Apocalipsis 22 - Mam Huehuetenango New Ortography

1Ax ikx tzaj tyek'un anjel jun a' weye saqxix, aju a' te chwinqlal, in qoptz'aj ik tza'n vidr, atzun nne'tz ju a' lu twitz tq'uqb'il Dios ex tq'uqb'il Tal Ẍne'l.

2Ex in b'et ju a' tmijil cay tuj tnam, ex tuj kykab'il pak' ttzi a' ate' qe tze' te chwinqlal, in kyq'o'n kab'laj maj kywitz tuj ab'q'i. Tkyaqil xjaw in kyq'o'n kywitz; atzun kyxaq tze' in ajb'en te q'anb'il kye nasyon.

3Ex minti'tl jun tu'n tten tjaq' sentens, ex aju tq'uqb'il Dios ex te Tal Ẍne'l atzun ktel tuj tnam, ex qe tmajen che k'ulul twitz.

4K'okel kyke'yin twitz, ex ju tb'i k'okel ten tib'aj kywitz.

5Minti'tl qonik'an ktel tuj tnam; ex minti'tl tajb'en t-spik'umal lámpara kye xjal, mi t-spik'umal q'ij; porke axte t-spik'umal Qman Dios kb'el ten kyib'aj; ex che kawil tuj tkyaqil tab'q'iyil te jumajx.

Ch'ix tul tq'ijlalil tu'n tul Jesucrist juntl maj

6Ex tzaj tma'n anjel weye:

—Aqeju yol lu axix tok ex b'a'n tu'n tqe' kyk'u'je kyi'j. Ate Qman Dios ma tzaj t-sama'n t-anjel tu'n ttzaj tyek'un kye tmajen tkyaqilju ch'ix tul, ik tza'n tzaj tchik'b'a'n tyol kye t-sanjel ojtxi, chi anjel.

7—Lu chin ul naje. At tzalajb'il kye qe xjal in japun kyu'n aju yol tz'ib'an tuj u'j lu, aju ma tzaj tma'n Dios kye t-sanjel, chi Jesucrist.

8Aqine Juan o nb'iye ex o wile tkyaqil jlu. Ex tej nb'inteye jlu ex tej nlonteye, in kub' ẍmeje'ye t-xe tqan anjel tu'n nk'ulune twitz, aju anjel tzaj yek'unte jlu weye.

9Pero tzaj tma'n weye:

—B'intza, mi'n tb'inchaya ikju; porke ax tmajen Dios qine junx tuk'ila ex kyuk'il qe termaniya aqeju t-sanjel Dios, ex kyuk'il qeju in japun ju yol kyu'n aju tz'ib'an tuj tu'jil lu. K'uluna twitz Dios.

10Ex tzaj tma'n weye:

—Mi'n kyaj tlamo'na ju libro jatum tz'ib'an ju yol lu, aju ma tzaj tma'n Dios kye t-sanjel, ex ch'ix tul kanun tq'ijlalil tu'n tjapun.

11Aju xjal mya b'a'n, kukx tu'n tten mya b'a'n; ex aju xjal tz'il, kukx tu'n tten tz'ilx; ex aju xjal tz'aqlxix, kukx tu'n tb'inchante aju tz'aqlxix; ex aju xjal ma txi tq'on tib' tu'n tajb'en o'kx te Dios, kukx tu'n tajb'en te Dios.

12Lu qine chin ul naje; ex tzul wi'ne jun oyaj tu'n t-xi nq'o'ne chojb'il te teyle junjun ik tza'nx tb'inchb'en.

13Aqine atine t-xe tnejel, ex kukx chin tele ok tjapun b'aj mankb'il tq'ijlalil, aqine tnejel ex mankb'il, ik tza'n ju letr A ex Z.

14At tzalajb'il kye qeju nne'l kytx'jo'n ti'j kyxb'alun, tu'ntzun tten kyoklen ti'j ju tze' te chwinqlal, ex tu'n kyokx ttzi tlamel tnam.

15Atzun qe xjal jumajx mya b'a'n kyb'inchb'en che kyjel ten ti'jxi tnam, kyuk'ix qe xjal b'a'n che ky'a'n, qe yaẍil, qe b'yol xjal, qe k'ulul kywitz qe tilb'ilal, ex kykyaqil qeju at-xix kygan ti'j tu'n kynik'an yol.

16Aqine Jesús ma tzaj nsama'ne n-anjele tu'n ttzaj tchik'b'a'n ti'j tkyaqil jlu kye kykyaqil okslal tuj junjun tnam. Aqine tiyjil David, aqine ju che'w in ja'wil ok in tzaj t-xe kya'j ex in qoptz'aj, chi Jesús.

17Aju Xewb'aj Xjan tuk'ix ju t-xu'jil Tal Ẍne'l in kyma'n:

—Tzaja.

Ax ikx alkye ma b'inte, q'manx:

—Tzaja.

Ex alkye at txqetle'n ti'j, e ttzaj; ex alkye tajb'il tu'n tk'an, k'anx ju a' te chwinqlal noq kukx.

18Ax tok kxel nma'ne kye kykyaqil qeju ma che b'inte tyol Dios tz'ib'an tuj u'j lu: Qa at jun ma tz'ok ttz'aqsa'n juntl yol ti'j ju yol tz'ib'an tuj u'j lu, ktzajel tq'o'n Dios k'ixb'isab'l tib'aj, aqeju k'ixb'isab'l tz'ib'an tuj u'j lu.

19Ex qa at jun ma tz'el q'inte jun tyol Dios tz'ib'an tuj tu'jil lu, k'elel ti'n Dios toklen ti'j ju tze' te chwinqlal. Ex minti'tl toklen ti'j ju nintz tnam xjan. Tkyaqil jlu tz'ib'an ti'j tuj u'j lu.

20Aju in chik'b'ante ti'j tkyaqil jlu in tma'n:

—Ax tok, chin ul naje.

B'ant-xwit ikju. Tzaja Qajaw Jesús.

21Aju t-xtalb'il Qajaw Jesucrist tenwt kyuk'ile kykyaqile. Ikxwitju.