SANTIAGO 1 - Qullan Arunaka DC

Arunta

1Naya Santiago, Jesucristo Tatitu Diosan luqtiripa, Israelan tunka payan ayllunakaparu, aka uraqpachan ch'iqitatatäpki ukanakaruw aruntanipxsma.

Yant'anakan ch'amañchasiñxata

2Munat jilatanakaxa, jumanakax kunayman yant'anakan jikxatasipkät ukkhax kusisipxam.

3Niy yatxapxtawa, iyawsañamatix yant'atäni ukkhaxa, jumanakax ch'amampi sayt'asiñ yatiqapxta.

4Ukampis uka ch'amañchäwix aski lurañaru, phuqhat jiltañar puriypan, ukat jan kunas pist'añapataki.

5Jumanakat maynintix yatiñ kankañapax jan utjkchi ukaxa, Diosat mayispan, jupasti churaniwa; Diosax jilarkiri, jan kun kamsasaw taqinir churi.

6Ukampis taqi iyawsañampiw mayiñapa, jan akch'as pächasisa; pächasirix quta mathapimpi sasiwa, thayas uksar aksaruw apani.

7Ukhamax khititix pächasiski ukax janiw kunsa Tatitut katuqkaspati,

8jupax jichhürux may amti, qharürusti yaqharaki, janiw jakäwipan may arsur jaqïkiti.

9Jan yäqat jilatax Diosan jach'ar aptatätapat jach'añchasiñapa;

10qamir jaqisti aynacht'atapat jach'añchasiñaparaki. Qamirïñax qura panqarampi sasiwa, janiw wiñayäkiti.

11Kunapachatix intix jalsusin wal lupt'anki ukkhaxa, uka alix wañsuwa, panqaras willirtarakiwa, ukatsti suma uñnaqapas tukusiwa. Qamir jaqix ukhamarakiw luräwinakapampi chik tukusini.

12Yant'ar ch'amampi atipjir jaqix kusisiñaniwa, yant'ar atipjirix jakañ pillu waxt'äwjam katuqani, Diosax jupar munirinakar churañatakiw arsuwayi.

13Maynitix jan wali lurañatak yant'at uñjaschi ukkhaxa, janiy siskpanti “Diosaw yant'itu” sasaxa, Diosax janiw khitir jan wal lurañatakis yant'atäkaspati, janirakiw khitirus yant'kiti.

14Jan ukasti, maynix ñanqha amtäwinakaparjamaw yant'at uñjasi, ukampiw katuntayasi sallqjayasiraki.

15Uka ñanqha amtäwinakat juchax sarti, jucha luratatsti tukuyarux jiwañ utjayi.

16Munat jilatanakaxa, jan pantjasipxamti.

17Kunatix askïki, chiqäki ukax alaxpachankir Diosat juti, jupax alaxpachankir warawaranak lurawayi. Diosax pachpakïskiwa, jupansti janiw mayjt'añasa, ch'amakt'añas utjkiti.

18Jupax ukham munatap laykux jiwasarux chiqa arunakap tuqiw jakañ churistu, jupan luräwipan nayrïr achupäñasataki.

Diosan aruparjam phuqhañxata

19Munat jilatanaka, akanak amtapxam: taqi jumanakasti ist'añatakix jank'akïpxam; ukatsipana, parlañatakisa, thithiñatakis k'achakïpxam.

20Thithit jaqisti kunatix Diosatak askïki uk janiw lurkiti.

21Ukhamasti, jumanakax q'añu lurañanak apanukupxam, jan wali lurañax utjki ukanak apanukupxarakim, ukatsti kuna arunakatix chuymanakaman yapuchatäki uka arunak llamp'u chuymampi katuqapxam, uka yatiyäwi arusti jumanakar qhispiyañatakix ch'amaniwa.

22Ukampis jan aliq isch'ukirinakakïpxamti, jan ukasti luririnakäpxam, jan lurapkät ukasti, jumanakpachakiw sallqjasisipkasma.

23Khititix aliqak uka arunak isch'ukki, ukat janirak lurkit ukaxa, kunjämtix mä jaqix ajanup espejot uñkataski ukhamakiwa:

24jupa pachpa uñkatt'asisax ukspachaw kunjämäkäntix uk armasxi.

25Ukatsipana, jumanakatix Diosan arunakap ist'apxäta, phuqhapxarakïtaxa, taqi luräwinakaman kusisitäpxäta. Diosan arupax askiwa, jumanakarusti juchat qhispiyapxtam.

26Maynitix Diosar sum arkatap amuyaschi ukatsti kuns parlaskakchi ukaxa, jupa pachpaw k'arintasiski, Diosar arkatapasti inamayakiwa.

27Dios Awkir q'uma chuymampi arkañax akanakawa: Wajchanakaru, ijmanakaru, llakitanakar yanapt'aña, ukatsti akapach q'añu lurañanakampix janirak q'añuchasiña ukawa.