EZEQUIEL 8 - Qullan Arunaka DC

Ezequiel profetax unañchäwi tuqi Jerusalenan ñanqha luräwinakap uñji

1Suxtïr marana, suxtïr phaxsina, phisqa uru saraqataruw, nayax utaxan qunt'ata jikxatasiskäyäta Judá uraqinkir jilïr jaqinakampi. Akatjamat Tatitux amparap nayar luqxatitu,

2ukatsti, mä jaqir uñtat uñjarakta. Cinturapat aynacharux ninäkaspas ukham uñjta, cinturat amstarusti mä suma lliphipkir bronce qhuyar uñtataw k'ajarakïna.

3Uka jaqisti mä amparampjamaw luqtanisax ñik'utat katuntitu. Ukat Tatitun ch'amapax alayar tuytayitu, Tatitux unañchäwinak tuqiw Jerusalén markar irpitu, ukatsti marka manqhana amsta tuqi uñtatäki uka punku chiqaruw sayt'ayitu, uka chiqanarak Tatitur q'apisiyiri idolox jikxatasïna.

4Israelan Diosapan k'ajkir kankañapax ukkhankarakïnwa, kunjämtix nayax qhirwa tuqin uñjkäyät ukhama.

5Jupasti sarakituwa: “Amsta tuqir uñtam” sasa.

Nayasti amsta tuqiruw uñtta, mantañawjansti, altar jak'ankki uka punku chiqan, Tatitur q'apisiyiri ídolo uñjarakta.

6Ukat jupax sarakitu: “¿Uñjtati kuna axtaskañ luräwinaktix israelitanakax lurapki ukanakxa? Ukatpï nayax qullan utaxat jayarux sarxtxa. Jichhasti juk'ampi ñanqha luratanak uñjäta” sasa.

7Ukxarusti qullan uta anqäx tuqir mantañäkis uka punkuruw irpitu. Ukatsti pirqan mä jach'a p'iya uñjta.

8Jupasti sarakituwa: “Uka pirqan utjir p'iya juk'ampi jach'a p'iysum” sasa.

Nayasti uka p'iyxa juk'ampi jach'aruw tukuyta, ukatsti mä mantaña jikxatarakta.

9Ukatsti sarakituwa: “Mantam, ukan uñjäta kuna axtaskañ luräwinaktix lurapki ukanaka” sasa.

10Nayasti mantasin, kunayman katarinakan uñnaqapa, q'añu animalanakan uñnaqap uka pirqa irampachan qillqsuta uñjta, ukhamaraki Israel markan axtaskañ idolonakapa qillqsuta.

11Ukatsti uñjaraktwa israelitanakan paqallqu tunka jilïr jaqinakaparu uka idolonakar yupaychaskiri, uka jilïrinak taypinsti Safán sat jaqin Jaazanías yuqapaw ukankarakïna. Sapa maynis incienso q'aphichañ wayt'atkamänwa, incienso jiwq'ix qinayar uñtataw misturakïna.

12Ukatsti Tatitux sarakituwa: “Uñtam Israelan jilïrinakaparu. Sapa maynis diosanakaparuw jamasan yupaychasipki. Jupanakasti janis nayax ukanak uñjkirista ukham amuyapxi, aka markarux apanukkiristsa ukham amuyapxaraki” sasa.

13Ukxarusti saskakïnwa: “Janiw ukakïkiti; jichhas akat qhiparux juk'ampi jan walinak lurir uñjaskakïta” sasa.

14Ukatsti Tatitun utapar mantañ punkuruw irparakitu, amsta tuqiru. Ukansti warminakaw qunurasipkäna, Tamuz sat diosat jachasipkarakïna.

15Ukat sarakitu: “¿Akanak uñjtati? Jichhas juk'ampi jan walinak uñjaskakïta” sasa.

16Ukatsti jupax Tatitun utapan manqhäxa chiqaruw irparakitu, ukatsti Tatitun qullan utjäwipar mantañäki uka chiqa, altaräkis uka chiqa taypinsti, pä tunka phisqan jaqinak uñjta, jupanakax Qullan Chiqa satäkis ukatxa, qhipa tuqir uñtata, inti jalsu tuqir uñtasin alt'ataw intir yupaychasipkäna.

17Ukhamasti Tatitux sarakituwa: “¿Uk uñjtati? Judá markax taqi uka q'añu luräwinakampis janiw sisthapkiti, ukhamarus aka markarux ch'axwañanakampiw phuqhanti. Mayampi mayampi nayarux q'apisiyapxitu, idolopar yupaychañ layminakan jan wali q'aphitanakapsa mukt'ayapxituwa.

18Ukampis nayax wali jach'a q'apisiñampiw jichhax sartasirakï. Janipuniw jupanakat khuyapayaskäti. Qawqhas arnaqasisipkpan, janipuniw jupanakarux ist'käti” sasa.