DEUTERONOMIO 24 - Qullan Arunaka DC

Chacha warmi jaljtañxat kamachinaka

1Moisesasti jaljtañxat sänwa: “Mä jaqitix mä warmimpi jaqichasini, uka qhipat warmix jupatak jan walïkchi ukasti, warmirux jaljtañ qillqat churxani, ukatsti utapat khithanukxarakini.

2Uka warmisti uka utat sarxasax, yaqha chachampix jaqichasiskaspawa;

3qhipa chachapatix jupar kipkak jisk'achjani, ukat jaljtañ qillqat churxani, utapatsa khithanukxarakini, jan ukax uka qhipa chachapax jiwxarakini ukasti,

4nayrïr chachapax janiw uka warmimpi jaqichaskaspati, jupan jan q'umätap layku; ukham lurañasti Diosatakix axtaskayawa, jumanakax janiw jisk'achayapxätati Tatit Diosamax katuyapkätam uka uraqxa.

Yaqha kamachinakxata

5“Mä jaqitix jichhaki jaqichasiskchi ukaxa, janiw nuwasïwirux sarañapäkiti, janirakiw kuna yaqha luräwinakas uka marpacha wakt'añapäkiti; ukhamat uka urunakan utapankaskani warmipan kusisiñapataki.

6“Maynitix kuns mayt'asipxätam ukaxa, jan juparux uka mayt'atat piqañ qalap mayipxamti; ukham lurapxäta ukasti, jakañapan manq'sa apaqapkasma ukhamäspawa.

7“Mayni israelit jaqirutix jila masipar t'aqhisiyat uywatar tukuyañataki, jan ukax aljañatak imantaskir katjatäni ukasti, uka jaqirux jiwañapatakiw juchañchasini, ukhamat jumanak taypit ñanqha lurañanak tukjañataki.

8“Lepra usunak tuqitsti, sacerdotenakan yatichäwiparjamaw phuqhapxäta. Ukanaksti kunjämtix nayax jupanakar iwxawaykta ukhamarjamaw lurapxäta.

9Amtasipxam kuntix Tatit Diosamax Egipto markat mistunipkta ukapachax thakhin María kullakaxar lurkän ukata.

10“Jumanakatix jaqi masimar kuns mayt'apxäta ukkhax jan utaparu mantasin kuna yänakapsa uka manut aptasinipxamti.

11Uta punkupan suyt'apxam, jupaw kuna yänaksa jumar churañatak apsusinkani.

12Uka jaqitix pist'añan sarnaqaskchi, ukatsti jupan mä isipaki mayt'atamat churañatak utjchi ukasti, janiw mä arumas uka isipxa katxäsipxätati;

13jan ukasti, intis janïr jalantkipan churxapxäta, uka isipamp janxatasis ikxañapataki. Ukhamat jupax jumanakar yuspagarapxätam, uka luratamasti Tatit Diosam nayraqatan askïniwa.

14“Jumanakatix pist'añan jikxatasir jaqiru irnaqayasipxäta ukkhaxa, jan jumanakax juk'ampi ch'am tukuyapxamti, janirak irnaqatapat qullqi churañäki uksa katxäsipxamti, jumanakan israelita masimäpansa, jan ukax jaya markat jutir jaqïpansa.

15Ukürpachaw irnaqatapat qullqi churxapxäta, intin janïra jalantkipana; jupax pist'añan jikxatasir jaqiwa, manq'añ alasiñatakiw uka qullqi munaraki. Janitix ukham lurapkäta ukkhaxa, uka jaqix Diosaruw art'asini, jupasti jumanakarux juchañchapxätamwa.

16“Janiw awkimpi, taykampix wawanakapan jucha luratanakapat jiwayatäñatak juchañchatäkaniti, janirakiw wawanakas awkipana, taykapan jucha luratanakapat jiwayatäkaniti, jan ukasti sapaqat mayniw jucha luratap layku jiwañapatak juchañchat uñjasiskani.

17“Janiw yaqha markat jutir jaqinakarusa, wajchanakarus t'aqhisiyapxätati, janirakiw mayt'asir ijma warmitsa isipa apaqätati.

18Janipuniw jumanakax armasipxätati Egipto markan t'aqhisiyat jaqïpxatama, Tatit Diosamaw uka markat qhispiyanipxtam. Ukat jumanakar iwxapxsma taqi uka yatichäwinak phuqhapxañamataki.

19“Jumanakax yapunakamat apthapisipkät ukapachatix, mä pichu trigo aptawayañ armasipxäta ukaxa, janiw uka pichu aptir kuttapxätati; pachparuw jaytawayapxäta, pist'añan sarnaqir jaqinakataki, jumanak taypin jakasir jaya markat jutir jaqinakataki, wajchanakataki, ijma warminakataki, jupanakaw ukanak apthapisiskani; Tatit Diosamasti taqi lurañanakaman askimpiw phuqt'apxätam.

20“Olivo yapunakamat aceitunanak apthapipkät ukapachaxa, janiw layminakap taypi mayamp thaqsupxätati; qhiparkani uka achunakxa, jaya markat jutir jaqitaki, wajchataki, ijma warmitakiw jaytapxäta.

21“Uva yapumat uvanak apthapisipkät ukapachaxa, janiw layminakap taypi mayampi thaqsupxätati; qhiparkani uka uva achunakxa, jaya markat jutir jaqitaki, wajchataki, ijma warmitakiw jaytapxäta.

22Amtasipxapunim, jumanakax Egipto markan t'aqhisiyat jaqïpxayätawa, ukat nayax iwxapxsma taqi uka yatichäwinak phuqhapxañamataki.