1Mä urux Sansonax Gaza markaruw saräna. Ukansti jan wali sarnaqir mä warmiruw uñjäna, ukatsti utaparuw mantäna, uka arum jupampi ikiri.
2Kunapachatix Gaza chiqankirinakax Sansonan markankatap yatipkän ukkhaxa, uka markar muyuntasin marka mantañawjan uñch'ukiyapxäna. Jupanakax arum paqaraw ukankapxäna, willjta tuqir Sansonar jiwayañ amtampi.
3Ukampis Sansonax chika arumkamakiw ikt'awayäna. Uka chika aruma sarthapisinsti, marka mantañawjar sarasin, marka punkxa chakañanakapamppacha khaksuwayäna, kallachipxar q'ipxaruwayasinxa, Hebrón uñkatasi qullu pataruw apäna.
Sansonampi, Dalilampi4Uka qhipatsti, Sansonax Dalila sutin warmiruw walpun munasïna, uka warmisti Sorec sat qhirwan jakäna.
5Filisteonakan jilïrinakapasti Dalilan ukaruw sarapxäna, juparusti sapxänwa:
—Sansonar sallqjasin arsuyam, kunatsa jupax ukataq chamanïpacha, kunjämatsa jupar atipjsna uk yatxatarakim; ukhamat jiwasax jupar ñach'antasin munañasar apnaqañasataki. Arsuyatamatsti sapa mayniw nanakax waranqa pataka qullqi churapxäma —sasa.
6Ukatsti Dalilax Sansonarux sänwa:
—Amp suma, sitaya, ¿kunatarak ukataq ch'amanïtasti? ¿Kunampirak jan sartañamatak ñach'antapxirismasti? —sasa.
7Sansonasti sänwa:
—Jumanakatix paqallqu ch'uxña phalanakampi ñach'antapxitäta ukkhaxa, jan ch'amanikiw uñjasxirista, ukatsti mä kawkïr jaqjamakïxiristwa —sasa.
8Filisteonakan jilïrinakapasti, Dalilan ukarux paqallq machaq phalanak apapxäna, ukampiw Dalilax Sansonar ñach'antäna.
9Dalilax utapar mä qawqha jaqinak imantatayna, ukat jupax jach'at art'äna:
—¡Sansón, filisteonakaw katuntapxätam! —sasa.
Sansonasti may thuqthapisin uka phalanakxa jan kunak t'aqanuqäna, nakhantat phalanakäkaspas ukhama. Filisteonakasti janiw Sansonan ch'amapa kawkhankatapsa yatxatirjamäpkänti.
10Dalilasti Sansonar sänwa:
—¡Jumax nayat phiskasistawa! ¡K'arintarakistawa! Jichhasti, sitaya, ¿kunampirak ñach'antapxirismasti? —sasa.
11Sansonasti sänwa:
—Jumanakatix jan apnaqat machaq wiskanakampi ñach'antapxitasmaxa, nayax jan ch'amani mä kawkïr jaqjamakïxiristwa —sasa.
12Ukatsti Dalilax machaq wiskanakampiw ñach'antäna, ukat art'äna:
—¡Sansón, filisteonakaw katuntapxätam! —sasa.
Uka utansti jaqinakax jamasat uñch'ukisinipkäna; ukampis Sansonax uka wiskanak juch'us ch'ankhar uñtatak t'aqthapïna.
13Dalilasti Sansonarux sänwa:
—¡Sallqjaskakistawa! ¡Mayampsa k'arintaskakistawa! Sitaya, ¿kunampipunirak ñach'antapxirismasti? —sasa.
Sansonasti sänwa:
—Jumasti nayan paqallqu pichikanakax katusin telaran ch'ankhapampi k'anthapim, ukatsti ch'akurur katt'ayasin uraqir liq'intam. Ukhamat nayax jan ch'amanïkxäti, ukatsti mä kawkïr jaqjamakïxäwa —sasa.
Ukatsti Dalilax Sansonar ikjayänwa, ukat paqallqu pichikanakap katusin telaran ch'ankhapampiw k'anthapïna,
14ukatsti ch'akurur katt'ayasax uraqiruw liq'intäna, ukat jach'at art'äna:
—¡Sansón, filisteonakaw katuntapxätam! —sasa.
Ukampis Sansonax may thuqthapisin jan kunak uka ch'akurumpi, telarampi t'aqthapïna.
15Ukat Dalilax säna:
—¡K'ari! ¿Kunatarak munsmaw sistasti? Akampix kimsa kutiw nayat sawkasistaxa, janiw kawkhankkitix ch'amamax uk siskistati —sasa.
