EZEQUIEL 29 - Qullan Arunaka DC

Egipto markatak profecía arunaka

1Tunka mara saraqataru, tunkïr phaxsina, tunka payan uru saraqatarusti, Tatitux sarakituwa:

2“Jumasti Ezequiel, jichhax Egiptonkir faraón reyimpiru, markapampir saykatam, ukatsti nayan sutixaru parlam.

3Jupanakarusti sarakim:

“ ‘Tatitux akham siwa:

Faraón, Egiptonkir rey,

nayax juman uñisirimaruw tukta,

jumasti mä jach'a katarir uñtataw

jawiraman winkusktaxa,

ukatsti saraktawa:

Nilo jawirax nayankiwa,

nayaw lurt'asta, sasa.

4Ukampis nayaw uka jawirat apsunïma,

lakamat anzuelompi uskuntasaw qatatsunïma.

Uka jawiran tuyur chawllanakasti

juman k'ilinakamaruw lip'katapxani.

5Ukatsti ch'usa wasararuw jaqunuküma,

jawiramankir chawllanakampi chika jaqunuküma;

ch'usa pamparu jaqtataw uñjasïta,

janirakiw khitis jumar imt'irix utjkaniti.

Ch'uminkir laq'unakana,

alaxpach jach'a jamach'inakan manq'apäyätawa.

6Egiptonkir taqpach jaqinakaw

nayan Tatitütax yatipxani.

Israel markax juman yanapam thaqhäna,

ukampis jumax mä suqus lawjamakiw tuktaxa:

7Yanapt'am thaqhapxäna,

ukampis jumax janiw yanapt'ktati;

yanapt'añ lantxa, chhuxriñchjtawa.

8“ ‘Ukatpï naya, Tatitux sistxa: ‘Egipto, nayaw jumarux espadanakampi nuwjayäma, jaqinakamsa, uywanakamsa jiwarayapxarakiniwa.

9Mä ch'usa wasarar tukutaw uñjasïta, ukapachaw jaqinakax nayan Tatitu Diosätax yatipxani. Jumasti saraktawa: Nilo jawirax nayankiwa, nayaw lurasta, sasa.

10Jichhax walikiwa, nayax juman uñisirimaruw tuktxa, jawiraman uñisiriparuw tukuraktxa. Mä axsarkaña, ch'usa wasararuw tukuyäma, Migdol sata ukatpacha Asuán sata ukakama, Etiopía markampi qurpäkis ukakama.

11Janipuniw jaqinakasa, kuna uywanakas uka chiqnam sarakipapkaniti. Pusi tunka maraw ukan janipun khitis jakkaniti.

12Egipto, nayaw jumarux mä ch'usa wañsuta wasar markar tukuyäma, pusi tunka maraw markanakamax q'ala tukjat uñjasipxani, tukjat uñjasipki uka markanakat sipansa juk'ampi tukjataw uñjasipxani, jaqinakamarusti yaqha markanakaruw katuntat apayä, yaqha markanak taypiruw ananukurakï.

13Tatitusti sarakiwa: ‘Pusi tunka maranak qhipatsti, egipcio jaqinakarux ananukuta uñjasipkän uka markanak taypit anthapinxarakï.

14Ukatsti katuntatäkän uka egipcionakarusti, Egiptot aynach tuqiruw utjantasiyarakï, kawkhatix markapäki ukaru, ukansti jupanakax mä jisk'a markaki sayt'ayapxani.

15Uka markasti taqi markanakat sipansa wali jisk'akïniwa, janirakiw yaqha markanakat sipan juk'ampi nayrar sartkaniti. Juparusti janiw jiltaykäti, jisk'a markakïniwa, janirakiw yaqha markanakarus apnaqkaniti;

16Israel markasti janipuniw mayampsa Egiptorux alkataskxaniti, ukaw jupanakar amuyt'ayani, ukham alkatasis Egiptor yanap mayir sarapkän ukapacha pantjasipxatapata. Ukapachaw nayan Tatitütax yatipxani’ ” sasa.

17Pä tunka paqallqun mara saraqataru, nayrïr phaxsina, qalltïr uru saraqatarusti, Tatitux nayaruw parlxayitu, akham sasa:

18“Babiloniankir Nabucodonosor reyix, Tiro markar katuntasiñatakix ejercitop wakichäna, uka jaqinakapan p'iqinakapas q'arartañapkama, kallachinakapas llixtjtañapkamaw wakichäna; ukampis jupasa, ejercitopas Tiro markar katuntasax janiw kuna asksa jikxatapkänti.

19Ukatpï naya, Tatitux sistxa: Nayaw Nabucodonosor reyirux Egipto marka katuyä, taqi qamir yänakapsa juparuw katuyarakï, kuntix lunthatkani ukanakampi soldadonakapar luratapat churañapataki.

20Egipto markxa, Nabucodonosor reyimpiw katuntayä, Tiro markar katuntañ munatapat mä churäwïkaspa ukhama, naya lanti irnaqatap layku. Naya, Tatituw uk arsta.

21“Uka urunakansti nayaw Israel markarux juk'ampi ch'ama yapt'arakï, jumasti Ezequiel, jupanakampix qhan parlarakïta. Ukapachaw yatipxani, nayan Tatitu Diosätaxa.”