Proverbios 17 - Mam Huehuetenango New Ortography

1Mas b'a'n tu'n qwa'n tuj txub'txaj, maske minti' tb'el qwa, twitzju tu'n tkub' qq'o'n jun nintz wa'n ex at q'oj qxol.

2Aju majen at tnab'l kkawil tib'aj tk'wa'l tpatrón, aju k'wa'l ch'ixb'ajilxix tb'inchb'en, ex aju majen lu at toklen ti'j ju etzb'il junx kyuk'il qe txqantl tk'wa'l tpatrón.

3Aju q'an pwaq tuk'ix saq pwaq, tu'n q'aq' in che b'aj saqsa'n, ax ikxtzun in b'aj tmalo'n Qman aju t-ximb'etz xjal.

4Qe xjal b'inchal mya b'a'n ex nik'al yol in xi kyq'o'n kywi' kyi'j yol mya b'a'n.

5Aju xjal in xmayin ti'j meb'a, ax ikx in xmayin ti'j Dios aju B'inchalte te; ex aju xjal in jaw tzalaj ti'j ju mya b'a'n in tzaj ti'j juntl, mlay tzik'x ti'j tu'n mi'n tkub' tcastiw.

6Qe tal kychman tij xjal in che ok te jun tzalajb'il te kye; ex qe mamb'aj in che ok te jun tzalajb'il kye kyk'wa'l.

7Aju xjal minti' tnab'l, mya tuj tumel tu'n tyolin kyi'j nmaq yol, ex jun xjal ma' toklen, mya tuj tumel tu'n tyolin tuk'il sb'ub'l.

8Aju xjal in xi oyinte pwaq te juntl, tuj twitz qa at tipumal pwaq tu'n tkamb'ante noq alkye tajb'il, ex tkyaqilju in b'ant tu'n b'a'n nne'la te te.

9Aju xjal nnik'x ti'j tu'n aju mya b'a'n in b'inchanjtz ti'j, in ten tmojb'ab'l tib' kyuk'il txqantl; atzunju xjal in b'aj tyolin qe kypaltil xjal, tu'nx in che el laq'e' qe tamiw ti'j.

10Nim tajb'en te jun xjal at tnab'l ok t-xi kawin tu'n juntl twitzju tu'n t-xi jato'n jun syent tasyal jun xjal minti' tnab'l.

11Aju xjal mib'an b'in o'kx in jyon ti'j q'oj, ex tzul sama'n jun sanjel te k'ixb'isalte.

12Maslo b'a'n tu'n qok noj twitz jun ttxu' oso otoq tzaj tq'oj tu'n tlaj otoq che el q'i'n qe tal, twitzju tu'n qk'ulb'ante qib' tuk'il jun xjal minti' tnab'l ex tq'on tib' tuj tchkyinib'il.

13Mlayx tz'el tpa'n tib' aju mya b'a'n ti'j tja xjal aju in aj tq'o'n mya b'a'n te t-xel ju b'a'n.

14Aju xjal in tzaj jyonte q'oj junx ta' jlu ik tza'n nne'tz pax jun a' ex nim in naj tu'n; mas b'a'n tu'n tel oqa na'nxtoq t-xi' q'oj tuj tilil.

15Aju tu'n mi'n tkub' t-sentens jun xjal at til ex tu'n tkub' t-sentens jun xjal minti' til, kykab'il jlu minti' in tzalaj Qman ti'j.

16¿Ti tajb'en te xjal minti' tnab'l qa taj tu'n tlaq'onte ju nab'l tu'n tpwaq ex minti' tojtzqib'l?

17Aju tamiw jun xjal kukx in ten tk'ujlalil ti'j, ex ok ttzaj jun mya b'a'n ti'j, nno'k tamiw ik tza'n jun terman.

18Aju xjal minti' tnab'l in kyaj we' ti'j tk'as tamiw, ex in kyaj ten k'as tuj tkwent.

19Aju xjal nim tgan tu'n tq'ojin, ax ikx at tgan tu'n tb'inchante il; ex aju xjal in b'aj tyolin tib', tu'nx in tzaj ti'n jun xitb'il tib'aj.

20Aju xjal jumajx ta' tnab'l tuj mya b'a'n, mlayx knet ju b'a'n tu'n; ex aju xjal jawni yolin, ktzajel mya b'a'n tib'aj.

21Aju k'wa'lb'aj mib'an niman, b'is in tzaj ti'j tman tu'n; ex aju k'wa'lb'aj minti' tnab'l, minti' in tzalaj tma'n tu'n.

22Qa at tzalajb'il tuj tanmi xjal, a jlu mer ik tza'n jun q'anb'il te te, qatzun in b'isun, in b'aj tipun t-ximlal tu'n.

23Aju xjal mya b'a'n in xi tk'mo'n qe oyaj tuj ewaj, tu'ntzun mi'n tkub' tq'o'n kycastiw qe xjal at kyil.

24Aju xjal at tnab'l, ax tkub' ojtzqib'l twitz, atzunju xjal minti' tnab'l, noq in ch'expaje' t-ximb'etz.

25Aju k'wa'lb'aj minti' tnab'l in tzaj tb'is tman tu'n, ex in tzaj ta'w tuj tanmi ttxu' tu'n.

26Ax tok mya b'a'n tu'n tkub' t-sentens jun xjal minti' til, ax ikx mya b'a'n tu'n tb'aj asyalit jun xjal ma' toklen in tb'incha'n aju tz'aqlxix.

27Aju xjal at tnab'l, mya nim yol in yolin ti'j, ex aju xjal at tojtzqib'l, mya jurat in jaw kyaqpaj.

28Qa ma kub' txule' ju xjal minti' tnab'l ex qa minti' ma q'ajt, nno'k q'o'n kyu'n xjal mer ik tza'n at tnab'l.