ISAÍAS 54 - Qullan Arunaka DC

Diosan wiñay munasiñapa

1Jerusalén marka,

jan wawachasir warmi,

jan wawanakan warmi,

jichhax kusisiñat arnaqasim,

kusiskañ q'uchunak q'uchusim,

Tatitusti siwa:

“Jerusalén, apanukut warmi,

mä chachan warmit sipansa,

walja wawanakanïyätawa.”

2Chhujllamsti juk'ampi jach'ar jithitatayam,

kawkhantix jumax jakaskta uk jan axsaras jithitatayam,

chinuñ phalanakapsti juk'amp jach'anak wakicham,

ch'akurunaksti sum ch'akuntarakim,

3jichhax kupi tuqiru ch'iqa tuqiruw jithitatäta;

wawanakamasti walja markanakaruw atipjapxani,

jichhax uka ch'usa markanakan jakapxani.

4Jan axsaramti, janiw mä p'inqa uñjaskätati,

janiw kuna jan wali arunaksa sapkätamti,

janirakiw kunatsa p'inqaskxätati.

Tawaqu kankañaman p'inqachatäkäyät uk armasxätawa,

janirakiw mayampsa ijma warmirjam jisk'achapkäyätam uksa amtaskxätati.

5Jumar jakañ churir Tatituw jichhax warmipat uñt'asxätam;

sutipasti taqi ch'amani Tatitu satawa.

Qhispiyirimax Israelan Qullan Diosapawa,

jupasti taqi aka uraqpachan Diosaparakiwa.

6Israel marka,

jumax tawaqpach apanukuta,

llakin phuqt'at warmir uñtatäyätawa,

ukampis Tatitumaw wasitat jawstam, saraktam:

7“Mä juk'a pachatakikiw nayax apanuksma,

ukatsti jach'a munasiñaxampiw

wasitat katuqxäma.

8Phiñasiñaxanxa mä juk'atakikiw jumat jayarst'ta,

ukampisa wiñay munasiñampiw jumat khuyapayasta.”

Qhispiyiri Tatitumax ukham siwa.

9Tatitusti Israel markarux siwa:

“Uma juiciompi aka uraq q'al chhaqtaykäyäta ukkhaxa,

Noé chacharux mä juramentompiw akham sas arsüyäta:

‘Janipuniw mayampsa aka uraqirux uma juiciompi mutuykxäti’ sasa.

Uka kipkarakiw jichhax juramentompi arsta,

jumampix janipuniw mayampsa phiñaskxäti,

janirakiw mayampsa axsaraykxämati.

10Jach'a qullunakax yaqha chiqarusay unxtasipkpan,

jisk'a qullunakas aynacharusay jutasipkpan,

ukampis munasiñaxax jumatakix janipuniw tukuskaniti,

janirakiw sumar mantäwi arust'äwixas t'unjatäkaniti.”

Ukham siwa jumar khuyapayir Tatituxa.

Machaq Jerusalén

11“¡Jerusalén marka,

jan walt'añanakampi aynacht'ayat marka,

jan khiti chuymachiriniw jikxatastaxa!

Nayaw qalanakam sum utt'ayä,

uta qalltanakamax zafiro sata suma qalxaruw utt'ayä,

12torrenakamsti rubíes sata suma qalanakat lurä,

punkunakamxa suma llijkir qalanakat lurt'ä;

taqpach pirqanakamsti suma qalanakat sayt'ayä.

13Wawanakamarux nayaw yatichä;

jupanakatakisti sumankañaw utjani.

14Chiqa kankañaw jumarux ch'aman tukuyätam,

t'aqhisiyatäñatsa axsarañatsa qhispitaw uñjasïta,

axsarañas janirakiw mayampsa llakisiykxätamti.

15Mä markatix nuwantätam ukaxa,

uka markarux jumax atipjätawa,

uka markan nayan yanapt'ax jan katuqatap layku.

16“Uñtam, nayaw herrero jaqirux uskta,

jupasti sumpin nina nakhayi,

ukatsti kunayman nuwasiñ yänak luraraki;

taqi kun tukjir jaqirus nayaw uskta,

ukhamat taqi kunsa tukjañapataki;

17ukampis jumar tukjañatakix janiw khitis nuwasiñ yänak lurkiti.

Jumar juchañchapkätam ukanakarux amukt'ayätawa.

Nayar arkapkitu ukanakarusti atipt'añ churta”.

Tatituw ukham arsu.