1 CRÓNICAS 27 - Qullan Arunaka DC

Davidan ejercitop utt'ayatapa

1Israelan ejercitopax tunka payan tamanakat utt'ayatänwa, jupanakarusti reyir luqtañax maran mä kutiw wakt'äna. Sapa tamasti pä tunka pusini waranqa chachanakat utt'ayatänwa, jupanak taypinsti wila masinakapan jilïrinakapa, ukhamarak ejerciton jilïrinakapaw utjäna.

2Nayrïr tamarux qallta phaxsin uñjañax wakt'äna: jilïripax Jasobeam chachänwa, jupax Zabdiel chachan yuqapänwa,

3Fares chachat saraqir wawaparakïnwa, jupax taqi tamanakan jilïripan jilïripänwa, jupanakax qallta phaxsin uñjapxäna.

4Payïr tamarux payïr phaxsin uñjañax wakt'äna: jilïripax ahohíta Dodai chachänwa.

5Kimsïr tamarux kimsïr phaxsin uñjañax wakt'äna: jilïripax Benaías chachänwa, jupax Joiadá jilïr sacerdoten yuqapänwa,

6jupasti kimsa tunka jan axsarir chachanakan jilïripänwa. Ukampis Amizabad yuqapaw uka tama sarayäna.

7Pusïr tamarux pusïr phaxsin uñjañax wakt'äna: jilïripax Asael chachänwa, jupax Joab chachan jilapänwa. Jupa lantisti Zebadías yuqapäxänwa.

8Phisqïr tamarux phisqïr phaxsin uñjañax wakt'äna: jilïripax izraíta Samhut chachänwa.

9Suxtïr tamarux suxtïr phaxsin uñjañax wakt'äna: jilïripax Tecoa markankir Iqués chachan Irá yuqapänwa.

10Paqallqür tamarux paqallqür phaxsin uñjañax wakt'äna: jilïripax pelonita Heles chachänwa, jupax Efraín chachat saraqir wawapänwa.

11Kimsaqallqüri tamarux kimsaqallqür phaxsin uñjañax wakt'äna: jilïripax Husá chiqankir Sibecai chachänwa, jupax Zérah chachat saraqir wawapänwa.

12Llätunkir tamarux llätunkir phaxsin uñjañax wakt'äna: jilïripax Anatot chiqankir Ebiézer chachänwa, jupax Benjamín chachat saraqir wawapänwa.

13Tunkïr tamarux tunkïr phaxsin uñjañax wakt'äna: jilïripax Netofá chiqankir Maharai chachänwa, jupax Zérah chachat saraqir wawapänwa.

14Tunka mayanïr tamarux tunka mayanïr phaxsin uñjañax wakt'äna: jilïripax Piratón chiqankir Benaías chachänwa, jupax Efraín chachat saraqir wawapänwa.

15Tunka payanïr tamarux tunka payanïr phaxsin uñjañax wakt'äna: jilïripax Netofá chiqankir Heldai chachänwa, jupax Otoniel chachat saraqir wawapänwa.

16Israel markan ayllunakapan jilïrinakapax akanakänwa: Rubén ayllutsti Eliézer, jupax Zicrí chachan wawapänwa; Simeón ayllutsti Sefatías, jupax Maacá chachan wawapänwa;

17Leví ayllutsti Hasabías, jupax Quemuel chachan wawapänwa; Aarón chachat saraqir wawanakapatsti Sadoc chachänwa;

18Judá ayllutsti Elihú, jupax Davidan jilapänwa; Isacar ayllutsti Omrí, jupax Micael chachan wawapänwa;

19Zabulón ayllutsti Ismaías, jupax Abdías chachan wawapänwa; Neftalí ayllutsti Jarimot, jupax Azriel chachan wawapänwa;

20Efraín ayllutsti Oseas, jupax Azazías chachan wawapänwa; Manasés chikat ayllutsti Joel, jupax Pedaías chachan wawapänwa;

21Galaad chiqankir maynïr chikat Manasés ayllutsti Idó, jupax Zacarías chachan wawapänwa; Benjamín ayllutsti Jaasiel, jupax Abner chachan wawapänwa;

22Dan ayllutsti Azarel, jupax Jeroham chachan wawapänwa. Jupanakaw Israel markan ayllunakapan jilïrinakapänxa.

23Davidasti pä tunka maranit aynacharux janiw jakthapkänti, Tatituw juparux arsutayna israelitanakar alaxpachankir warawaranakjam waljaptayañataki.

24Joab chachasti jakthapiñ qalltäna, ukampis janiw tukuykänti, ukaw Israel markarux jan walt'añ apanïna. Ukat taqpach jakthapitax David reyin qillqatapan jan uñstkiti.

25Reyin qullqi katuripax Azmávet sat Adiel chachan yuqapänwa, Ozías chachan Jonatán yuqapasti pampanakana, markanakana, jisk'a markanakana, qurpanakan yänak imañ utanak uñjiritak uchatänwa.

26Yapuchirinakar uñjiritakix Ezrí sat Quelub chachan yuqapänwa.

27Uva yapunak uñjirix Ramat chiqankir Simí chachänwa, vino apthapis imirix Sefam chiqankir Zabdí chachänwa.

28Olivo alinaka, pampankir higos alinak uñjirix Guéder chiqankir Baal-hanán chachänwa, ukatsti aceite imañ utanak uñjirix Joás chachänwa.

29Sarón chiqankkän uka uywanak uñjirix Sitrai chachänwa, qhirwanakankkän uka uywanak uñjirix Adlai chachan Safat yuqapänwa.

30Camellonak uñjirix ismaelita Obil chachänwa, asnonak uñjirix Meronot chiqankir Jehedías chachänwa;

31ovejanak uñjirix agareno Jaziz chachänwa. Taqi jupanakax David reyin yänakap apnaqirinakäpxänwa.

32Jonatán, Davidan tiopax wali ch'ikhi, suma yatiñani, amuyt'ayir jaqïnwa, Jehiel sat Hacmoní chachasti reyin wawanakap uñjirïnwa.

33Ukhamarak Ahitófel chachax reyin amuyt'ayiripänwa, arquita Husai chachax reyitakix wali yanapänwa.

34Ahitófel chacha lantisti Joiadá, Benaías chachan yuqapampiru, Abiatar chachampiruw utt'ayapxäna. Reyin ejercitopan jilïripax Joab chachänwa.