ZACARÍAS 10 - Qullan Arunaka DC

d) Qhispiyañatak arsüwi(10.1—11.3)

1Tatitur jallupach jallunak mayipxam,

lliju llijunak utjayir Tatituw

walja jallunak apayanini,

taqiniruw pampankir ch'uxñanak churarakini.

2Yaqha diosanakan arupax k'ariwa,

yatirinakax k'ari uñjäwinak katuqapxi.

Arsutanakapax inamay samkanakakiwa,

chuymachasiñ arunakapasti ina ch'usakiwa.

Ukat markax uywa tamar uñtat inak aywinaqxi,

awatirin jan utjatapat t'aqhisiskaraki.

3Ukat Tatitux saraki:

“Q'apisiñaxax awatirinakatakiw nakti,

markaxar irpirinakarux mutuyarakïwa.”

Naya pachpaw markaxar uñjasiskä.

Judá markax jichhax mä oveja tamawa,

ukampis jupanakarux nuwasïwinkir ch'amani caballonakjam tukuyarakï.

4Jupanak taypit Wakiskir Qalax mistuni,

chhujllu Ch'akurusa,

nuwasïwin Mich'i antutt'añasa.

Jupanak taypit irpirinakax misturakini.

5Jan axsarir soldadonakjamäpxaniwa

ñiq'i taypin nuwasir soldadonakjama;

caballxat sarir soldadonakaruw nuwantapxani

jupanakarusti mä p'inq uñjasiyapxarakini,

nayaw nuwasïwin jupanakampiskä.

6Tatitux siwa:

“Nayätwa Israelan Tatitupaxa,

markaxan mayisitanakap ist'araktwa.

Nayaw Judá wila masit saraqirinakarux ch'am churä,

José wila masit saraqirinakarusti nayaw qhispiyarakï.

Wasitat uraqiparux irpxä,

jupanakat khuyapayasitax layku.

Janis jupanakar apanukkiriskäyäta ukham jichhax amuyasxapxani,

jupanakar khuyapayasiñax uñacht'ayä.

7Israelitanakax wal kusisipxani

kunjämtix soldadonakax

vino umantasax wal kusisipki ukhama;

uk uñjasax wawanakapax kusisirakiniwa

nayan taqi ukanak lurataxata.

8“Nayaw jupanakar jawsasin, tantacht'arakï,

jupanakaru qhispiyatax layku.

Waljani markaruw tukupxani

kunjämäpkäntix nayra pachax ukhama.

9Nayaw yaqha markanak taypir ananukta,

ukampisa, jayankkasinsa nayat amtasipxitani,

mä urusti wawanakapampiw uraqipar kutt'anxapxani.

10Jupanakarux Egipto markat kutt'ayanxä,

Asiria markat apanxarakï,

Galaad uraqimpina,

Líbano qullunakampin jakayarakï;

waljanipunïpxaniwa

uraqis jupanakatakix pist'aniwa.

11Llakt'ataw Egipto quta makhatapxani,

nayaw uka qutan mathapinakap t'akuyä.

Nilo jawiran umapsa q'al wañt'ayä;

nayaw Asiria markan jach'a jach'a tukutapsa tukjä,

Egipto markan jach'a munañanïñapsa nayaw apaqarakï.

12Nayaw markaxarux ch'am churä,

jan axsarasaw sutixar sarantapxarakini.

Naya, Tatituw uk arsta.”