SALMOS 68 - Qullan Arunaka DC

SALMO 68Israel markan atipjatapa 1 Davidan q'uchupa.

1 1 (2) Diosax sayt'aski ukapachaxa,

jupampi timasirinakax chhuktxapxiwa,

jupar uñisirinakax nayraqatapat jaltxapxiwa;

2 2 (3) jiwq'ir uñtataw chhaqtapxi,

ninampi umatatayat lik'jamaw umatatapxi;

ñanqha lurir jaqinakax Diosan nayraqatapan tukusipxi.

3 3 (4) Aski jaqinakasti kusisipxiwa;

Diosan nayraqatapan kusisipxi,

kusisiñat t'isktapxi.

4 4 (5) Diosar q'uchupxam,

sutipar jach'añchapxam;

qinay patan sarnaqirir jach'añchapxam.

¡Tatitump kusisipxam!

¡Nayraqatapan k'uchisipxam!

5 5 (6) Diosax wajchanakan awkipawa,

ijma warminakan arxatiripawa,

jupax qullan utjäwipan jaki.

6 6 (7) Diosax aynacht'at jaqinakatak uta wakicharapi,

katuntat jaqinakar antutayasin askinak churi;

qallasir jaqinakasti jan achur uraqin qhiparapxi.

7 7 (8) Diosaxay,

jumax markaman nayraqatap sarkäyäta,

wasar chiqanjam sarantkäyät ukapachaxa,

8 8 (9) uraqix khathatïnwa,

jallux alaxpachat purintäna,

Sinaí qullux Diosan nayraqatapan khathatïna;

Israelan Diosap nayraqatan axsaräna.

9 9 (10) Diosaxay,

jumaw walja jallunak apayantaxa;

markamax q'ala aynacht'atänwa,

ukampis jumaw ch'am churtaxa.

10 10 (11) Markamax uka uraqin utjantasïna,

juman munasiñam laykuw

jan kunan jaqirux wakisirinak churtaxa.

11 11 (12) Tatituw mä yatiyäw arsu;

walja warminakaw ukxat yatiyapxäna:

12 12 (13) “¡Reyinakampi, nuwasir tamanakapampix jaltxapxiwa!” sasa.

Warminakax utanakapan katuntat yänak jalanuqasipxäna,

uñisirinakat aparapkatayna uka yänaka,

13 13 (14) ukampis jumanakax

uywa uyunakan qhiparapxtaxa.

¡Qullqimpi llusikipata paloma chhiqhanaka!

¡suma qurimpi apakipata phuyunakapa!

14 14 (15) Taqi Munañanix,

reyinakar chhukjaykäna ukkhax,

khunux Salmón qulluruw khununtäna.

15 15 (16) ¡Basán qullunakax wali jach'anakawa,

qullunakapax wali qhathanakawa!

16 16 (17) Jach'a qullunaka,

¿kunatarak uñisiñampi

Diosan utjasiñapatak ajllit qullur uñch'ukipxtasti?

¡Tatitux uka qullun wiñayatakiw jakani!

17 17 (18) Diosan nuwasiñ carronakapax waranqanakawa;

Diosax Sinaí qullut ukanakxat utapar jutanti.

18 18 (19) Diosay, alay qullunakaruw makhattaxa,

katuntat jaqinak ukarux irptaxa;

jaqinak taypin jach'añchatäñ katuqtaxa,

Tatay, jumar qallkatir jaqinakamppachaw

jumar makhatxapxtam.

19 19 (20) ¡Tatitux jach'añchatäpan,

jiwasan Diosasaru, Qhispiyirisaru,

jupax sapüruw jan walt'añanakas apaski!

20 20 (21) Diosasax qhispiyir Diosawa,

jupaw jiwañat qhispiyistaspa.

21 21 (22) Diosax uñisirinakapan p'iqip jaljtayani,

juch lurasipkaki uka jaqinakan p'iqi ch'akhap t'unjani.

22 22 (23) Tatitux siwa:

“Basán uraqitpach kutiyanxäma,

lamar quta manqhatpach irpsunxäma,

23 23 (24) timasirinakaman wilapampiw

kayum ch'aranachasïta,

anunakamasti uka wil jallq'apxarakini” sasa.

24 24 (25) Diosay, jumar waqaychirinakaw uñstasinki,

qullan chiqawja tuqiruw sarantasipki.

Diosaxan, Reyixan waqaychirinakapawa.

25 25 (26) Q'uchurinakax nayraqat sarantapxi,

arpa jachsuyirinakasti qhipat arkapxi,

chika taypinsti tawaqunakaw

chhullu chhullunakampi sarantapxi.

26 26 (27) ¡Tatit Diosar kusisiñampi jach'añchapxam,

Israel markpach tantachat jupar yupaychpan!

27 27 (28) Jupanakan nayraqatapsti,

sullkïr Benjaminaw sarantaski,

Judá markankir jilïrinakampi chikaw sarantaski,

Zabulón, Neftalí markanakan jilïrinakapamp chikaw sarantaraki.

28 28 (29) Diosaxay, ch'amam uñacht'ayam;

nanak layku luratam wasitat qhanañcham.

29 29 (31) Jerusalenankir utamatpacha,

kawkharutix reyinakax jumataki churäwinak apanipki,

30 30 (31) ukawjatpach Egipto markar tuqinuqam,

khä ch'uxña taypinkir animalaru,

khä waxrasir urqu vaca tamanakaru,

khä muqisir vaca qallunakaru,

jupanakax juk'ampi qamiriptañ munasinxa,

markanakar jisk'achasaw t'aqhisiyapxi;

¡nuwasiñ munir jaqinakar chhukhunukuyam!

31 31 (32) Munañan jaqinakax Egiptot purinipxani,

Etiopía markax Diosatakiw amparanakap luqtapxani.

32 32 (33) ¡Uraqinkir reyinaka, Diosar q'uchupxam.

Tatitutak q'uchunak q'uchupxam,

33 33 (34) alaxpachanjam sarnaqiriru,

wiñay alaxpachan utjasiriru!

Ch'aman arupampi arnaqasir ist'apxam.

34 34 (35) Diosan ch'amap uñt'apxam:

qhapaq kankañapax Israel markan uñsti,

ch'amapasti alaxpachkamaw puriraki.

35 35 (36) Diosax qullan utapan muspharkayapuniwa;

jupaw Israelan Diosapaxa,

jupaw markaparux ch'am churi.

¡Diosax jach'añchatäpan!