1-2Yatiñan jaqixa,
janiw ina ch'usa arunakamp arsuskiti,
janirakiw thayan apañ aliq arunakampikis arsuskiti.
3Janiw inamayak kunsa parlkiti,
janirakiw ina ch'usa arsüwinaksa parlkiti.
4Ukampis jumax Diosar axsartañ apanukxtawa.
¡Tatitur taqi chuyma jak'achasiñsa t'unjtawa!
5Jan wali amtäwinakamaw ukham parlaytamxa,
k'ari arunak parlayaraktamxa.
6Nayan jumar juchañchañaxas janiw wakiskiti,
juma pachpaw arunakamamp juchañchasisktaxa.
7¿Jumat nayrïr yurir jaqïtasti?,
¿qullunakan nayrapti yurtasti?
8¿Tatitun amuyt'ayiripjamti amuyastasti?
¿Jan ukax, jumakis akapachan yatiñanïkasma ukhamcha amuyastaxa?
9¿Kuntix nanakax jan yatipkta uk yattati?
¿Kuntix nanakax jan uñt'apkta uk uñt'tati?
10¡Nanakax jilïr jaqinakäxapxtwa,
awkimat sipan juk'amp yatiñanïpxaraktwa!
11¿Janit jumatak walikïki, pachpa Diosan jumar chuymachatapasti,
suma arunakamp jumar parlxayatanakaxasa?
12¿Kunatarak q'apisiñampi atipjayasta,
nayranakamatsa ninanakjam chhukhutataytasti?
13¿Kunatarak Diosatak mayjt'astasti,
ukataqi jupatak tuqisiraktasti?
14Q'uma jaqix janiw maynis utjkiti,
jan juchan jaqisa janirakiw utjkiti.
15Jupatakix janiw angelanakas askïkiti,
janirakiw nayrapatakix alaxpachas q'umäkiti,
16¡jaqix ukanakat sipan
jan walinak lurañ yatintatawa, jisk'achkañarakiwa,
ñanqha lurañatakix umatsa pharjayaskaspa ukhamawa!
17Job, jichhax ist'itaya,
sarnaqäwixan yatiqkta uk säma,
18ukax amuyt'an jaqinakan yatichäwipawa.
Jupanakax nayra awkinakapat yatiqapxatayna.
19¡Janiw yaqha markankir jaqinakat yatiqapkänti!
Ukat Tatitux jupanakar uraqi churäna,
mä churawïkaspas ukhama.
20Ukampis qhuru ñanqha lurir jaqinakan churäwipax,
t'aqhisiñampi, axsarayasiñampiwa.
21Axsarayir uxutanak ist'apuni;
sumak samart'asiski ukapachaw lunthatanakas jalxati.
22Janiw jupatakix ch'amakat jaltañax utjkxiti;
¡espadampi jiwayat uñjasiñaki suyaski!
23Jiwat janchipasti siwiq'aranakan manq'aparuw tukuni;
tukusiñ urupa jak'ankatap yatisi.
24Ch'amakanakaw juparux axsarayani,
llakisiñampi jan walt'añanakampiw katuntarakini,
nuwasïwin jank'aki katuntir reyir uñtata.
25Diosatak sayt'asiritakix ukhamaw lurasi,
taqi ch'aman Tatitur saykatiritakisa,
26escudopampi jark'aqasisa
tuqisiñampi Diosatak sayt'asiritakis ukhamaw lurasiraki.
27Ajanupasa,
ch'illapas lik'imp phuqhantatawa.
28Jakkani uka markanakax q'ala t'unjataw uñjasini;
utanakax apanukutaw qhiparani,
laq'a phinaruw tukuni.
29Qamir kankañapax janiw jayatakïkaniti;
uraqinakapsa, qamir yänakapsa tukjasiniwa.
30Janiw ch'amakanakat jaltirjamäkaniti;
ninaw ch'ichtir alinakap naksuni;
may phust'asakiw Tatitux tukjani.
31Ñanqha lurir jaqinakax sallqjañar jan alkataspati,
jupakiw sallqjat uñjasxani.
32Janïräkipan layminakapax wañantxani,
janiw mayampis ch'uxñtankxaniti.
33Jan puqurir uva achun yapur uñtatäniwa,
willirtir panqaranakan olivo quqar uñtatäniwa.
34Ñanqha jaqinakan saraqirinakapax janiw utjkaniti,
qullqi chilltayasitanakamp qamirkiptat utanakapasti ninan nakhani.
35Jupanakax ñanqha lurañampi wallq'iptatäpxiwa,
aynacht'añanak wawachasipki;
achupasti sallqjañawa.
Who We AreWhat We EelieveWhat We Do
2025 by iamachristian.org,Inc All rights reserved.
