Jeremías 8 - Mam Huehuetenango New Ortography

1Chi Qman in tma'n kyja': Tuj tq'ijlalil tzul k'eletz q'i'n kyb'aqil qtzan kyrey aj Judá tuj kymuqb'il, tuk'ix kyb'aqil qe nejenel, kyb'aqil qe pal, kyb'aqil qe t-sanjel Dios ex kyb'aqil kykyaqil xjal e anq'in tuj Jerusalén.

2Ex che kyjel kypalb'a'n ti'j tqan q'ij, ti'j tqan xjaw ex ti'j tqan che'w, ex kyi'jtzun qe jlu e tzalaj, e ajb'en kye, e ok lpe' kyi'j, e ok ten qanil kyxjel kye, ex e k'ulun kywitz. Mi jun kjawil q'inte kyb'aqil tu'n kyku'x maqu'n juntl maj, ax che kyjel ten twitz tx'otx' ik tza'n kytxa' alumaj.

3Kykyaqil aj Judá puro mya b'a'n qe, aqeju otoq che kyaj anq'in tuj noq alkyex lugar jatum otoq che pon nsputune, mas ok kyajb'e tu'n kykyim twitzju tu'n kyanq'intl. Aqine Dios Tajaw Tkyaqil in chin q'mante jlu.

Kub' kycastiw aj Israel tu'nju minti'tl e k'ulun te Dios

4Aya Jeremías, q'manxa kye xjal kyja': Chi Qman in tma'n: Qa at jun ma jaw tz'aq, ¿myape jurat naj in jaw we'? Qa at jun nne'l tzpet ti'j tb'e, ¿myape jurat naj nna'jtz meltz'aj tu'n tknet b'e tu'n?

5Kyja'tzun, ¿tiqu'n ma chin kyaj kykoline? ¿Tiqu'n te jumajx ma tz'el kypa'n kyib'e wi'je aqeye aj Jerusalén? Kukx in che nik'ane yol nwitze ex kyk'i'ye tu'n kyajtz meltz'aje wuk'ile.

6O chin kub' txule'ye b'ilte, ex minti' o nb'iye jun xjal in yolin tuj tumelxix, mi a'l jun nna'jtz ti'j tanmi tu'n mi'n tb'inchante mya b'a'n, ex qa tu'n ttzaj tma'n ¿titzun o nb'inchaye? chiwt. Kykyaqil in xi kyi'n kyex kyb'e, ik kyten ik tza'n qe chej in che ojqelan tuj q'oj.

7Qe xulen b'a'n kyu'n jtoj tu'n kyxi' tuj juntl lugar ex jtoj tu'n kyajtz meltz'aj. Qe wilwil, qe xtx'a'yil ex qe garza b'a'n kyu'n jtoj b'a'n kyxi' tuj juntl lugar, atzun kyeye, aqeye xjal etzan wu'ne, minti' ojtzqi'n qe nleye kyu'ne.

8¿Tza'n tten in xi kyma'ne: At qnab'le ex at tley Qman quk'ile? Ex kina ma kub' kytz'ib'an aj tz'ib'al nik'aj yol ex ma ch'expet ley kyu'n.

9Ex qe xjal lu at kynab'l, ktzajel kych'ixwi, ktzajel t-xob'il kyi'j ex che xel q'i'n pres. ¿Jatumtzun ta' qa at kynab'l tu'nju ma tz'el kyik'un nyole?

10Kyja'tzun kxel nq'o'ne kyxu'jil kye juntl xinaq, ex junxitl k'okel te tajwil kytx'otx', ex kykyaqil xjal o'kx tok kyk'u'j ti'j tu'n tknet kyq'inumab'l mya tuj tumel; tza'nx qe t-sanjel Dios ax ikx qe pal, kykyaqil in che sb'un.

11Noq ch'in remey nno'k kyq'o'n ti'j ẍil tok kyi'j qe xjal etzan wu'ne, ex in kyma'n qa tkyaqil b'a'n ta' ex mya b'a'n ta'.

12¿Ope tzaj kych'ixwi ti'j kyb'inchb'en mya b'a'n? Minti' tzaj kych'ixwi, minti' o japun kykyaqal tu'n tlaj kych'ixwi. Kyja'tzun ok tkub' kycastiw wu'ne, che b'el tz'aq ex che najel ik tza'n ma che naj txqan. Aqine Dios in chin q'mante jlu.

13Chi Qman: Che b'ajel naj wu'ne, mi jun twitz uva tu'n tkyaj ten twi' tqan ex mi jun twitz higo tu'n tkyaj ten, ex ktzqijel kyxaq. Tkyaqilju o txi nq'o'ne kye, k'elel q'i'n.

14Atzun qe xjal ok kyma': ¿Tiqu'n kukx tkub' qyo'n tzalu? Qo' qe qkyaqil kyuj qe tnam tok muro kyi'j tu'ntzun qkyim ma chixin, porke ma b'ant ti'j tu'n Qman aju Qdios tu'n qkyim; ma tzaj tq'o'n a' te qk'a' xi'yni venen tuj, tu'nju ma qo b'inchan il twitz.

15Ma qo ayon ti'j tu'n qten tuj txub'txaj ex minti' jun b'a'n ma qk'am, ma qo ayon ti'j tu'n qb'anix ex noq xob'ajil ma tzaj qi'j.

16Lu qe aj q'oj kyja' kytzaj, ma b'injtz tq'ajq'ajel kywi' qe chej in che xejin max tuj tnam Dan. Ok in che jaw wijin qe kychej, b'i'x in tzaj lu'lun tkyaqil tx'otx' kyu'n. Che ul xitul qtanmi tuk'ix tkyaqilju at tuj, che b'ajel xitj qe tnam ex che najel qe xjal najl kyuj, che chi.

17Chi Qman kyja': Che xel nsama'ne lob'aj kyi'je, aqeju in che kyim naj xjal kyu'n, ex aqe jlu mlay b'ant kyxmoxinjtz kyu'n xjal at kynab'l tu'n kyxmoxin lob'aj; che okel tzoqpaj kyi'je ex che okel tx'a'ne kyu'n.

Tzaj ta'w tuj tanmi Jeremías ti'j ju in b'aj kyi'j t-xjalil

18Aju ta'w tzaj wi'je minti' q'anb'il ti'j ex ma b'aj tipun wanmiye.

19Kyuj kykyaqil tnam in b'injtz in che sch'in qe nxjalile tu'n k'ixk'oj. ¿Mi a'lpetzun Qman at tuj tnam Sión? ¿Myapetzun a ta' kyrey? Che chi. Atzunte Qman in tzaj ttzaq'we'n: ¿Tiqu'n ma kyb'incha tu'n ttzaj nq'oje kyi'j, tu'nju in che k'ulun kywitz qe tilb'ilal kydios xjal te junxitl tnam, aqeju minti' kyajb'en? Chi Dios.

20Ma b'aj tq'ijlalil koresma ex ma b'aj tq'ijlalil tu'n tjaw chmet twitz awal, atzun qe na'nx qklet.

21Tu'nju nim yajb'il nnik'x kyu'n nxjalile, ax ikx weye nim nnik'x wu'ne, ma tzaj b'is wi'je ex xob'ajil.

22¿Minti'pelo jun q'anb'il at tuj Galaad? ¿Minti'pelo jun xjal b'a'n q'anan ma chixin? ¿Tiqu'ntzun minti' ma che b'anix qe nxjalile? Chi Jeremías.