1Tatitun arunakapa, Amón markataki:
“¿Kawkinkis Israel markan wawanakapaxa?
¿Kawkinkis tuti katuqirinakapaxa?
¿Kunatsa jichhax Gad uraqix Milcom sat diosankxi?
¿Kunatsa amonitanakax Gad uraqin markanakapan jakapxi?
2“Jichhax walikiwa, Naya, Tatituw arsta:
Amón uraqinkir Rabá markan
nuwasiñ art'asïwi ist'añap urux purininiwa;
mayjar apthapit t'unjamaw tukuni,
markanakapansti ninaw nakharakini.
Ukapachaw Israelax markanakap
wasitat tumpasxani.
Naya, Tatituw uk arsta.
3“Hesbón marka, Ai markan t'unjatätapat jacham.
¡Rabá markankir warminaka, jach'at wararipxam!
¡Chhankha isimpi isthapisipxam,
chuymanakam liq'isipxam!
¡Luqhinakar uñtat jalanaqapxam,
janchinakamsti chhuxriñchjasipxarakim!
Milcom diosax jaya markar apatäniwa,
sacerdotenakapampi, jupan jilïr jaqinakampi chika.
4¿Kunatsa ch'amamat wali jach'achasta?
Nayatak sayt'asir marka, ch'amamax tukusxiwa,
kuna qamir yänaktix apthapkta ukaruw alkatastaxa,
ukatsti saraktawa: ‘¿Khitis nayarux nuwantitaspa?’ sasa.
5Jichhax walikiwa, nayaw jumxarux
jan walt'añanak taqi tuqit apayanï.
Naya, taqi ch'aman Tatituw uk arsta.
Jumanakasti aka chiqat jaqunukutaw uñjasipxäta,
janirakiw jaltxirinakar khiti tantacht'iris utjkxaniti.
6Ukampisa taqi ukanak qhipatsti,
amonitanakan sarnaqäwinakapxa sumaruw tukuyxarakï.
Naya, Tatituw uk arsta.”Edom markatak profecía arunaka
7Edom markataki taqi ch'amani Tatitun arunakapa:
“¡Yatiñan jaqinakax janiw Temán markan utjkxiti!
Janiw maynis utjkxiti.
Yatiñ kankañax tukusiwayxiwa,
janirakiw khiti iwxt'iris utjkxiti.
8¡Dedán markankir jaqinaka,
jalakamak imantasir sarxapxam!
Edom markarusti t'unjarakïwa;
nayan uka markar mutuyañ urusti purinxiwa.
9Uva achunak apthapirinakax,
mä qawqha uva wayunakxa
jan kunaninakatakix jaytawäpxapuniwa.
Arum tuqiru mantiri lunthatanakax,
kuntix munapki ukak apasipxaraki.
10Ukampis nayax Edom markar jan kunan jaytä,
imantasiñanakapsa katjäwa,
janirakiw imantasirjamäpkaniti.
Wawanakapasa, wila masinakapasa,
uta jak'anakapasa, taqiniw jiwarapxani;
janiw maynis qhiparkxaniti akham sañatakixa:
11‘Uka wajchanakamxa nayar jaytita,
nayaw jupanakar uñjaskä;
ijma warminakamsa nayaw uñjaskä’ ” sasa.
12Tatitux siwa: “Khitinakatix mutuyäwi jan katuqañapäkasin mutuñapa mallt'apxchi ukkhasti, jumax janiw jan mutuyatax qhiparkätati, jan ukasti mutuyäwim katuqapunïtawa.
13Naya, Tatituw juramentompi uk arsta: Bosrá markasti ch'usa wasarar tukuyataw uñjasini, q'ala t'unjata, jaqinsa uñtkañ jisk'achjata, ñanqhachjataw uñjasini, yaqha markanakasti, wiñayatak t'unjataw uñjasirakini” sasa.
14Tatitut mä yatiyäwi katuqta;
mä yatiyiriw markanak taypin yatiyaski:
“¡Tantacht'asipxam,
Edom tuqir sarantapxam!
¡Nuwantasiñatak wakicht'asipxam!
15Edom, nayasti taqi markanakat sipansa
wali jisk'aruw tukuyäma,
jaqinak taypinsa
wali jisk'achjat markaruw tukuyäma.
16Jach'a jach'a tukutamampi,
axsarkañ uñacht'ayatamampiw sallqjayastaxa.
Qarqa p'iyanak taypin jaktaxa,
qullu patanakat waythapisisaraki.
Ukampis pakar uñtatasay
alay chiqan tapachasiskam,
ukatpach jumarux jaquqanïma.
Naya, Tatituw uk arsta.
17“Edom markan t'unjatäñapax axsarkañ wali jach'äniwa. Taqi khitinakatix uka chiqa sarakipapkani ukanakasti, uka mutuyäwip uñjasax wal mulljasipxani,
18Sodoma, Gomorra, ukhamarak uka jak'ankir markanakjam t'unjatäniwa. Janirakiw khitis uka markanakan utjaskaniti. Naya, Tatituw uk arsta.
