2 CRÓNICAS 21 - Qullan Arunaka DC

Joram reyin Judá marka apnaqatapa(2 R 8.16-24)

1Josafat reyix jiwxänwa, ukatsti David nayra awkipan markapan imt'atäxäna, jupa lantix Joram yuqapaw Judá marka apnaqxäna.

2Joram chachan jilanakapa, Josafat chachan wawanakapax akanakänwa: Azarías, Jehiel, Zacarías, Micael, Sefatías jupanaka. Taqi jupanakasti Judá uraqi apnaqir Josafat reyin wawanakapänwa.

3Jupanakarusti awkipax qurita, qullqit lurat yänaka, yaqha jila alani yänakamp churatayna. Ukatsti Judá uraqinxa sayt'asiñatak uyuchrantat markanak churarakïna, ukampisa, marka apnaqañapsti Joram yuqaparuw katuyäna, jilïri yuqapätap layku.

4Awkipan reyi qunuñapar qunt'asxasinxa, Joram chachax wali ch'amaniw tukxäna, ukatsti taqi jilanakaparuw cuchillompkama jiwarayäna, ukhamarak Israelan yaqhip jilïri irpirinakarusa.

5Marka apnaqañ qalltkäna ukkhasti, jupax kimsa tunka payan maranïnwa, ukatsti Jerusalén markan kimsaqallqu maraw marka apnaqäna.

6Ukampis jupax kunjämtix Israelan reyinakapasa, Ahab chachat saraqir wawanakapas sarnaqapkän ukanakan thakhipa arkäna, warmipax Ahab chachat saraqirïnwa; ukhamïpansti jupan luräwinakapax Tatit nayraqatan janiw askïkänti.

7Tatitusti Davidan wila masinakapan marka apnaqañap janiw tukjañ munkänti, Davidampi mä arust'äwi luratap layku, juparusa, wawanakaparusa jupanakan marka apnaqañapatakiw arsüna.

8Joram reyix marka apnaqkäna ukkhasti, Edom markax Judá markatakiw sayt'asïna, ukatsti jupanak taypit mä reyi utt'ayasipxäna.

9Ukatsti Joram reyix jilïri capitananakapampi, taqpach nuwasiñ carronakapampiw saräna, uka arumax jupampi, nuwasiñ carronakan jilïrinakapampix, sartasisin jupanakar muyuntapkatayna uka edomita jaqinakaruw nuwantapxäna.

10Ukampis Edom markax Judá markampi apnaqayasiñat jichhürkamaw yaqhachasxi. Uka urunakansti Libná markax yaqhachasxarakïnwa, Joram reyin Tatitur apanukutapata, nayra awkinakapan Diosapat armasitap layku.

11Ukxarusti Joram reyix Judá qullu patanakanxa yaqha diosanakar yupaychañ utanak lurayäna, jupaw Jerusalenankir jaqinakan Tatitur jan sum arkañapatakix juchanïna, Judá markarux maysaruw saranukuyäna.

12Ukapachasti Joram reyix Elías profetat mä qillqat katuqäna, uka qillqatansti akham sänwa: “David nayra awkiman Tatit Diosapax sistamwa: ‘Jumax janiw Josafat awkiman sarnaqäwiparjama, janirakiw Judá markan Asá reyipan sarnaqäwiparjamas sarnaqktati,

13jan ukasti, jumax Israelan reyinakapan sarnaqäwiparjamakiw sarnaqtaxa, jumaw Judá, Jerusalén markankir jaqinakan Tatitumpi jan sum sarnaqañapatakix juchanïtaxa, Ahab chachan wila masinakapax lurki ukhama. Ukxarusti jumax jilanakamaruw jiwaraytaxa, jupanakax jumat sipan juk'amp sum sarnaqapxäna.

14Ukat Tatitux markamarusa, wawanakamarusa, warminakamarusa walpun mutuyani, imat yänakamsa apt'asirakïtawa.

15Jumarux kunayman usunakampiw usuntayätam. Jumax purak usumpix jiphillanaksa qutstayasiñkamaw usuntäta’ ” sasa.

16Ukasti ukhamapuniw lurasïna. Tatitux filisteonakampi, árabe jaqinakampi, etíope jaqinak jak'an utjasirinakampiw Joram reyirux uñisisiyäna;

17jupanakasti Judá uraqir sarasax ch'amampiw mantaranttapxäna, ukatsti reyi utan kuna yänaktix jikxatapkän ukanak q'al apasipxäna, ukhamarak wawanakaparusa, warminakaparusa. Joacaz sat sullka wawapakiw qhiparäna.

18Uka qhipatsti, Tatitux mä jan qullkay purak usumpiw juparux mutuyäna.

19Urunakax jalaskakïnwa, ukat pä mararusti, uka usup laykux jiphillanakapax mistxapunïnwa, ukatsti wali t'aqhisisaw jiwxäna. Markapax janiw sutip amtasin ninsa aqtaykänti, kunjämtix nayra awkinakapampi lurapkatayna ukhama.

20Joram chachax kimsa tunka payan maranïkän ukkhaw marka apnaqañ qalltäna, ukatsti Jerusalén markan kimsaqallq maraw marka apnaqäna. Jupan jiwxatapatsti janiw khiti jachiris utjkänti. Amayapxa Davidan Markaparuw imt'apxäna, janiw reyinakan imäwinakap jak'ar imapkänti.