EZEQUIEL 37 - Qullan Arunaka DC

Waña ch'akhanaka

1Tatitux nayaruw amparapampi luqxatitu, ch'amapampiw phuqt'arakitu, ukatsti mä qhirwaruw sayt'ayitu, kawkhantix ch'akhanakax walipunïkatayna uka chiqaru.

2Tatitux uka qhirwan uksar aksar irptitu; ch'akhanakasti uka chiqan waljapunïnwa, uka ch'akhanakasti q'ala wañsutarakïnwa.

3Ukat Tatitux sarakitu: “Ezequiel, ¿amuytati jumax aka ch'akhanakan wasitat jaktañapxa?” sasa. Nayasti saraktwa: “Tatay, juma sapakiw uk yattaxa” sasa.

4Tatitusti sarakituwa: “Nayan sutixar aka ch'akhanakarux parlam, sarakim: ‘Waña ch'akhanaka, Tatitun yatiyäwi arunakap ist'apxam.

5Tatitux akham sapxtamwa: Jumanakan jaktxapxañamatakix jakañ saman phust'apxäma.

6Ankunak uchapxäma, janchimpiw phuqhantapxäma, patxa janchimpiw janxatapxäma, ukatsti jakañ samanampiw wasitat jaktxapxañamatak phust'apxäma. Ukapachaw yatipxäta, nayan Tatitütaxa’ ” sasa.

7Nayasti jupanakarux kunjämtix Tatitux siskitu ukhamarjamaw yatiyta. Ukham yatiykäyäta ukapachaw mä uxuri ist'ta, ukasti uraqi khathatïnwa, ukatsti ch'akhanakax jupanakkamaw mayar tukxapxäna.

8Ukatsti uka ch'akhanakanxa ankunakampi janchimpirakiw uñstarxäna, ch'akhanakar janxattasa. Ukampis janiw jakañanïpkänti.

9Ukatsti Tatitux sarakituwa: “Nayan sutixar jakañ samanar parlam, akham sasa: ‘Tatitux akham siwa: Jakañ samana, pusi tuqitpach sarthapinim, ukatsti aka jiwat ch'akhanakaru jakañ churam’ ” sasa.

10Nayasti Tatitun sutipxaruw parlta, jupan arunakaparjama, ukatsti jakañ samanax uka ch'akhanakaruw mantxäna, uka ch'akhanakasti jaktxasinxa, saythapipxarakïnwa. Jupanakasti mä jach'a tamar uñtata waljanipunïpxänwa.

11Ukatsti Tatitux sarakituwa: “Israel markax uka ch'akhanakar uñtatawa. Jupanakax akham sasaw sarnaqapxi: ‘Ch'akhanakasax q'ala wañsutawa; janirakiw jiwasatakix kuna suyt'añas utjkxiti, q'ala aynacht'atätanwa’ sasa.

12Jichhax walikiwa, ukampis nayan sutixar parlam, akham sasa: ‘Tatitux akham siwa: Nayan markaxa, jumanakax sepulturan allintatjamaw uñjasipxtaxa, ukampis nayaw jumanakarux ukat apsunxapxäma, ukatsti Israel uraqiruw kuttayanxapxäma.

13Kunapachatix nayax jumanakar sepulturat apsunxapxäma ukapachaw jumanakax yatipxäta, nayan Tatitütaxa.

14Nayaw jumanakarux jakañ samanaxampi phust'apxäma, jumanakasti wasitat jaktxapxäta; ukatsti pachpa uraqinakamaruw utt'ayxapxäma. Ukapachaw jumanakax yatipxäta, naya, Tatitun parlataxa, uka parlataxarus phuqhataxa. Naya, Tatituw uk arsta.’ ”

Israel markampi, Judá markampix wasitat mayachthapitäxiwa

15Tatitusti sarakituwa:

16“Mä lawa aytasin uka lawxar akham sasa qillqam: ‘Judá markawa’ sasa. Ukatsti yaqha lawa aytasin akham sasa qillqarakim: ‘Israel markawa’ sasa.

17Ukxarusti uka pä lawanak mayar apthapim, mä sapa lawakïñapataki,

18marka masinakamatix jumar sapxätam: ‘Qhanañchapxita, kun sañsa munta uka luräwimpixa’ sasaxa,

19jumasti sarakïtawa: ‘Tatitux akham siwa: Judá markampi Israel markampix mä markar tukutäxapxaniwa’ sasa.

20Ukatsti uka lawanak jupanakan uñjkat amparamar ayxarum,

21ukatsti jupanakarux sarakim: ‘Tatitux akham siwa: Israelitanakarux kawki markanakantix jichhax jikxatasipki uka markanakat irpsunxä, taqi tuqit jupanakar tantacht'xä, ukatsti uraqiparuw kuttayanxarakï.

22Jupanakarusti aka uraqinsa, Israelan qullunakapansa mä sapa markarukiw tukuyxä, mä sapa reyinikïpxaniwa. Janipuniw wasitat payar t'aqjtat markäkxapxaniti.

23Janirakiw wasitat uka axtaskañ diosanakar yupaychasaxa, kunayman juchanak lurasas q'añuchaskxapxaniti. Nayaw jupanakarux jan chiqapar sarnaqatanakapat qhispiyxä, juchanakapatsa q'umachxarakï. Jupanakax nayan markaxäniwa, nayasti jupanakan Diosaparakïyäwa.

24David luqtirixaw jupanakatakix reyïni, jupa sapakiw jupanakan awatiriparakïni, nayar ist'asaw sarnaqapxani, kamachinakaxsa phuqhapxarakiniwa.

25Jacob luqtirixar churata uraqin jakapxani, kawkintix nayra awkinakapax jakapkäna uka uraqina. Jupanakasa, wawanakapasa, wawanakapan wawanakapas ukan jakapxani, David luqtirixarakiw jupanakan jilïripäni.

26Jupanakan jan kun axsaras jakasipxañapatakisti mä arust'äwi lurä. Ukasti wiñay arust'äwïniwa. Nayaw jupanakarux waljaniru tukuyxä, jupanak taypirusti wiñayatakiw nayan qullan utax ucharakï.

27Ukatsti jupanak taypin jakxä, jupanakan Diosapäyäwa, jupanakasti nayan markaxarakïniwa.

28Nayan qullan utaxax wiñayatakiw jupanak taypinkxani, ukapachaw yaqha markanakax yatipxani, nayan Israel markaru mä suma qullan utjäwixatak ajllisitaxa.’ ”