Números 13 - Mam Huehuetenango New Ortography

E je'x t-sama'n Moisés qe xjal ke'yil tx'otx' Canaán Deuteronomio 1.19-25

1Tzaj yolin Qman tuk'il Moisés ex tma:

2Samanxa junjun xinaq ke'yilte tx'otx' Canaán aju kxel nq'o'ne kye aj Israel. Samanxa junjun xinaq ma' kyoklen, jun kyxol teyle junjun k'loj aj Israel.

3E je'xtzun t-sama'n Moisés tej ate'toq tuj tzqij tx'otx' Parán, ik tza'nx otoq tma Qman. Kykyaqil qe xinaq e je'x sama'n, nejenel qe kyxol aj Israel,

4ex atzun qe jlu: Kyxol tiyjil Rubén, a Samúa xi', aju tky'ajal Zacur;

5kyxol tiyjil Simeón, a Safat xi', aju tky'ajal Hori;

6kyxol tiyjil Judá, a Caleb xi', aju tky'ajal Jefone;

7kyxol tiyjil Isacar, a Igal xi', aju tky'ajal José;

8kyxol tiyjil Efraín, a Oseas xi', aju tky'ajal Nun;

9kyxol tiyjil Benjamín, a Palti xi', aju tky'ajal Rafú;

10kyxol tiyjil Zabulón, a Gadiel xi', aju tky'ajal Sodi;

11kyxol tiyjil José, ti'j tiyjil Manasés, a Gadi xi', aju tky'ajal Susi;

12kyxol tiyjil Dan, a Amiel xi', aju tky'ajal Gemali;

13kyxol tiyjil Aser, a Setur xi', aju tky'ajal Micael;

14kyxol tiyjil Neftalí, a Nahbi xi', aju tky'ajal Vapsi;

15kyxol tiyjil Gad, a Geuel xi', aju tky'ajal Maqui.

16Atzun kyb'i qe xinaq e je'x t-sama'n Moisés ke'yilte tx'otx'. B'aj tch'expu'n Moisés tb'i Oseas aju tky'ajal Nun, ex Josué tb'i ok tq'o'n.

17E je'xtzun t-sama'n Moisés qe xinaq lu ke'yilte tx'otx' Canaán ex xi tma'n kye:

—Kyja' kyjaxe tuj lugar Néguev ex kyjaxe tuj tiwitz tx'otx'.

18Kyke'yin b'aje tx'otx' tza'n tten, ax ikx qe xjal najl tuj, qa at nim kyipun ex qa minti' kyipun, qa nim kyb'aj ex qa nik'xi kyb'aj.

19Kyke'yin b'aje qe tnam, qa at muro tok kyi'j ex qa minti', ex aju tx'otx' jatum najl qe xjal, qa b'a'n ex qa mya b'a'n,

20qa b'a'n ttzaj awal tuj tx'otx' ex qa mi'n, ex qa at tze' tuj ex qa minti'. Kyuwx kyk'u'je, kyi'ntze junjun twitz awal at tuj tx'otx', chi Moisés kye.

Aku tq'ijlalil tu'n tjaw chmet tnejel twitz uva.

21E je'xtzun qe xinaq ex b'aj kyke'yin tx'otx', xi'x qe' kyu'n tuj tzqij tx'otx' Zin tuj tumlal tnayaj q'ij, ex e japun b'aj max tuj Lugar Rehob ttxa'n tnam Hamat tuj tumlal tb'anq'ab' q'ij.

22E ik' tuj tx'otx' Néguev ex e pon max tuj tnam Hebrón. Atzun najltoq Ahimán tuk'ix Sesai ex Talmai, aqe jlu tiyjil Anac qe. Otoq b'ant wuq ab'q'i tb'antlen tnam Hebrón tej tb'ant tnam Zoán tuj Egipto.

23E pon max jatum ta' tq'ab' xaq Escol, ex atzun el kytx'emin jun tq'ab' uva nim twitz tok ti'j, oktzun kyyob'in ti'j jun tze' ex kab'e xjal tzaj q'inte te. Ax ikx tzaj kyi'n karnad ẍoq' tuk'ix higo.

24Escol tb'i tq'ab' xaq ok kyq'o'n, tu'nju atzun el kytx'emin aj Israel aju rasim uva lu.

25Tuj 40 q'ij b'aj kyke'yin tx'otx', ex tb'ajlenxi jlu e ajtztzun meltz'aj

26tu'n kyul tuj lugar Cades tuj tzqij tx'otx' Parán. Atzun ate'toq Moisés tuk'ix Aarón ex kykyaqil aj Israel. Xi kytx'olb'a'n kye aju otoq kyil ti'j tx'otx' ex xi kyyek'un kye aju twitz awal in tzaj tuj tx'otx'.

27Ax ikx xi kyma'n te Moisés:

—Ma qox aje tuj tx'otx' jatum o'x t-sama'na. Axix tok aju tx'otx' lu q'inun tx'otx' ex tb'anilxix, ex atzun qe twitz awal in tq'o'n tx'otx' jlu,

28ex qe xjal najl ma chixin at nim kyipun ex qe tnam nimaqxix qe ex at muro tok kyi'j. Ex mya o'kx jlu, ax ikx ma qile qe xjal ma' kywa'l tiyjil Anac qe.

29Tuj Néguev, atzun najl qe aj Amalec, ex tuj tiwitz tx'otx', atzun najl qe aj Heteo, qe aj Jebuseo ex qe aj Amorreo, atzun niqayin ttzi mar ex ttzi nima Jordán, atzun najl qe aj Canaán.

30Atzunte Caleb xi tma'n tu'n mi'n kyq'ajt tnam xjal ate' twitz Moisés ex tma:

—Qo'qe tu'n tkamb'et tx'otx' lu qu'n. Jaku kamb'et qu'n.

31Atzun qeju e je'x aj tuk'il ke'yilte tx'otx' tzaj kytzaq'we'n:

—Mi'n, mlay qo xkye' kyi'j xjal lu, ex mas at kyipun qwitz.

32Ex e ok ten q'malte kye aj Israel qa aju tx'otx' otoq che'x aj ke'yilte jumajx mya b'a'n te, ex xi kyma'n:

—Aju tx'otx' o'x aje ke'yilte, jumajx xob'ajil, ex kykyaqil xinaq o qile ma chixin ma' kywa'l.

33Ax ikx o qile qe xjal ma' kywa'l aqeju tiyjil Anac. Tej qkub' tene kytxlaj o qna'ye mer ik tza'n ẍplon qo'ye, ax ikxlo o e'laye tuj kywitz tej kyke'yinte qo'ye.