2 REYES 3 - Qullan Arunaka DC

III. ELISEO PROFETAN SARNAQÄWIPA, JORAM REYIX ISRAEL MARKA APNAQKÄN UKA URUNAKANA(3.1—8.15)Joram reyin Israel marka apnaqatapa

1Josafat reyix Judá markar tunka kimsaqallqun mara apnaqaskän ukapachaw, Ahab chachan Joram yuqapax Israel marka apnaqañ qalltäna, jupasti tunka payan maraw Samaria markan apnaqäna.

2Joram reyin luratanakapax Tatitun nayraqatapan janiw walïkänti, ukampis janiw awkipanjama, taykapanjam sinti jan walïkänti, jupasti kawkïr qaltix awkipax Baal diosar jach'añchas luraykatayna uka qala t'unjayäna.

3Ukampisa, kuna juchanaktix Nabat chachan Jeroboam yuqapax lurkatayna uka pachpa juchanak lurarakïna, ukampiw Israel markarux jucha lurayatayna.

Eliseo profetax Moab markar atipjañat yatiyi

4Mesá sat Moab markan reyipax, ovejanak uywirïnwa, ukatsti sapa maraw Israelan reyiparux qullqi churañapäna: patak waranqa mä marani ovejanakampi, patak waranqa t'awrani urqu ovejanakampi.

5Ukampis Ahab reyix jiwxäna ukkhasti, Moab markankir Mesá sat reyix Israelan reyipatakiw sayt'xäna.

6Ukat Joram reyix Samaria markat mistusin Israelan taqpach ejercitopar uñakipäna.

7Ukatsti Judá uraqinkir Josafat reyipar sapxañapatakiw khitharakïna: “Moab markan reyipaw nayatak sayt'asi. ¿Nayamp chika jupampi nuwasir sarañ munasmati?” sasa.

Judá markankir Josafat reyisti ukxaruw säna: “Kun janixa. Taqpach ejercitoxampi, caballeriaxampis jumampïpxtwa.

8Ukampisa, ¿kawkïr thakhinjamarak katuntir sarañänisti?” sasa. Joram reyisti sänwa: “Edom wasararu sarki uka thakhinjama” sasa.

9Ukhamaw Israelampina, Judá markampina, Edom markampin reyinakapax sarantapxäna. Ukampis paqallq uruw wasaranjam muytanipxañapäna, ukchañkamasti umapax pist'xänwa ejercitopatakisa, caballonakapatakisa.

10Ukat Israelan reyipax säna:

—Amuyatatxa Tatitjamakiw jiwas kimsa reyirux irpanistu moabita jaqinakan amparapar katuyañataki —sasa.

11Josafat reyisti jiskt'änwa:

—¿Janit aka chiqan Tatitun profetapax utjkpacha, jupa tuqi Tatitur jiskt'añasataki? —sasa.

Ukatsti Israel reyin mayni yanapiripaw ukxar säna:

—Aka jak'ankiw Safat chachan Eliseo yuqapaxa, jupax Eliasan yanapiripänwa —sasa.

12Ukxarusti Josafat reyiw sarakïna:

—Tatitux jupa tuqiw parlistani —sasa.

Ukspachaw Israelan reyipampi, Josafat reyimpi, Edomankir reyimpix Eliseon ukar sarapxäna;

13ukampis Eliseox Israelan reyipar sänwa:

—¿Nayan kuna lurañaxarak jumamp utjisti? Awkinakaman profetanakapar jiskt'asir saram —sasa.

Israelan reyipasti saskakïnwa:

—Janiwa, Tatituw nanak kimsa reyirux irpanipxitu, moabitanakan amparapar jalt'añanakaxataki —sasa.

14Ukat Eliseox säna:

—Nayax taqi ch'aman Tatit laykuw juramento lurta, jupas uñjaskarakituwa, janitix Judá uraqinkir Josafat reyir yäqkirista ukaxa, janiw nayax ist'kirismati, uñkatkirismasa.

15¡Ukhamax, arpa toct'ir jaqi irptanirapipxita! —sasa.

Ukatsti kunapachatix arpa toct'iri jaqix toct'añ qalltaskän ukkhaxa, Tatitun ch'amapaw Eliseo profetxar jutäna,

16Eliseosti sänwa:

—Tatitux akham siwa: “Aka qhirwan walja q'awanak lurapxam,

17janis thayax utjkchini, janirak jallu purxatirsa uñjapkchïta ukasa, aka qhirwax uman phuqhantataw uñjasini, jumanakasti taqpachaniw umt'apxäta, ukhamarak caballonakamasa, khumuñ uywanakamasa.

18Akasti kuntix Tatitux lurkaspa ukat mä jisk'a uñacht'äwikiwa, ukhamarus jupax moabita jaqinakxa jumanakan amparanakamaruw katuyapxätam,

19jumanakasti suma uyuchrantat markanakaru, wali aytat markanakaruw t'unjapxäta, ukatsti muxsa achunakan quqanaksa taqpach phat'anukupxäta, taqi uma jalsunaksa llupantapxätawa, yapuchañ uraqinaksa qalanakampiw phuqhantapxarakïta” —sasa.

20Ukasti ukhamapunïnwa, qhipärmanthisti willjta waxt'äwi luqtañäki ukkhaxa, Edom tuqit umax mantanïna, uka umasti taqi uka uraqi phuqhantäna.

21Ukchañkamasti moabita jaqinakax reyinakan jupanakar katuntir jutasipkatap yatipxatayna, ukat jupanakax nuwasirjamäpki uka waynanakampiru, chachanakampiruw jawsthapiyapxäna, ukatsti jupanakax marka qurpan wakichrantasipxäna.

22Qhipärmanthi willjtasti, intix umxaruw qhant'anïna, moabita jaqinakasti jayatxa, wila uma uñjapxäna, jaqi wilar uñtata.

23Ukat sapxäna: “Ukax wilarakisä. Reyinakax jupanakpachaw nuwasipxpacha, ukatsti maynit mayniruw tukjasipxarakpacha. ¡Moabita jaqinaka, jichhax sarañäni kunanaktix jupanakax apanukuwayapki ukanak katuntasiniñäni!” sasa.

24Ukampis moabitanakax israelitanakan campamentopar mantapkäna ukkhasti, israelitanakax sartasin jupanakar nuwantapxäna. Moabitanakax jaltxapxänwa, ukampis israelitanakax jupanakar arktasin jiwarayapxäna.

25Ukxarusti markanak t'unjapxäna, yapuchañ uraqinakxa qalanakampiw phuqhantapxäna, uma jalsunaksa taqpach llupantapxäna, muxsa achun quqanaksa taqpach phat'anukupxäna. Quir-haréset sat markaki jan tukjapkänti, uka markaru q'urawampi q'urawasiri jaqinaka katuntapxatap layku.

26Moab markan reyipasti nuwasïwin aynacht'at amuyasisinxa, Edom reyir katuntiriw saräna, ukatakisti espadanakani paqallqu pataka soldadonak irpasïna; ukampis jan jupar atipjirjamäsaxa,

27jilïr yuqaparuw marka pirqakam irpsüna, ukawjan jupar jiwayäna, ukatsti diosaparu nakt'ayat waxt'äkaspas ukham nakhantayäna. Uka yuqapax jupa qhipat reyïñapänwa. Uk uñjasasti, israelitanakax axsarayasipxänwa, ukat jupanakax uka marka jaytasin uraqipar kutt'xapxäna.