19Edom marka, jan kamsasakiw jumarux nuwantäma, kunjämatix leonax akatjamat khitirus thuqxatkix ukhama. Nayaw uñisirim ajllï, mä juk'a pachanaki jumar atipjañapataki. Janiw yaqha Diosax nayjam utjkiti, janiw khitis nayar saykatirix utjkiti, janirakiw kawkïr awatiris nayarux saykatkitaspati.
20Ist'apxam kuntix naya, Tatitux Edom markatak amtkta uka, kunanaktix Temán markan jakirinakatakis amtkta uka. Q'axu waynanakasti taqpachan apatäpxaniwa, markapasti q'ala t'unjatarakïniwa.
21Edom markan liwisitapasti wali jach'at ist'asini, uraqis uk ist'asax khathatiniwa, yanap mayisaw arnaqasipxani, arnaqasitanakapas Mar Rojo sat qutakamaw ist'asirakini.
22Bosrá markarusti uñisiripax kunjämatix mä pakax chhiqha janatatas mä jisk'a animalar thuqxatkix ukhamaw thuqxatani, uka urusti Edom markankir nuwasir jaqinakasti, wawachasiñatak q'iwisir warminakjamaw khathatipxani.”
Damasco markat profecía arunaka23Damasco markatak arunaka:
“Hamat, Arpad markanakax wali p'inqasitäpxiwa,
jupanakax jan wali yatiyäwinak katuqapxi.
Jichhax axsarañampi phuqhantatäpxiwa,
janirakiw samart'añapax utjkiti.
24Damasco markasti
jan ch'amaniw jikxatasi,
jaltxañatakikiw wakicht'asxi.
Axsarañampi, llakisiñampi,
usuyasiñampi katuntatawa,
wawachasir warmirjama.
25Taqinin jach'at uñt'at markax,
kusisit markax, jichhax apanukutaw uñjasi.
26Uka urusti waynanakax
marka thakhinakan liwirtapxani,
nuwasïwin nuwasir jaqinakapasti
taqiniw jiwarapxarakini.
Naya, taqi ch'aman Tatituw uk arsta.
27Damasco markan pirqanakaparusti
ninampiw phichhantayä,
Ben-adad sat reyin utapsti
uka ninaw nakhantarakini.”
Quedar markampita, Hasor markampit profecía arunaka28Quedar ayllutaki, Hasor markankir jilïrinakataki, khitinakarutix Babilonia markankir Nabucodonosor reyix t'unjkän ukanakataki, Tatitun arunakapa:
“¡Babiloniankir soldadonaka,
Quedar markar nuwantapxam!
¡Uka inti jalsu tuqinkirinakar jiwarayapxam!
29Chhujllanakapsa, uywanakapsa,
taqi yänakapsa katuntasipxam.
Camellonakap aparapxam,
jach'at art'asin mulljapxam:
‘¡Taqi chiqansa axsarañakiw utjaski!’ sasa.
30¡Hasor markankirinaka,
jalakam mistunxapxam!
¡Imantasxapxam!
Naya, Tatituw uk arsta.
Babiloniankir Nabucodonosor reyisti,
jumanakar jan walt'ayañ amti.
31Naya, Tatituw uk mayipxsma:
¡Sartasipxam, uka markar nuwantapxam,
uka markax k'uchikiw jakasiski,
punkunakapas q'ala jist'arata,
sapakiw jikxatasiraki!
32¡Camellonakapsa,
taqi uywanakapsa lunthatjapxam!
Taqi tuqiruw jupanak ananukü,
p'iqi parapat ñik'ut murusir markarux;
taqi tuqit jupanakatakix
jan walt'añanak apayanï.
Naya, Tatituw uk arsta.
33Hasor markasti wiñayatak
ch'usa wasarar tukuyatäniwa,
qamaqinakan putuparakïniwa,
janipuniw khitis ukan jakañ munkaniti.”
Elam markatak profecía arunaka34Sedequiasax Judá marka apnaqañ qalltkän ukapachaw, Tatitux aka arunak Elam marka tuqit Jeremías profetarux parläna:
35“Naya, taqi ch'aman Tatituw arsta:
Elam markan ejercitoparuw tukjä,
soldadonakapasti nuwasiñatakix
suma wakicht'atäpxiwa,
ukampis nayaw jisk'a jisk'a tukjä.
36Pusi tuqitpach Elam markatakix
jach'a ejercitonak khithanï,
mä jach'a thayampjamaw
taqi tuqir ananukuyä;
janiw mä markas jilt'kaniti
kawkharutix elamitanakax
jan imantasipkaspa ukaru.
37Elam markarusti
jiwayir uñisirinakap nayraqatan khathatiyä,
t'aqhisiñanak juparux apayanï,
phiñasiñaxsti jupxaruw antutxatanï,
q'ala tukjatäpxañapatakix
nuwasiñanak jupanakxarux apayanï.
Naya, Tatituw uk arsta.
38Reyiparusa, jilïrinakaparusa q'al jiwarayä,
nayaw Elam markan reyipäyä.
Naya, Tatituw uk arsta.
39Ukampisa, akat qhiparux
Elam markan sarnaqäwip sumaruw tukuyarakï.
Naya, Tatituw uk arsta.”
Who We AreWhat We EelieveWhat We Do
2025 by iamachristian.org,Inc All rights reserved.
