1Ok tchmo'n Ben-adad aju rey te Siria kykyaqil t-soldad kyuk'ix 32 rey, aqeju otoq moje' kyyol tuk'il, kyuk'ix qe kychej ex kycarwaj in che ajb'en tuj q'oj, e je'xtzun jatum ta' tnam Samaria, b'aj kytxolb'an kyib' ti'jele ex e ok tzoqpaj ti'j.
2Ex e je'x t-sama'n qe sanjel tuj tnam lu tu'n t-xi kyma'n te Acab aju rey kye aj Israel kyja': Chi Ben-adad in tma'n:
3Aju saq pwaq ex q'an pwaq at tuk'ila, weye qe, ax ikx qe t-xu'jila kyuk'ix qe tky'ajala mas tb'anilxix, weye qe.
4Atzunte rey kye aj Israel ajtz t-sama'n ju tzaq'web'l kyja': Ik tza'nx ma tmaya tat rey, aqine tuk'ix tkyaqilju at weye k'okel te teya.
5E je'x juntl maj qe sanjel tuk'il Acab ex xi kyma'n te: Chi Ben-adad in tma'n: O txi nma'ne teya tu'n ttzaj tq'o'na weye aju saq pwaq ex q'an pwaq at tuk'ila, kyuk'ix qe t-xu'jila ex qe tky'ajala.
6Mya o'kx jlu, ax ikx ax or nchi'j che xel nsama'ne qe xjal at kyoklen ntxlaje, tu'n tb'aj kyjyo'n tuj tjaya ex tuj kyja qe xjal at kyoklen ttxlaja, ex tkyaqil aju wi'yilxix at teya, ktzajel kyi'n, chi Ben-adad, che chi sanjel.
7Atzunte rey kye aj Israel e tzaj ttxko'n kykyaqil kytijil aj Israel ex xi tma'n kye:
—Kyb'intze, aju xjal lu in jyon tumel tu'n tb'inchante mya b'a'n qi'j, atzun weye minti' ma kub' nxk'ayine tu'n kyxi nq'o'ne qe nxu'jile te, kyuk'ix qe nky'ajale ex tuk'ix saq pwaq ex q'an pwaq at wuk'ile, chi Acab.
8—Mi'n txi tnimana ex mi'n tb'inchaya aju ktzajel tqanin teya, che chi qe tij xjal, xi kytzaq'we'n. Ex ax kyyol kykyaqil xjal.
9Xitzun tma'n Acab kye qe xjal otoq che tzaj t-sama'n Ben-adad:
—Kyq'manxe te tat rey kyja': Jaku b'ant wu'ne tkyaqil aju tzaj tqanin nej, atzunju in tzaj tqanin ja'lo, mlay nb'inchaye, che chikuye te.
Atzun kye sanjel xi kyi'n ju tzaq'web'l lu tuk'il Ben-adad.
10Tzaj tma'ntl Ben-adad te Acab kyja': Awt qe ndiose che kub' q'onte ncastiwoye kyuwxix wen qa mi'n ma tza'jix tnam Samaria wu'ne, ex mlaylo kanun jun yub' ttza'jil te junjun soldad aqeju lepcho'k wi'je.
11Atzunte rey kye aj Israel aj ttzaq'we'ntl kyja': Mi'n jaw tniman tib'a qa ma kamb'ana tuj q'oj ex na'nx tkamb'ana.
12Tejtzun tb'inte Ben-adad aju tzaq'web'l lu, in k'antoq q'e'n kyuk'il txqantl rey kyuj qe ja xb'alun otoq jaw kyb'incha'n. Xitzun tma'n kye qe xjal at kyoklen ttxlaj: Kyb'incham kytene. Kykyaqiltzun b'ant kyten tu'n kyok tzoqpaj ti'j tnam.
13Pontzun jun t-sanjel Dios tuk'il Acab aju rey kye aj Israel, ex xi tma'n te:
—Chi Qman ma tma: Maske in tila nimxix kyajlal aj q'oj ti'ja, ex aqine chin xel q'onte kye tuj tq'ab'a ja'lo, tu'ntzun tel tnik'a ti'j qa aqine Dios aju Kymane.
14—¿Al u'n kb'el kyi'j qe jlu? Chi Acab xi tqanin.
Xi ttzaq'we'n t-sanjel Dios:
—Kyu'n qe ku'xun, aqeju in che onin kye qe gobernador kye junjun partament, chi Qman ma tma.
—¿Alkye k'okel tzoqpaj tnejel? Chi Acab xi tqanintl.
—Aya, chi t-sanjel Dios, xi ttzaq'we'n.
