1 1 (2) ¡Kusisiñamp Diosar q'uchupxam,
jupaw ch'amañchirisaxa!
¡Jacobun Diosapar kusisiñamp yupaychapxam!
2 2 (3) Chhullu chhullunakampi chik q'uchupxam,
munkay arpampi, salteriompi chik q'uchupxam.
3 3 (4) Machaq phaxsi uñstipan trompet phust'apxam,
urt'a puripansti, phust'apxarakim
ukürux jiwasanakan jach'a urusawa.
4 4 (5) Ukax kamachi arunakapawa,
Jacobun Diosapaw Israel markar churawayi;
5 5 (6) Josearus uka arunak churawayaraki,
Diosax Egiptor jan walt'aykän ukapacha.
Nayax jan uñt'at aru akham sir ist'äyäta:
6 6 (7) “Jatxattir q'ipim kallachimat apaqxsma,
ch'ama tukuñ lurañamat samart'aysma.
7 7 (8) T'aqhisiñaman jawsista, nayasti qhispiysmawa;
q'ixuqir qinay taypitpach nayax jaysansma;
Meribá uma jalsu jak'an yant'sma.
8 8 (9) Markaxay, iwxanakaxar ist'am;
¡Israel marka, inachay ist'itasma!
9 9 (10) Janiw yaqha markankir diosanakanïyätati,
janiw yaqha markankir diosanakarux yupaychätati.
10 10 (11) Nayaw Tatitu Diosamätxa,
nayaw Egipto markat irpsunsma,
kuns manq'añ munta,
nayax jilarkir churäma” sasa.
11 11 (12) “Markaxasti janiw ist'añ munkitänti;
¡Israel markax janiw jaysañ munkitänti!
12 12 (13) Ukat munañaparjam sarnaqayta,
munataparjamaw jakapxarakïna.
13 13 (14) Markaxatix ist'itasapänxa,
Israel markatix thakhixanjam sarnaqasapänxa,
14 14 (15) mä ch'ipxtanak timanakaparux aynacht'ayiriskäyäta,
uñisirinakaparus mutuyiriskäyäta.”
15 15 (16) Tatitur uñisirinakax axsarañat liwirtapxaspa,
juchañchäwipasti jan mayampitakïspawa.
16 16 (17) Diosax sumïr trigompiw markaparux manq'ayaspa,
wasar misk'impiw umat pharjatap apaqarakispa.
Who We AreWhat We EelieveWhat We Do
2025 by iamachristian.org,Inc All rights reserved.
