JOB QALLTA ARUNAKA - Qullan Arunaka DC
QALLTA ARUNAKAIsrael markan sarnaqäwipäki ukanakxa tukuyxtanwa. Jichhasti kunatix Poesía satäki uka qillqatanakax Job qillqatampiw qalltani. Aka qillqatan mä aski jaqit parlistu, uka jaqisti Job sutinïnwa. Job chachax wali suma jaqïnwa, ukhamarus wali qamiri, walja wawanakani, walja uywanakanïnwa. Ukampis Job chachatakix kunayman jach'a jan walt'añanakaw utjarapïna: taqi utjir yänakapaw tukusxäna, wawanakapas jiwarxänwa, jupasa mä jan wali usumpi usuntatarakïnwa. Job chachax jach'a jan walt'añanpun jikxatasïna. Nayraqatax kimsa masinakapaw chuymachir jutäna; jupanakampisti ch'axwkaspas ukham parlarakïna.Khaya urunakansti jaqinakax, t'aqhisiñax Tatitutsa jutkaspa juchanak luratas layku ukham amuyapxäna. Masinakapax Job chacharux “Juchanïtaw” sapxänwa, ukampis jupax jan juchaniw amuyasïna. Ajanuy ajanuw Diosamp parlañ munäna, uka t'aqhisitanakapat Diosar jiskt'asiñ munarakïna.Tukuyarusti Diosax Job chachar parlasax; jach'a kankañapampi, yatiñ kankañapamp mä jiskt'anak tuqiw jupar uñacht'ayäna.Job chachasti wali jisk'akïtap amuyasïna, jach'a kankañani, ch'amani, wali yatiñan Tatit nayraqatana, kunanaktix jan amuyt'ki ukxat parlatapat chuymay sarakïnwa. Qhiparusti Job chachax aski waxt'äwinakamp phuqt'ataw uñjasïna, yänakapas mä ukkhat ukkhampi kuttayatäxarakïnwa. Ukham jach'a t'aqhisiñankkasinsa, Job chachax janipuniw Diosat armaskänti. Ukat Diosax jupar aski waxt'äwipamp phuqt'äna.