15Atzunte Acab ik' twitz kyi'j qe ku'xun in che onin kyi'j qe gobernador kye junjun partament, attoq kab' syent tuk' 32 kyb'aj, ax ikx e ok tchmo'n kykyaqil qe soldad aj Israel, japun wuq mil kyb'aj.
16E etztzun qe soldad lu te chilkuq'ij, atzunte Ben-adad kyuk'ix 32 rey aqeju otoq moje' kyyol tuk'il, kukxtoq kyk'an q'e'n kyuj qe xb'alun ja.
17Tnejel e etz qe onil kye qe gobernador. Tejtzun tb'inte Ben-adad aju tqanil qa attoq junjun xinaq otoq che etz tuj tnam Samaria,
18xi tma'n kyja': Qa ma che etz tuk'il jun tqanil tu'n twe' q'oj ex qa tu'n tok q'oj, ex wajb'ile tu'n tul kyi'ne tzalu, itz'x qe.
19Aqeju onil kye qe gobernador e etz tuj tnam Samaria, ex lepcho'k qe soldad kyi'j.
20Ex teyle junjun kye kub' tb'yo'n jun aj q'oj aju ok tzoqpaj kyi'j, atzun kye aj Siria e je'l oq; e je'xtzun lpe' qe aj Israel kyi'j, atzunte Ben-adad aju rey kye aj Siria o klet tej tel oq tjax tib'aj tchej, ex kyuk'ix junjuntl t-soldad kyjaxsa'n kyib'aj kychej.
21Etztzun rey Acab, ul kyuk'il qe soldad aj Israel. E oktzun tzoqpaj kyi'j qe soldad aj Siria kyjax kyib'aj chej, ex kyi'j qeju kyjax kyuj carwaj in che ajb'en tuj q'oj. Kub' kyi'j kyu'n ex nimku aj Siria e kyim tuj q'oj lu.
22Te tib'ajxi pon juntl maj t-sanjel Dios tuk'il rey kye aj Israel ex xi tma'n te:
—B'inchama kyten qe t-soldadiya, ex cheb'axix ximana ti'j alkye kb'antel tu'na, porke tuj juntl ab'q'i tzul meltz'aj juntl maj aju rey kye aj Siria tu'n tok tzoqpaj ti'ja.
23Qe xjal at kyoklen ttxlaj rey kye aj Siria xi kyma'n te kyja':
—Qe kydios aj Israel atzun ate' kywi' qe witz; kyja'tzun ma qo kub' kyu'n. Ex qa ma qo q'ojin kyuk'il tuj chq'ajlaj, segur qo kamb'al kyi'j.
24Aju tu'n tb'ant tu'na ja'lo Tat Rey, q'i'n ela kyoklen qe rey ex q'o'n oka qe xjal at kyoklen ttxlaja te kyxel,
25ex tu'n kyb'aj tchmo'na txqantl soldad ik tza'nx qeju o che kub', ax ikx qe chej ex qe carwaj ik tza'nx qeju ate' nej. Ex qo q'ojl kyuk'il tuj chq'ajlaj ex qo kamb'al kyi'j.
Atzunte Ben-adad xi tb'i'n ju consej lu ex o tb'incha ikju.
26Tb'ajlenxi jun ab'q'i ik' twitz Ben-adad kyi'j qe t-soldad, ex kub' b'e kyu'n tu'n kypon tuj tnam Afec tb'i, tu'n kyq'ojin kyi'j aj Israel.
27Ax ikx kye aj Israel ik' kywitz kyi'j qe kysoldad ex xi kyq'o'n tkyaqil aju at tajb'en kye, ex e je'xtzun tu'n kyk'ulb'ante kyib' kyuk'il aj q'oj. E kub'tzun ten qe kywitz aj Siria, mer ik tza'n kab'e b'yuj chip qe, ex atzun kye aj Siria nojni tuj tkyaqil lugar lu kyu'n.
28Ex pontzun t-sanjel Dios tuk'il rey kye aj Israel ex xi tma'n te:
—Chi Qman ma tma kyja': Maske ma kyma aj Siria qa aqine jun Dios o'kx ta' twi witz, ex myatzun ta' tuj chq'ajlaj, che xel nq'o'ne kykyaqil qe jlu tuj tq'ab'a, tu'ntzun tel kynik'e ti'j, axix tok aqine Dios aju Kymane.
29Wuq q'ij e kub' ten aj Siria tuj jun pak' ex qe aj Israel tuj juntl pak', ex tujx twuqin q'ij tzyet q'oj kyu'n. Tuj q'ij lu kub' kyb'yo'n aj Israel jun syent mil soldad aj Siria, aqeju in che b'et tu'n kyqan.
30Atzun qe txqantl soldad e je'l oq tu'n kypon tuj tnam Afec, ex aju muro tok ti'j ju tnam tzaj tz'aq kyib'aj 27 mil soldad, aqeju otoq che tzoqpaj nej. Ax ikx te Ben-adad pon tuj tnam lu ex o yut'ut'un tik' kyuj qe ja tu'n tklet.
