JOSUÉ 9 - Qullan Arunaka DC

Gabaonita jaqinakampi arust'äwi

1Hititanakana, amorreonakana, cananeonakana, ferezeonakana, heveonakana, jebuseonakan reyinakapax kunatix luraskatayna ukanak yatipxäna. (Uka reyinakax Jordán jawirat inti jalanta tuqina, qullu tuqinakana, pampa tuqinakana, jach'a Mediterráneo quta irananakana, Líbano chiqanakan jakapxäna.)

2Ukatsti taqi jupanakax mä amtäwiru mantasin jaqthaptapxäna, Josué chachampi, israelitanakampi nuwasiñataki.

3Ukampisa, Gabaón chiqan jakapkän uka heveo jaqinakax, kunjämtix Josué chachax Jericó, Ai markanakar lurkatayna uk yatipxäna,

4ukat jupanakax Josué chachar sallqjañ amtapxäna. Jupanakasti thantha costalanaka, lip'ichit lurat vino imañ thantha wayaqanak asnonakapxar khumxatasin sarapxäna;

5jupanakax mirq'i isimpi, thantha wiskhunakampiw uchasiwayapxäna, thakhin sarañatakix qurwarit qhulu t'ant'ak apasipxäna.

6Kunapachatix Guilgal campamentor purxapxän ukkhasti, jupanakax Josué chachampiru, israelitanakampirux akham sapxänwa:

—Nanakax wali jaya uraqit jutapxta, jichhasti jumanakampi mä suma amtäwiruw mantañ munapxta —sasa.

7Israelitanakasti uka heveo jaqinakarux sänwa:

—Inas jumanakax aka jak'anakan jakasipksta; ¿kunjämarak jumanakampi mä suma amtäwiru mantsnasti? —sasa.

8Ukampis jupanakax Josué chacharux sapxänwa:

—Nanakax juman luqtirinakamaw tukupxä —sasa.

Ukat Josué chachax jupanakar jiskt'äna:

—¿Khitïpxarakta jumanakasti? ¿Kawkhatarak jutapxtasti? —sasa.

9Jupanakasti sapxänwa:

—Nanakax wali jayat jutapxta, Tatitu Diosaman wali ch'amanïtap yatisa. Egipto markan kuntix jupax lurki taqi ukanak yatipxta,

10ukhamarak kuntix Jordán jawir khurkatankir pani amorreo reyinakaru lurki ukanaksa, Sihón sat Hesbón markan reyiparu, Astarot chiqan jakir Og sat Basán markan reyiparu.

11Ukat nanakan jilïrinakaxasa, marka masinakaxas akham sapxitu: ‘Jumanakax thakhitak manq'añanak apasipxam, ukatsti kawkhankkitix jupanakax ukkhakam sarapxam. Ukatsti sapxarakim: Nanakax jumanakan luqtirimaruw tukupxä, mä suma amtäwiruw jumanakampi mantañ munapxta’ sasa.

12Kunapachatix jumanakar thaqhir mistunipkta ukkhaxa, aka t'ant'anakax junt'üskänwa, jichhasti q'ala qhuluntata qurwantatawa.

13Lip'ichi wayaqanakas vino uskunipkta ukkhax machaqäskänwa, jichhasti q'ala ch'iyanuqtatawa; isinakaxasa, wiskhunakaxas wali jayat jutapxatax laykux q'ala thanthäxiwa —sasa.

14Israelitanakasti gabaonita jaqinakan manq'añanakap mallt'apxäna, ukampis uk lurañatakix janiw Tatiturux jiskt'asipkänti.

15Ukatsti Josué chachax jupanakampi sumankañatakiw mä arust'äwi luräna, jupanakar jan jiwayañatak arsusa; israelitanakan maynïr jilïrinakapasti uka pacha juramento lurapxarakïna.

16Kimsa uru qhipatsti, israelitanakax akatjamat yatipxäna gabaonitanakax uta jak'a masipäpxatapa, ukhamarak uka jak'an jakirïpxatapa.

17Ukatsti israelit jaqinakax Gabaonitanakar thaqhiriw mistuwayapxäna, kimsürutsti Gabaón, Quefirá, Beerot, Quiriat-jearim sat markanakaparuw puripxäna.

18Ukampis israelitanakax purisin janiw jupanakarux jiwaraykänti, jilïrinakapan Israelan Tatit Diosan sutipxaru jan jiwayañataki juramento lurapxatap layku.

Ukat markankirinakax jilïrinakapataki kunayman arusipxäna,

19ukampis jilïrinakapax sapxänwa:

—Nanakax Israelan Tatitu Diosan sutipxaruw juramento lurapxta jupanakar jan jiwarayañataki, ukat jichhax jan kunsa lurapkiristti.

20Janiw jiwayañasäkiti, juramento luratarutix p'akintañäni ukaxa, Tatitux jiwasatakiw q'apisispa —sasa.

21Ukhamaw israelitanakan jilïrinakapax Gabaón markat jutir jaqinakan jakañanakapat khuyapt'ayasïna, ukatsti jupanakarux taqpach jaqinakatak lawa ch'iyiritaki, uma apiritakiw uchasipxäna, ukhamat juramento luratanakap phuqhapxäna.

22Josué chachasti gabaonita jaqinakar jawsasin jiskt'äna:

—¿Kunatarak nanakar sallqjapxista wali jayat jutapxta sasasti? Chiqpachansa jumanakax aka jak'an jakasipkatätaxa.

23Ukat jichhax jumanakax ñanqhachat jakapxäta, wiñayarakiw luqtirit sarnaqapxäta, ukatsti Diosaxan utapatakix lawa ch'iyanipxäta, uma apanipxäta —sasa.

24Jupanakasti Josué chacharux sapxänwa:

—Nanakax jumar axsarasaw uk lurapxta, nanakar jan jiwayañamataki, nanakasti kuntix jumanakan Tatitu Diosamax Moisesar sawaykatayna uk yatipxtwa: “Taqi aka markanak jumanakar katuyapxäma ukatsti ukan jakir jaqinakarux taqpach tukjapxäta” sasa.

25Jichhasti nanakax juman amparamankapxtwa, nanakampisti kunjämtix munkta ukhamar luram —sasa.

26Josué chachasti janiw israelitanakan gabaonita jaqinakar jiwayañap munkänti,

27ukampis uka jaqinakarux Israel markankirinakampitaki, Tatitun altarapampitak lawanak ch'iyañapataki, uma apaniñapatak uskutäpxänwa, kawkharutix Tatitux ajlliskani ukkhana. Gabaonita jaqinakasti jichhürkamaw uka lurañanakanïsipki.