ISAÍAS 18 - Qullan Arunaka DC

Etiopía markatak profecía arunaka

1¡Ay, kunakïkan chhichhillankhanakamp phuqhantat markatakixa,

Etiopía jawiranakat khursankkis uka markanakatakixa,

2khithanakapsa Nilo jawiranjam khithanki uka markatakixa,

junco sat alinakat lurat botenakat jutapki ukanakatakixa!

Khithanaka, jalakamak jalapxam,

uka jach'a tansa, janq'ull jaqinakan markaru,

taqi chiqan wali axsarat markaru,

wali ch'amani jach'a jach'a tukur markaru,

jawiranakan muyuntat markaru.

3Taqi jumanaka, akapachan jakir jaqinaka,

kunapachatix qullun mä chimpu aptapkan uk uñjapxäta,

kunapachatix trompetax phust'askani uk ist'apxarakïta.

4Tatitusti sarakituwa:

“Utjäwixatpach nayax k'uchikiw uñch'ukiskta,

junt'u pachan mä qhanäkaspas ukhama,

achunak apthapiñ junt'u urunakan

mä jallu sullan qinayäkaspas ukhama.

5Kunapachatix uva yapunakan panqarax pasakipxani ukapacha,

uka panqaras suma puqt'ata uvar tukxarakini ukapacha,

ukampis uva apthapiñ nayräxaxa,

cuchillonakampiw layminakap khuchhurapxani,

khuchhurasinsti apanukupxaniwa.

6Taqi ukanakaw apanukut uñjasini,

qullunakan utjir jach'a jamach'inakataki,

kunayman utjir laq'unakataki.

Uka jamach'inakasti junt'u pachax ukan jakapxani,

kunayman laq'unakas

thaya pachax ukanarak jakapxani.”

7Uka pachaxa,

taqi ch'amani Tatitutakiw

churäwinak apanipxani,

kawkïr markatix jach'a tansa janq'ull jaqinakanïki

uka marka,

wali axsarat markäki uka,

ch'amani, jach'a jach'a tukur markäki uka,

jawir umanakan suma qarpat markäki uka.

Sión qullurkamaw luqtäwinakap apanipxani,

ukan taqi ch'aman Tatiturux yupaychapxani.