PROVERBIOS 24 - Qullan Arunaka DC

- 19 -

1Ñanqha jaqinakar jan uñch'ukimti,

jupanakamp chika sarnaqañsa janirak munamti,

2jupanakax ch'axwañanakatak lup'isipki,

jan wali lurañanakatak parlasipkaraki.- 20 -

3Utax yatiñ kankañampi luratawa,

qallta qalapas ch'ikhi kankañampi uchatawa;

4uta manqhinakaparux aski kankañampi phuqhantatawa,

jila alan munkañ yänakampi.

- 21 -

5Yatiñan jaqix ch'aman jaqit sipan, askiwa;

ch'amanïñat sipansa, yatiñ kankañanïñaw juk'amp askixa,

6nuwasïwix suma amuyt'ampi nuwasiñaw wakisi,

atipjañatakisti walja iwxirinakar ist'añaw wakisi.

- 22 -

7Jan amuyt'asir jaqix taripirinak nayraqatanxa,

janiw kun arsuñsa yatkiti,

yatiñ kankañax jupatakix janiw jikxatañjamäkiti.

- 23 -

8Jan walinak lup'ir jaqix

“Jan wali amtir jaqit” uñt'atawa.

9Jan amuyt'asir jaqin amuyupax jucha lurañakiwa;

¡jan yäqasir jaqix, taqinin uñisitawa!

- 24 -

10Jan walt'añan uñjasisatix mayjt'asïta ukapachaxa,

jan ch'amanïtam uñacht'aytaxa.

- 25 -

11Jiwañatak juchañchata jaqinakar qhispiyam;

jiwañ chijin uñjasirinakar qhispiyam.

12“Janiw kuns yatkäyätti” siskäta ukasa,

Tatitux chuymam uñt'iwa,

jupasti sapa mayniruw lurataparjam churani.- 26 -

13Munat wawaxay, misk'i manq'asim;

mallt'am misk'ix lakatak muxsawa.

14Jumatakix yatiñ kankañasa,

uñt'añ kankañasa, ukham misk'ïniwa;

jumatix ukanak jikxatätaxa, qhipa urunakamax sumäniwa,

amtäwinakamasti phuqhasiniwa.

- 27 -

15Aski jaqitakix sipitanak jan wakicharapimti,

janirak jakasiñ utaparus jan walinak luraraqamti,

16aski jaqix paqallq kutis aynacht'kanixa, kutjtaskakiniwa,

ñanqha lurir jaqisti jan walt'añapan aynacht'ani.- 28 -

17Uñisiriman aynacht'atapat, jan kusisimti,

chijir puritapatsa janirak chuymamax k'uchispati,

18ukham luratamax janiw Tatitutak sumäkaniti,

q'apisiñapasti jumxaruw purini.

- 29 -

19Ñanqha lurir jaqinak laykux jan mayjt'asimti,

janirak qhuru jaqinakar uñch'ukimti,

20ñanqha lurir jaqix janiw suma tukuyäwi jikxatkaniti;

¡ñanqha lurir jaqix micha qhanar uñtataw jiwt'awayxani!- 30 -

21Munat wawaxay,

Diosampitaki, reyimpitakix axsartañ chuymanïma;

uñisirinakamampix jan mayachasimti,

22jupanakan tukusiñapax akatjamat purinini,

janiw khitis yatkiti kuna mutuyäwtix Diosampi, reyimpi churkaspa ukxa.

V. PUSÏR CHHIJLLATA: “YATIÑAN JAQINAKAN YAQHA SÄWI ARUNAKAPA”(24.23-34)

23Aka arunakax yatiñan jaqinakan säwi arunakaparakiwa:

Taripirinakax taqinirus chiqapar uñjapxañapawa,

janiw maynitak arxatasipxañapax walikäniti

24Taripiritix juchan jaqir sani: “Janiw juchanïktati” sasaxa,

jupax jaqinakan ñanqhachataw uñjasini,

markanakas uñisirakiniwa.

25Ukampis juchanir juchap uñt'asiyirinakax,

kusisitaw jakapxani.

26Chiqap arunakamp arusxatir jaqix,

lakatsa suma jamp'atkaspa ukhamawa.

27Anqan lurañanakamäk ukxa tukuyam,

pampan lurañanakamäki uksti luram,

ukat utam utachasiskäta.

28Jan amanut masimar k'arintañatak sayt'amti,

janirak k'ari arunak qhanañchamti.

29Janipun kunapachas phuqsusiñ lup'imti,

ukhamat ukham maynir lurasa.

30Jayra jaqin yapup jak'a sarakipawayta,

pisi amuyt'a jaqin uva yapup jak'a sarta,

31yapupax ch'aphinakampi chhaqhantayatawa,

qala uyupas liju lluxinuqatawa.

32Ukham uñjasaw chuymaxan lup'ista;

uk uñjasinsti aka yatichäwi yatiqta:

33jumax ikt'asiskätawa, iki ch'awaskarakïta,

amparanakamsa sum ikt'añatak qhumxarusiskäta,

34ukchañkamasti jan kunan uñjasiñax

akatjamat purinini,

mä muyuyku jaqir uñtataw katuntätam.