NÚMEROS 33 - Qullan Arunaka DC

Israelitanakan thakhi saräwipa

1Israelitanakax Egipto uraqit mistunipkän ukapachax, mä ejercitor uñtataw tam tama siqicht'at sarantapxäna, Moisesampi Aaronampi irpata.

2Moisesax Tatitun arsutaparjamaw qillqäna, kawkha chiqattix sartawayapkäna, kawkha chiqarutix purintapkän ukawjanakan sutinakapa. Israelitanakan thakhi sarapxatapax akhamänwa:

3Israelitanakax nayrïr phaxsina, tunka phisqan uru saraqataruw Ramsés uraqit mistunipxäna, Pascua uruyäwit qhipüru. Jupanakax wali ch'amaniw mistunipxäna, taqpach egipcio jaqinakan uñjkata.

4Uka pachpa uruw, egipcionakax tayna yuqall wawanakapan amayap p'amp'asipkäna, Tatituw jupanakarux jakañap apaqatayna, Egipto uraqin diosanakapar mutuyañataki.

5Israelitanakax Egiptonkir Ramsés markat sartawayasax Sucot chiqan utjnuqtapxäna.

6Sucot chiqat mistuwayasax Etam chiqaruw purintapxäna, wasar qurpa thiyana.

7Etam chiqat sartawayapxäna, Pi-hahirot tuqi muytapxäna, Baal-sefón inti jalsu tuqina, ukatsti Migdol uñkatasin utjnuqtapxäna.

8Pi-hahirot chiqat sartawayasasti, jach'a quta makhatasin wasararuw puripxäna. Etam wasaranjam kimsa uru sarasasti, Mará chiqan utjnuqtapxäna.

9Mará chiqat sartawayasax Elim chiqaruw puripxäna, kawkhantix tunka payan uma jalsunakampi, paqallqu tunka palmera quqanakamp utjkatayna ukkharu, ukatsti ukawjan utjnuqtapxäna.

10Elim chiqat sartawayasasti Mar Rojo quta thiyaruw utjnuqtapxäna.

11Mar Rojo quta thiyat sartawayasax Sin sat wasararuw utjnuqtapxäna.

12Sin wasarat sartawayasasti Dofcá sat chiqaruw utjnuqtapxäna.

13Dofcá chiqat sartawayasasti Alús sat chiqan utjnuqtapxäna.

14Alús chiqat sartawayasasti Refidim sat chiqan utjnuqtapxäna, markan uma umt'añapatak jan utjkän ukkharu.

15Refidim chiqat sartawayasasti Sinaí wasaran utjnuqtapxäna.

16Sinaí wasarat sartawayasasti Quibrot-hataavá sat chiqan utjnuqtapxäna.

17Quibrot-hataavá chiqat sartawayasasti Haserot sat chiqan utjnuqtapxäna.

18Haserot chiqat sartawayasasti Ritmá sat chiqan utjnuqtapxäna.

19Ritmá chiqat sartawayasasti Rimón-peres sat chiqan utjnuqtapxäna.

20Rimón-peres chiqat sartawayasasti Libná sat chiqan utjnuqtapxäna.

21Libná chiqat sartawayasasti Risá sat chiqan utjnuqtapxäna.

22Risá chiqat sartawayasasti Quehelata sat chiqan utjnuqtapxäna.

23Quehelata chiqat sartawayasasti Séfer sat qullun utjnuqtapxäna.

24Séfer qullut sartawayasasti Haradá sat chiqan utjnuqtapxäna.

25Haradá chiqat sartawayasasti Maquelot sat chiqan utjnuqtapxäna.

26Maquelot chiqat sartawayasasti Táhat sat chiqan utjnuqtapxäna.

27Táhat chiqat sartawayasasti Térah sat chiqan utjnuqtapxäna.

28Térah chiqat sartawayasasti Mitcá sat chiqan utjnuqtapxäna.

29Mitcá chiqat sartawayasasti Hasmoná sat chiqan utjnuqtapxäna.

30Hasmoná chiqat sartawayasasti Moserot sat chiqan utjnuqtapxäna.

