarakita. Naya, Tatituw uk arsta.

14Recab jaqin Jonadab yuqapan wawanakapax kuna arunaktix jupax wawanakapar jaytawaykatayna ukanak phuqhasipki, jupanakarusti “Janipuniw vino umapxätati” sataynawa, ukat jichhürkamax janipuniw vino umapkiti, nayra awkipan arunakapar phuqhasa. Nayasti uka kipkarakiw jumanakarux iwxanaka mayamp mayampi churapxsma, ukampis jumanakax janiw nayarux ist'apkistati.

15Jumanakan ukarusti, nayan profetanakaxarux mayamp mayampi khithanipxsma jumanakar sañapataki: ‘Uka jan wali sarnaqäwinakama, jan wali luräwinakam apanukupxam. Janirak yaqha diosanakan qhipapsa sarapxamti, ukanakarus yupaychapxamti, ukhamat kuna uraqtix nayax jumanakarusa, nayra awkinakamarus churkäyäta ukan jakasipkakïta’ sasa. Ukampis jumanakax nayan arunakaxarux janiw jaysapkistati, ist'apkarakistasa.

16Recab chachan yuqapa, Jonadab sat jaqin wawanakapax kuntix nayra awkipax jupanakar jaytkäna uka arunak phuqhapxapunïnwa; ukampis Israel markaxax janiw nayarux ist'kituti.

17Ukat naya, Israelan Diosapa taqi ch'aman Tatitux sistxa: Judá uraqina, Jerusalén markan utjasir jaqinakxaruxa kunayman jan walinak apayanï, kuntix jupanakar yatiykäyäta taqi ukanaka. Nayasti jumanakarux parlxayapxsmawa, ukampis janiw nayarux ist'apkistati, jawsapxsmawa, ukampis jumanakax janiw jaysapkistati.’ ”

18Ukhamarusa, Jeremías profetax recabita jaqinakarux sarakïnwa: “Israelan Diosapa, taqi ch'aman Tatitux siwa: ‘Jumanakax Jonadab nayra awkiman arunakap ist'apxatamata, taqi yatichäwinakapa, kuntix jumanakar sapkäyätam uka arunakar yäqapxatam laykuxa,

19Jonadab chachan wawanakapax utjapuniniwa, jupanakasti nayar luqtiriw jutapxani. Naya, Israelan Diosapa taqi ch'aman Tatituw uk arsta’ ” sasa.