1 Diosaxay, Reyixay,
jach'aruw aptäma,
wiñayaw sutim jach'añchä.
2Sapüruw jach'añchäma;
wiñayaw yupaychäma.
3Tatitux jach'apuniwa,
jach'ar aptatäñapax wakisiwa;
jach'a kankañapax jan amuyt'kayawa.
4Jaqinakax wawanakapan wawanakapkamaw
luratanakam aytani,
muspharkañ luratanakam yatiyapxani.
5Muspharkañ qhapaq kankañamat
jupanakarux yatiyasini,
nayasti muspharkañ luratanakamat parlarakï.
6Axsarkay ch'aman luratanakamat yatiyasini,
nayasti jach'a luräwinakamat parlarakï.
7Jach'a munasiñamat amtasaw yatiyapxani,
juman aski kankañamat jach'at jallallapxani.
8Tatitux suma jaqiwa, khuyapayirirakiwa,
q'apisiñapax k'achakiwa, munasiñapasti jilarkiriwa.
9Tatitux taqinir munasiriwa,
luratanakaparux munasiñampiw uñji.
10¡Tatay,
luratanakamax taqpachapun jumar jach'añchpan!
¡Iyawsirinakamax jumar jach'añchapxpan!
11¡Aytat qullan sarayäwimat yatiyapxpan!
¡Jach'a luräwinakamat parlapxpan!
12¡Muspharkañ ch'amamat jaqinakar yatiyaspan,
aytkay qhapaq sarayäwimat parlasirakpan!
13Qhapaq markamax wiñay qhapaq markawa,
qhapaq apnaqäwimax wiñay apnaqäwirakiwa,
Tatitux arsutanakap phuqhiriwa,
taqi luräwinakapan munasiñaniwa.
14Tatituw tinkurinakarux katxäsiski,
qaritanakarusti ch'amañcharaki.
15Taqinin nayranakapaw jumarux uñch'ukisipktam,
jumaw wakisitarjam manq'añ jupanakar churtaxa.
16Jumaw amparam luqatattaxa,
taqi jakirinakarusti askinak jilarkir churtaxa.
17Tatitux taqi sarnaqäwipan chiqap uñjiriwa,
taqi luräwinakapan munasiñaniwa.
18Tatitux art'asirinakapan jak'apankaskiwa,
chiqpach chuymamp jupat art'asirinakan jak'apankiwa.
19Jupar arkirinakan munataparjamaw phuqhi;
arnaqasitanakap ist'i, qhispiyaraki.
20Tatitux jupar munirinakarux imiwa,
ñanqha luririnakarusti t'unjiwa.
21¡Lakaxax Tatitur yupaychpan!
¡Taqpach jakirinakax qullan sutip jach'añchpan,
jichhasa, wiñayan wiñayapataki.
Who We AreWhat We EelieveWhat We Do
2025 by iamachristian.org,Inc All rights reserved.