31Moserot chiqat sartawayasasti Bené-jaacán sat chiqawjan utjnuqtapxäna.

32Bené-jaacán chiqat sartawayasasti Hor de Guidgad sat chiqawjan utjnuqtapxäna.

33Hor de Guidgad chiqat sartawayasasti Jotbata sat chiqawjan utjnuqtapxäna.

34Jotbata chiqawjat sartawayasasti Abroná sat chiqan utjnuqtapxäna.

35Abroná chiqawjat sartawayasasti Esión-guéber sat chiqawjan utjnuqtapxäna.

36Esión-guéber chiqawjat sartawayasasti Cadés chiqan utjnuqtapxäna, Sin sat wasarana.

37Cadés chiqawjat sartawayasasti Hor sat qullun utjnuqtapxäna, Edom uraqi qurpana.

38Tatitun arsutaparjamaw Aarón sacerdotex Hor sat qullur makhatäna, jupasti ukan jiwxäna, phisqïr phaxsina, nayrïr uru saraqataru, pusi tunka mara israelitanakax Egiptot mistunipkatayna uka urut jakt'asina.

39Aarón sacerdotex Hor sat qullun jiwxäna, jupasti ukapachax patak pä tunka kimsan maranïnwa.

40Arad chiqankir cananeo reyix, Négueb chiqan utjasïna Canaán uraqina, jupax israelitanakan purinitap yatïna.

41Hor sat qullut sartawayasasti Salmoná chiqawjan utjnuqtapxäna.

42Salmoná chiqawjat sartawayasasti Punón sat chiqan utjnuqtapxäna.

43Punón chiqawjat sartawayasasti Obot sat chiqawjan utjnuqtapxäna.

44Obot chiqat sartawayasasti Iié-abarim sat chiqawjan utjnuqtapxäna, Moab uraqi qurpana.

45Iié-abarim chiqat sartawayasasti Dibón-Gad sat chiqan utjnuqtapxäna.

46Dibón-Gad chiqat sartawayasasti Almón-diblataim sat chiqan utjnuqtapxäna.

47Almón-diblataim sat chiqat sartawayasasti Abarim sat qullu patanakan utjnuqtapxäna, Nebo qullut inti jalsu tuqina.

48Abarim qullunakat sartawayasasti Moab pampanakan utjnuqtapxäna, Jordán jawir thiyana, Jericó marka uñkatasina.

49Jupanakax Jordán jawira irananakan utjnuqtasipxäna, Bet-jesimot chiqawjata, Abel-sitim sat chiqakama, Moab uraqi pampanakana.

Canaán uraqi katuntañampita, lakinuqasiñampit kamachinaka

50Moab uraqi pampanakana, Jordán jawira thiyana, Jericó marka uñkatasina, Tatitux Moisesar parläna, akham sasa:

51“Israelitanakar akham sarakim: Jumanakax Jordán jawir makhatapkäta, ukatsti Canaán uraqir mantapkät ukkhaxa,

52uka uraqin jakir jaqinakaruw alisnukupxäta, qalampita, metalampit lurat diosanakapar taqpach t'unjapxäta, ukatsti diosanakapar qullu patanakan yupaychapki ukawjanak t'unjapxarakïta.

53Uka uraqi katuntapxam, ukan utjantasipxam, nayaw jumanakar uka uraq katusxapxañamatak churapxsma.

54Ukampis suerte jaqtasaw uraqi jaljapxäta, taqpach ayllunakan utjir wila masi tamanakaru; walja jaqini wila masi tamarux jach'a uraqinak churapxäta, juk'a jaqini wila masi tamanakarusti jisk'a uraqinak churapxarakïta; suertet wakt'ki ukhamarjamaw sapa wila masi tamanakax katuqani.

55Jumanakatix uka uraqin jakir jaqinakar jan alisnukupkätaxa, uka uraqin qhiparirinakax jisk'a t'una lawar uñtata, jan ukax, janchinakamar jan walt'ayir ch'aphir uñtataw jan walt'ayapkätamti;

56ukapachaw nayax jumanakar kuntix uka jaqinakar lurañ amtkäyät ukanak lurä” sasa.