SALMOS 135 - Qullan Arunaka DC

SALMO 135Diosan jach'a luräwinakapa

1¡Tatitux jach'ar aptatäpan!

Tatitun sutip jach'añchapxam;

Tatitun uywatanakapa,

2Tatitun utapankirinaka,

Diosasan uta anqäxapankirinaka,

jupar yupaychapxam.

3Tatitur yupaychapxam, jupax munasiriwa;

sutipar q'uchupxam, jupax khuyapayasiriwa.

4Jupaw Israelarux ajllisïna,

jupan markapäñapatakiw ajllisïna.

5Tatitun muspharkayätap yatta,

jupax taqi diosanakat sipan ch'amaniwa.

6Tatitux taqi kuntix munki uk luri,

alaxpachansa, akapachansa,

lamar qutansa, quta manqhansa.

7Uraq tukusitpach qinayanak sartayi,

lliju llijunakampiw jallun purxatañap yatiyi,

imatäki ukkhatpach thayanakarux antutnuku.

8Jupaw Egiptonkir jaqinakan

jilïr yuqall wawanakaparux jiwarayäna,

nayrïr uywa qallunakaruw jiwarayarakïna.

9Muspharkañ uñacht'äwinak

Egipto markar apayanïna,

faraón chachar uñacht'ayañataki,

jilïr jaqinakapar uñacht'ayañataki.

10Walja markanakaruw jiwamp tukjäna;

munañan reyinakaruw jiwarayäna:

11amorreo uraqinkir Sihón reyiru;

Basán uraqinkir Og reyiru,

Canaán uraqinkir taqpach reyinakaru;

12khä reyinakan uraqinakapsti,

Israel markaparuw katuyxäna.

13Tatay, sutimax wiñayawa;

sutimax wiñayapuniw amtatäni.

14Tatituw markaparux chiqapar uñjaski;

uywatanakapat khuyapt'ayasiraki.

15Diosar jan uñt'ir jaqinakan idolonakapax

qurit qullqit luratakiwa,

jaqin amparapampi luratakirakiwa.

16Lakanïkasinsa janiw parlapkiti;

nayranïkasinsa janiw uñjapkiti;

17jinchunïkasinsa janiw ist'apkiti;

janiw jakañ samananïpkisa.

18Uka diosanak luririnakax ukanakjamakïpxiwa,

ukanakar alkatirinakas pachpakïpxarakiwa.

19Israelitanaka, Tatitur jach'añchapxam;

sacerdotenaka, Tatitur jach'añchapxam;

20levitanaka, Tatitur jach'añchapxam;

Tatitur iyawsirinaka, jupar jach'añchapxam.

21¡Tatitux Sión markan qullanäpan,

Jerusalén markan jakir Tatitux jach'añchatäpan!

¡Tatitux jach'ar aptatäpan!