MIQUEAS 6 - Qullan Arunaka DC

III. MARKAPAR TATITUN JUCHAÑCHATAPA, QHISPIYASIÑXAT ARSÜWINAKA(6—7)Diosax Israel markampiw ch'axwi

1Ist'apxam kuntix jichhax Tatitux siski uka:

“¡Qullunakan nayraqatapan arsusim,

uka qullunakasti arsusitam ist'apxarakpan!”

2Qullunaka, jumanakas ist'apxam,

uraqin qalltanakapa, ist'apxarakim;

Tatitux markapar juchañchañatakiw sarti;

Israel markampisti ch'axwañaruw mantani.

3Tatitux sarakiwa:

“Markaxay, jichhax sita,

¿kuna jan walsa jumarux lursma, jan ukax kuncha sisma?

4Nayaw Egipto markat irpsunsma, t'aqhisiñat qhispiyanisa;

nayaw Moisesaru, Aaronaru, Mariarus khithanta,

jumar irpsuniñapatakiw khithanta.

5Markaxay, jichhax amtasimaya

Moab uraqinkir Balac reyipan amtatanakapxa,

ukhamarak kuntix Beor sat Balaam yuqapax siskäna ukanakata.

Kunapachatix Sitim chiqat Guilgal chiqar sarkäyätas uk amtasirakimaya,

Pachpa Tatituw atipjäwinakapsa jumarux churaraktam.”

Kuntix Tatitux jaqit suyki ukxata

6¿Kunampirak alaxpachankir Dios Tatitur

yupaychañatak uñstästi?

¿Jupan nayraqataparusti maran vaca qallunakampiti uñstäxa

jupar wilañcha luqtañataki?

7¿Tatitusti kusisirakispati jupar waranqa ovejanaka,

jan ukax tunka waranqa litro aceite churirista ukaxa?

¿Jan ukax jilïr yuqall wawaxcha Tatitur saykatataxata, jucha lurataxatsa,

luqtirista?

8Tatitux niyaw sistam,

kunsa lurasma askïñatakixa,

kunsa jupax jumat suyixa:

askïñama, taqinirus chiqap uñjañam muni,

Tatit Diosamarus alt'at chuymamampi yupaychañama.

Sallqjañampita k'arintañampita yatiyäwi arunaka

9Tatitux markpacharuw jawsaski,

alt'at chuymampi jaysañasti amuyt'asirïñawa:

“Markachirinaka, markar amuyt'ayirinaka, ist'apxam.

10Israelit jaqinaka,

janiw nayatakix askïkiti jan wali jaqinakäpxañamaxa,

luratanakamax janipuniw nayatakix askïkiti.

11Sallqjat yänakampiw qamiriptapxtaxa;

k'ari tupuñanak apnaqapxtaxa,

lunthatat yänakampiw utanakamarus phuqhantapxtaxa.

12Aka markankir qamirinakax jaqir t'aqhisiyirkamakiwa;

taqinis k'arinaka, sallqjirkamakïpxiwa.

13Ukat jichhax mutuyapxäma,

jucha luratanakamatsti q'al aynacht'ayapxäma.

14Manq'askätawa, ukampis janiw sist'askätati,

manq'atxa awtjayasiskakïtawa;

taqi kunsa apthapiskätawa,

ukampis jan kunanikiw uñjasiskäta,

kunsa jikxatäta ukkhaxa,

nuwasïwimpiw taqi ukanak t'unjayä.

15Yapuchaskätawa,

ukampis janiw apthapkätati;

aceitunanaksa ch'irwsuskätawa,

ukampis janiw aceite apskätati;

uvanaksa taksuskätawa,

ukampis janirakiw vinop umkätati.

16Jumax Omrí reyina,

Ahab reyin wila masinakapan arsutanakapa, luräwinakap lurtaxa,

kunjämtix jupanakax sarnaqkäna ukhamarak sarnaqtaxa.

Ukat jichhax jumatsa, jaqinakamatsa,

axsarayaskaña, laruskañ tukuyapxäma,

markaxan p'inqapasti jumxarurakiw purini.”