OSEAS 10 - Qullan Arunaka DC

Israelan altaranakap t'unthapïwi

1Israelax walja achuni uva alir uñtat wali qamiriwa;

ukampis ukham tukutapatxa,

juk'ampikiw altaranak yaqha diosanakatak lurarasipxäna;

uraqipan juk'amp sumätapatsa,

juk'ampikiw yaqha diosanakatak

qala chutanakapsa lurasipxäna.

2Israelan chuymapax payar jaljtatawa,

jichhasti juchanakapat mutuyatarakïniwa.

Tatitux uka altaranakap t'unthapiniwa,

qullana qalanakapsa q'al tukjarakini.

3Jichhax aka markax saniwa:

“Tatitur jan axsartatasatxa,

jichhax janiw reyinïkxtanti.

Ukampis ¿kunarak mä reyisti jiwasatak luraspasti?

4Parlak parlaspaxa,

inamayakiw kunsa parlaskaspaxa,

arust'äwinaksa sutipampix qillqxataskaspawa;

ukampis chiqa kankañapax jiwayir alir uñtatakïspawa

kunjämatix uka alix yapu taypin jilki ukhama”.

5Samariankir jaqinakax khathatipxiwa;

Bet-avén chiqankir vaca qallu diosap chhaqhayasitapat jachapxi.

Uka vaca qallutjamaw jaqinakasa,

sacerdotenakas wararisipki,

jach'a kankañapan chhaqtatapata.

6Uka pachpa vaca qallux

Asiria markar jach'a reyir churañatak apatarakïniwa.

Israelasti ukham p'inqachjataw uñjasini;

uka yaqha diosapat p'inqasirakiniwa.

7Samaria markankir reyix

kunjämatix mä jisk'a lawax uman apatax uñjaski

ukham chhaqtayatäniwa.

8Yaqha diosanakar yupaychañ utanakapas t'unjatawa,

Israel markasti uka chiqanakan jucha luränxa.

Altaranakapansti ch'aphinakakiw jilantxani,

jaqinakasti qullunakarux: “¡Imantapxita!” sapxaniwa,

jisk'a qullunakarusti: “¡Nanakxar allxattapxita!” sapxarakiniwa.Diosax Israel makaruw juchañchi

9Tatitux siwa:

“Israelax Guibeá chiqan jucha lurañ qalltkän ukkhatxa,

janiw jucha lurañap apanukkiti.

¡Pachpa juchanakapan sarnaqasipki!

Ukat jichhax jupanakan jan walïpxatapatxa

nuwasïwix pachpa Guibeá chiqan tukjani.

10Kunapachatix nayax munkä ukkhaw aka markarux mutuyä,

jan wali luratapat mutuykä ukkhaxa,

yaqha markanakasti jupatakiw sayt'asipxani.

11“Israelax mä suma yatichsut vaca qalljamänwa,

jupatakix trigo taksuñax sumapunïnwa.

Jichhasti nayax suma kunkapxarux

mä yuku ayxatarakta,

ukhamat qhulliñatak arma qatatiñapataki,

Judästi qhulliñ arma jiyt'ani,

Jacobusti uka qhullit k'upjarakini.

12Jupanakarusti saraktwa:

¡Tatitur thaqtañatak wakicht'asipxam!

Jumanakax mä machaq uraqjamäpxtawa;

uka uraqirux kunatix chiqäki uk yapuchapxam,

ukatsti munasiñarak apthapipxam.

Ukat Tatitux jumanakan ukar jutasin qhispiyapxätam;

kunjämatix jallux waña uraqir purxatasax ch'arant'ki ukhamäniwa.

13Ukampis jumanakax ñanqhak yapuchapxtaxa,

kunatix jan chiqäki ukakarak apthapipxtaxa,

k'ari achunakak manq'apxtaxa.

“Jumanakax nuwasiñar sarir carronakamaru,

walja soldadonakamar alkatapxatamatxa,

14jan walt'añanakakiw jumanak taypin utjani,

ukatsti taqi sayt'asiña pirqanakamasa tukjatäniwa,

kunjämatix Salmán reyix Bet-arbel markaru

uka nuwasiñ urun tukjkäna,

warminakarus wawanakapamppach jiwaraykarakïn ukhama.

15Betel markan utjasir jaqinaka,

jach'a ñanqhanak lurapxatamatxa,

uka pachparakiw jumanakampix lurasini.

¡Israel markan reyipasti, qhantatirux jiwatarakïniwa!