JONÁS 2 - Qullan Arunaka DC

Jonás chachan Diosar mayisitapa

1 1 (2) Jonás chachax, chawlla purak manqhatpach Tatit Diosaparux mayisïna,

2 2 (3) akham sasa:

“Tatay, llakisiñaxan jumar art'asinsma,

jumasti jaysistawa.

Jiwañ manqhatpach jumar art'asinsma,

jumasti ist'istawa.

3 3 (4) Quta manqharuw jaquntista,

umasti uksat aksat chhaqtayitu.

Jach'a mathapinakas

q'al chhaqtayitu.

4 4 (5) Juman nayraqatamat jaqunukut amuyasta,

ukatsti sarakiyätwa:

‘Janipuniy Tatitun Qullan Utap uñjkxchïti’ sasa.

5 5 (6) Umanakasti chhaqtayituwa;

jach'a qutasti muyuntituwa,

chankunakas p'iqixaruw pixturantti.

6 6 (7) Quta manqhan qullunakax qalltki ukkhakamaw jalantta;

mik'ayasti wiñayatakis katuntkitaspa ukham amuyasta.

Ukampis juma, Tatitu Diosaxaw

jiwañat qhispiyista.

7 7 (8) Niya jiwañampïkasin

juma Tatitu Diosat amtasta,

mayisitaxax Qullan Utamkamaw purini.

8 8 (9) Yaqha diosanakar arkir jaqinakax

janiw jumatakjamäkxapxiti;

9 9 (10) ukampis nayax, yuspagarañ arumpiw

wilañchanak luqtäma;

arsutanakaxsti phuqharakïmawa.

¡Jumakiw qhispiyañatak ch'amanïtaxa!” sasa.

10 10 (11) Ukatsti Tatitux chawllaruw mayïna Jonasar waña uraqir waq'sxañapataki.