SALMOS 65 - Qullan Arunaka DC

SALMO 65Diosax jach'añchatäñatakix askiwa 1 Davidan q'uchupa.

1 1 (2) Sión markan Diosapa,

¡jumax jach'añchatäñatakix askïtawa!,

¡arsutanak jumar phuqhañax wakisiwa,

2 2 (3) jumax mayisitanakar ist'irïtawa!

Taqi jaqinakaw juman ukarux jutapxi.

3 3 (4) Jucha luratanakaxaw aynacht'ayapxitu,

ukampis jumaw juchanakaxat pampachapxista.

4 4 (5) Juman ajllit jaqix kusisiñaniwa,

juma jak'an jakañapataki,

qullan utaman utjasiñapataki.

¡Utaman utjir yänakampiy kusisiyapxita,

qullan churäwinakamampiy phuqt'apxita!

5 5 (6) Qhispiyir Diosaxay,

muspharkañ aski kankañampiw jaysapxista;

taqi uraqpachaw jumarux alkatapxtam,

qutat khurin jakirinakas alkataraktamwa;

6 6 (7) jumïpan qullunakax sayt'atäski,

juman ch'amam laykuw thurt'atäski.

7 7 (8) Jumaw lamar quta mathapinakarux t'akuraytaxa,

jumaw markanakan ch'axwatap amukt'aytaxa;

8 8 (9) uraq tukuyan jakirinakax

muspharkañ luräwinakamat khathatipxi;

inti jalsu tuqita, inti jalanta tuqikamax,

jumïpan kusisiñat art'asiñax utji.

9 9 (10) Jumaw akapach uraq uñjasktaxa;

jallumpiw achunak utjaytaxa;

jilarkir uma qarpampiw

trigo yapunak jilaraytaxa.

¡Ukham lurasaw uraq wakichtaxa!

10 10 (11) Jumaw sukanak umampi qarptaxa,

khulanaksa khuskhachtaxa,

jallumpiw uraqirux jasak tukuytaxa,

ukhamat jilarkir achuytaxa.

11 11 (12) Jumaw askinakam marpach churtaxa,

qinayanakamax jilarkir askinak warxatani;

12 12 (13) wasarankir ch'ijinakax ch'uxñatatiwa,

qullunakasti kusisiñ isimpjamaw isthapisi;

13 13 (14) pampanakax ovej tamanakampiw phuqhantasi,

qhirwanakas yapunakampiw phuqhantasi;

¡taqiniw q'uchupxi,

taqiniw kusisiñat arnaqasipxi!