16Dalilax jan inakt'asapuniw jiskhïna, sapa kutis ukak jiskhiskäna, Sansonasti wali mayjt'ataw uñjasxäna, jiwañak munxäna;
17ukat jupax kuntix Dalilar imt'kän uk arsxäna:
—Nayarusti janipuniw kunapachas ñik'utax mururapkituti, janïr yurkta ukkhatpach nayax mä nazireo jaqjam Diosar luqtatätwa. Ñik'utaxtix mururapxitaspa ukkhaxa, nayax mä kawkïr jaqjam jan ch'amanikïxiristwa —sasa.
18Dalilax jichha kutin Sansonan jupar chiqpach arsutap amuyxäna, ukat jupax filisteonakan jilïrinakapar yatiyir khithäna, akham sasa: “Jutapxam, Sansonax jichha kutin chiqpun arsxitu” sasa.
Ukatsti filisteonakan jilïrinakapax qullqi apt'ataw jupan ukar sarapxäna.
19Dalilasti Sansonarux jarphipxaruw ikjayäna, ukatsti mä chachar jawsasin paqallqu pichikanakap khuchhurayäna. Ukatsti Dalilax khuy aka wayunaqasin,
20jach'at art'äna:
—¡Sansón, filisteonakaw katuntapxätam! —sasa.
Sansonasti sarthapïnwa, maya kutinakanjam atipt'añ amuyasa, ukampis janiw amuyaskänti Tatitun jupar apanukxatapxa.
21Filisteonakasti jupar katuntasin nayranakap apsupxäna, ukatxa Gaza markaruw apapxäna, ukawjansti broncet lurat cadenanakampiw ñach'antapxäna, ukatsti carcelan utjki uka molinompiw irnaqayapxäna.
22Ukchañkamasti, Sansonan ñik'utapax wasitat jilantxäna.
Sansonan jiwxatapa23Filisteonakan jilïrinakapasti Sansonar atipt'apxatapat uruyañatakiw tantachasipxäna, Dagón sat diosapar wilañchanak luqtañataki. Jupanakasti akham sasaw q'uchupxäna:
“Jiwasan diosasawa,
Sansón uñisirisarux amparasar katuyistu” sasa.
24Ukatsti jaqinakax Sansonar uñjasinxa, diosapar yupaychasaw q'uchupxäna, akham sasa:
“Jiwasan diosasaw Sansón uñisirisarux
amparasar katuyistu,
jupax yapunakas tukjirïna,
walja jaqinakas jiwarayirïna” sasa.
25Jupanakasti sinti k'uchikiw jikxatasipxäna, ukatsti Sansonar irpanipxañapatakiw mayipxäna jupat sawkasiñataki. Ukhamasti carcelat Sansonar irpsunipxäna, jupar uñjasinsti wal kusisipxäna, ukat pä piläranak taypiruw sayt'ayapxäna.
26Sansonasti amparat irpkän uka waynuchurux sänwa:
—Yupaychañ uta katxäsir piläranak jak'ar irpita, ukanakat katt'asiñ munta —sasa.
27Ukapachasti filisteonakan taqpach jilïrinakapaw yupaychañ utan phuqha jikxatasipxäna, chachanaka, warminaka. Alay patxansti niya kimsa waranqa jaqinakaw jikxatasipxäna, kunjämtix Sansonampi phiskasisa mayninakax anatapki uk uñch'ukisa.
28Sansonasti Tatituruw art'asïna, sarakïnwa: “Dios Tatay, jichha kutimpiy nayat amtt'asita, filisteonakat paypach nayrax apsupxatapat mäpit phuqsusiñaxatakiy ch'ama churita” sasa.
29Ukatsti amparanakapampiw chikachikankir pä piläranak thaqtäna, uka piläranakaw uka utarux katxäsïna, uka piläranakaru amparanakapampi limkatasinsti,
30jach'at art'äna: “¡Filisteonaka, nayamp chika jiwarapxam!” sasa.
Ukatsti taqi ch'amapampiw nukt'äna, uka yupaychañ utasti filisteonakan jilïrinakapxaru, taqi uka manqhinkirinakxaruw allxattäna. Sansonax jiwañapanxa waljanirupuniw jiwarayawayäna, jakkasin jiwaraykatayna ukat sipan juk'amp walja jiwarayäna.
31Uka qhipatsti, Sansonan jilanakapax taqpach wila masinakapampi jutasin janchip apasxapxäna, ukatsti Sorá, Estaol chiqanak taypinkir uraqiruw imt'xapxäna, Manoa awkipan imäwiparu. Sansonax pä tunka maraw Israelitanakarux irpatayna.
Who We AreWhat We EelieveWhat We Do
2025 by iamachristian.org,Inc All rights reserved.
