1Filisteonakasti Afec sat chiqaruw jaqinakap tantacht'äna, ukchañkamasti israelitanakax Jezreel chiqankir uma jalsu jak'aruw utjnuqtapxäna.
2Kunapachatix filisteonakan jilïrinakapax walja soldado tamanakampi sarantasipkän ukapachasti, Davidampi jaqinakapampix Aquís reyimpi chikt'ataw qhipat sarantapxäna.
3Ukatsti filisteonakan jilïrinakapax Aquís reyiruw jiskt'apxäna:
—¿Kunsa aka hebreo jaqinakax akan lurapxi? —sasa.
Aquís reyisti sarakïnwa:
—Jupax Davidawa, Israel markan Saúl reyin jilïr yanapiripänwa. Jupasti niya mä qawqha maranakaw nayampi chikaraki, ukatsti kunüruttix nayampïki ukkhat jichhakamax janiw kuna jan walsa jupan jikxatkti —sasa.
4Ukampisa filisteonakan jilïrinakapax Aquís reyitakix thithitäpxänwa, ukat sapxarakïna:
—Jichhax juparux samaya, jaqinakapamp chika markapar sarxpan, jan jiwasamp chik nuwasir sarkpati, inampisa nuwasïwin jiwasar kutxatistaspa. ¡Jupax Saúl reyimpi munayasiñ laykuxa, soldadonakasarus jiwayakispawa!
5¡Jupasti pachpa Davidawa, khitittix thuqt'asis jayllipkäna akham sasa: “Saúl reyix waranqa jaqinak jiwarayi, Davidasti tunka waranqa jaqinak jiwarayi”! —sasa.
6Ukapachaw Aquís reyix Davidar jawsayäna, ukatsti sänwa:
—¡Chiqpachansa, Tatitux jakaskiwa, jumasti chiqa jaqipunïtawa! Campamenton sarnaqatamasti chuymaxar purt'kiriwa. Jumax nayar uñjiri jutkta ukkhat jichhürkamax janiw kuna jan wali luratamsa jikxatkti. Ukampis filisteonakan jilïrinakapax janiw jumaru uñjañ munapktamti,
7ukhamax jichhax sumak kutt'awayxam, jupanakan jan mayjt'asipxañapatakisti janirak kuna jan walsa luramti —sasa.
8Davidasti sarakïnwa:
—¿Kunsa nayax lurtxa? Jumasti munañan rey, taqi aka maranakan ¿kunch uñjistaxa, ukhamat uñisirinakamampi jan nuwasiñaxatakisti? —sasa.
9Aquís reyisti sänwa:
—Chiqpachansa jumax Tatitun angelapäkasmas ukham wali suma jaqïtawa, ukampis filisteonakan jilïrinakapax janiw juman nanakamp chika nuwasir mantañam munapkiti.
10Ukhamasti, jumasa, jumamp chika jutapki uka yanapirinakamasa, qharürux niya qhanjtankipan kutt'awayxapxäta —sasa.
11Ukhamasti, Davidampi jaqinakapampix, qhipüru willjtax filisteonakan uraqiparuw kuttanxapxäna, ukchañkamasti filisteonakax Jezreel tuqirux sarantasipkakïnwa.
Who We AreWhat We EelieveWhat We Do
2025 by iamachristian.org,Inc All rights reserved.
