ÉXODO 14 - Qullan Arunaka DC

Israelitanakax Mar Rojo sat quta makhatapxi

1Tatitux Moisesar sänwa:

2“Israelitanakar akham yatiyam: kuttanipxpan ukatsti Pi-hahirot sat chiqa uñkatasir purintapxpan, Migdol chiqampi, qutampi mayachaski uka taypiru, Baal-sefón chiqa uñkatasiru.

3Ukhamat faraonax akham sani: ‘Israelitanakax janiw kawksar sarirjamäpkisa, chhaqtataw wasaran sarnaqasipki’ sasa.

4Ukampis nayaw faraonarux chuymap qalarayä, ukat jumanakar arktanipxätam; nayasti jupampiru, taqpach ejercitopampiruw ch'amax uñacht'ayä. Ukhamat egipcionakax yatipxani nayan Tatitütaxa” sasa.

Israelitanakasti kunjämtix Tatitux siskatayna ukham lurapxäna.

5Egiptonkir reyix israelitanakan jaltxapxatap yatisinxa, jupasa, yanapirinakapas israelitanakar khithanukupxatapat amthapisipxäna, ukat sapxarakïna: “¡Kuns lurtan, janik israelitanakar mistuykasänti! Jichhasti, ¿khitirak jiwasanakatak irnaqarapistanisti?” sasa.

6Ukatsti faraonax ukspachaw carrop wakicht'ayasïna, ukatsti ejercitoparuw jupamp chik irpxarüna.

7Egipton utjir taqpach carronakat suxta patak suma carronak ajlliyäna, sapa mayni jilïrinakasti mä carrot sarapxäna.

8Tatitusti faraonarux chuymap qalarayäna, ukhamat israelitanakar arktañapataki, israelitanakax wali ch'amaniw mistuwayatayna.

9Egipcionakax taqpach ejercitopampi, carronakampi, caballeriapampi ukhamaw israelitanakar arktir mistuwayapxäna. Jupanakarusti quta thiyankaskiriruw jikxatapxäna, Pi-hahirot chiqa jak'ana, Baal-sefón chiqa uñkatasina.

10Israelitanakax faraonampir egipcionakampir jak'achasinir uñjasax wal axsarayasipxäna, ukat Tatitur art'asipxäna.

11Moisesarusti sapxänwa:

—¿Kunatakis nanakar Egiptot irpsunipxista? ¿Kunatsa nanakar wasaran jiwarir irpanipxista? ¿Janit Egipton imäwix nanakar imt'añatak utjkänxa?

12Egipton qhanak sapxsmaxa: “Egipcionakatakik irnaqasipkä” sasa. ¡Nanakatakix egipcionakar luqtañax walïsapänwa, aka wasaran jiwarañat sipana! —sasa.

13Ukampis Moisesax ukxaruw jupanakar säna:

—Jan axsarapxamti. Ch'amañchasipxam, jichhüruw uñjapxäta kuntix Tatitux jumanakar qhispiyañatak lurkani uka. Jichhür uñjapkta uka egipcionakarux janiw mayampsa uñkatkxapxätati.

14Jumanakax jan llakisipxamti, Tatituw jumanak lanti nuwasiskani —sasa.

15Tatitusti Moisesar sänwa:

—¿Kunatsa nayar yanap mayiskista? ¡Israelitanakar sarantayaskakim!

16Jumasti, thujrum aytam, qutxar amparam luqtasin payar jaljtayam; ukhamat israelitanakax uka taypi waña uraqinjam makhatapxani.

17Nayaw egipcionakarux chuymap qalarayä jumanakar arktaniñapataki; ukat faraonar nayan ch'aman kankañax uñacht'ayä, ukhamarak carronakaparu, caballonakaparusa.

18Kunapachatix faraonampiru, taqpach ejercitopampiru, ukhamarak carronakaparus nayan ch'aman kankañax uñacht'aykä ukapachaw Egipcio jaqinakax nayan Tatitütax yatipxani —sasa.

19Ukat Diosan angelapampi, israelitanakan nayräxap sarkäna uka qinayampix jupanakan qhipäxaparuw jutxäna.

20Ukhamat uka qinayax egipcio soldadonakampita, israelitanakampit chika taypinkäna; uka qinayasti egipcionakatakix mä ch'amak qinayänwa, ukampis israelitanakarux qhant'ayänwa. Ukat egipcionakax uka aruman israelitanakar jan jikxatirjamäpkänti.

21Moisesasti amparap qutxar luqtäna, ukatsti Tatitux inti jalsu tuqit arum paqaraw wal thayt'ayanïna, qutsti payaruw jaljtayäna. Ukhamat qutax payar jaljtasin waña uraqir tuküna.

22Ukatsti israelitanakax waña uraqinjam quta makhatapxäna. Uma jaljtatasti pä jach'a pirqar uñtatänwa, mayax kupi tuqina, mayasti ch'iqa tuqina.

23Faraonan taqpach caballeriapampi, carronakapampix israelitanakan qhipap mantapxarakïna, chika qutkamaw jupanakar arktapxäna;

24qhipärmanthi willjtasti, Tatitux nina taypita, qinay taypit egipcionakar uñch'ukiskäna, ukatsti jupanakpur pixtuntasiyäna;

25ukhamarus carronakapan ruedanakap q'iwiräna, ukhamat k'achak sarapxañapataki. Ukham uñjasin egipcionakax sapxäna:

—¡Israelitanakat jaltxañäni, Tatitupaw jupanak lanti jiwasamp nuwasiski! —sasa.

26Tatitusti Moisesarux sänwa:

—Amparam qutxar luqtam, uman wasitat mayachasxañapataki, ukatsti egipcionakampiru, carronakapampir chhaqtayañapataki —sasa.

27Moisesasti amparap qutxar luqtäna, qhipärmanthi willjtasti umax kunjämakäntix ukhamaw tukxäna. Egipcionakax jaltxañ yant'apxäna, ukampis umaw jupanakar chhaqtayäna, Tatitux egipcionakar quta umamp ukham tukjäna.

28Umax wasitat pachpar kuttasin, nuwasiñ carronakampiru, caballeriampir chhaqtayäna, israelitanakar arktir mantapkatayna uka taqpach ejercitompiru. Janiw maynis faraonan soldadonakapat qhispkänti.

29Ukampisa, israelitanakax quta taypi waña uraqinjam makhatapxäna, pä uma pirqa taypinjama, mayax kupïxana, mayasti ch'iqäxana.

30Uka urusti Tatitux ukhamwa israelitanakar egipcionakan amparapat qhispiyäna, israelitanakasti egipcio jaqinakan jiwarat janchip quta thiyanakankaskir uñjapxäna.

31Israelitanakax kunjämtix Tatitux jach'a ch'amapampi egipcionakar tukjkäna ukanak uñjasinsti, Tatitur axsartapxänwa, ukat jupar iyawsapxäna, Moisés luqtiriparus jaysapxarakïna.