ROMANOS MARKANKIR IYAWSIRINAKAR QILLQATAPA - Qullan Arunaka DC
MARKANKIR IYAWSIRINAKAR QILLQATAPAQALLTA ARUNAKAPablox kunapachatix aka qillqat Romankir iyawsirinakar qillqkän ukkhaxa, janïraw jupanakar tumpt'irix sarkataynati; ukampis España markar sarkas puriñatakiw amtasïna. Ukatsti uka amtäwipar jupanakan yanapt'apxañap suyäna. Aka qillqatax Galaciankirinakar apayatäkän ukhamawa, ukansti kamisatix Pablox iyawsañan jakañxat amuykän ukxat parli, ukatsti mä iyawsirin jakäwipax kun sañtix munki ukanakat arsuraki. Maynïr qillqatanakaparjamasti, aka qillqatax khititix qillqki ukat qhanañchasin qallti, mä aruntampiw qalltaraki; ukxarusti Diosar yuspagarasin jupat mayisiñat qhanañchi, kuna amtampitix aka qillqatax qillqatäki ukat qhanañchasaraki (1.1-17). Ukxarusti, mä juk'a arunakan kunäkitix Diosan suma yatiyäwi arunakapaxa, juchat qhispiyasiñax judiotakisa, jan judiotakis taqi jaqinakatakïtapa, Diosax “iyawsäwi tuqiki” juchanakas qhispiyatapa, ukanakat parlarakistu.Aka qillqatan qalltäwi arunakapat qhanañchasasti, nayrïr jach'a jaljapax Tatitun chiqa yatichäwinakapat parli; payïr jaljapansti kamisatix uka chiqa yatichäwinakarjam jakañasäki ukxat arsuraki, kimsïr jaljapansti kunayman iwxanakata, aruntanakapat parlaraki.Aka qillqatansti chiqa yatichäwinakat jilpach parli: (1.18—11.36). Ukansti judionakas jan judionakas taqin juchan munañapankatapa, juchañchatätapat Pablox yatichi; ukatsti juchat qhispiyatäpxañapaw wakisi (1.18—3.20). Ukhamasti Diosaw jaqirux Jesucristo tuqi juchanakap pampachi, jupampi mayachat jakäwirus kuttayxaraki (3.21—4.25). Diosampi mayachat jakxasinxa, machaq jakañaw utjxi, Cristompïxatas layku. Ukhamarus Cristor iyawsirix samarañan phuqt'atäxiwa, Qullan Ajayu tuqi juchan munañapata, jiwañatsa qhispiyatäxatapata, Diosampi sumankxatapataraki. Kamachin amtäwipax jaqir jucha luratapat amuyt'ayañänwa; juchat pampachatäxasinsti, jakañapax Diosan Ajayupan irpatäxiwa (caps. 5—8). Diosan taqi jaqinakataki amtäwiparjamaxa, judionakan Jesusaru jan katuqañ munapxatapaxa, taqi jaqinakaruw Diosax qhispiyasiñ punkxa jist'arawayi. Ukampis Diosax janiw judionakatxa armaskiti, janirakiw munasiñapsa pist'ayaskiti; jan ukasti, tukuyaruxa taqi judionakaw Jesusarux Qhispiyiripat katuqapxani (caps. 9—11).Pablox qillqatapxa chiqpach iyawsirjam jakañat amuyt'ayasin tukuyi, munasiñan phuqt'ata, Diosar luqtasina, markasan kamachinakaparu jaysasina, maynit maynikam yanapt'asisa. Chuymasan amtäwipa tuqitsa amuyt'ayarakiwa (12.1—15.13). Aka qillqatasti aruntanakampiw tukuyi (15.14—16.27).