31Qe xjal in che ajb'entoq te xi kyma'n kyja':
—O qb'iye aqeju rey kye aj Israel in tzaj q'aq'an kyk'u'j kyi'j xjal; kyja'tzun k'okel qq'o'ne qxb'alune ch'i'x twitz, tuk'ix jun saqb'aq kb'el ten qqule, ex qo xe'ltzune twitz rey kye aj Israel, qape jaku kyaj anq'ina tu'n.
32Oktzun kyq'o'n kyxb'alun ch'i'x twitz ex tuk'ix jun saqb'aq kub' kyq'o'n kyqul, e pontzun twitz rey kye aj Israel ex xi kyma'n te kyja':
—Tat Rey, in kub'san Ben-adad twitza tu'n mi'n tkub' tb'yo'na.
Atzunte Acab xi ttzaq'we'n:
—¿Maj itz'xpetzun aju wermaniye Ben-adad?
33Atzun kye xinaq e jaw tzalaj tej kyb'inte ju yol lu ex jurat xi kytzaq'we'n:
—Tat Rey, ate Ben-adad termaniya.
—Chuxni kyxi'ye q'ilte te, chi Acab xi ttzaq'we'n.
Pontzun Ben-adad twitz Acab, ex atzunte Acab jax tq'o'n tuj tcarwaj.
34Xitzun tma'n Ben-adad te Acab:
—Jaku che aj nq'o'ne juntl maj qe tnam e je'l ti'n qtzan nmane te qtzan tmana, ex jaku ten tk'a'ẍa tuj Damasco, ik tza'n tej tten tk'a'ẍ qtzan nmane tuj Samaria, chi Ben-adad.
Atzunte Acab xi ttzaq'we'n:
—Qa ikju, jaku txi ntzoqpi'ne tu'n taj meltz'aja.
Kyja'tzun tten, b'ant ti'j jun yol tu'n Acab tuk'il Ben-adad, ex xi ttzoqpi'n tu'n taj meltz'aj.
35Attoq jun xinaq kyxol qe t-sanjel Dios tzaj tma'n Dios te tu'n t-xi tma'n te jun tuk'il kyja':
—B'inchama xtalb'il chin tb'yo'n oka.
Atzunte juntl minti' kub' tuj twitz tu'n tok tb'yo'n tuk'il.
36Xitzun tma'n ju t-sanjel Dios te tuk'il:
—Tu'nju minti' ma txi tnimana aju ma tma Qman, o'kx ok tel tpa'n tib'a wi'je k'okel tzoqpaj jun b'alun ti'ja.
Tejtzun tel tpa'n tib' ju xjal lu ti'j t-sanjel Dios, etz jun b'alun tuj tb'e ex kub' b'yo'n tu'n.
37Te tib'ajxi ok noj t-sanjel Dios ti'j juntl xinaq, ax ikx xi tma'n te tu'n tok k'ixb'isa'n tu'n, atzunte xinaq lu ok ten k'ixb'isalte te ex b'i'x ok jun ẍil ti'j tu'n.
38Xi'tzun t-sanjel Dios ayol ti'j rey max tuj b'e, ok tmaqsi'n twitz tu'n jun xb'alun tu'ntzun mi'n tel tnik' rey ti'j.
39Tejtzun tik' rey, xitzun tma'n t-sanjel Dios te tuk'il tq'ajq'ajel twi' kyuwxix:
—Tat Rey, aqine ajb'el teya tej ẍin ex b'ete jatum nno'k q'oj, etz jun soldad ex tzaj ti'n jun pres wuk'ile. Tzaj tma'n weye tu'n tkyaj ten ju pres lu tuj nkwente, ax ikx tzaj tma'n kyja': Qa ma txi tzoqpaj tu'na, aya kymel te t-xel, ex qa mi'n, il ti'j tu'n t-xi tchjo'na 75 libr saq pwaq te tmulta.
40Ex ma txi tzoqpaj pres wu'ne tej matoq in chin b'inchane juntl ti'xti.
Atzunte rey kye aj Israel xi ttzaq'we'n:
—Axa ma q'mante qa at tila, ex ma tmaya aju t-sentensa tu'n tkub'.
41Atzunte t-sanjel Dios jurat naj el ti'n aju xb'alun toksa'n twitz. Eltzun tnik' rey ti'j qa jun t-sanjel Dios jlu.
42Xitzun tma'n t-sanjel Dios te rey kyja':
—Atzun jlu ma tma Qman: Tu'nju ma txi ttzoqpi'na aju xinaq otoq kub' t-sentens wu'ne tu'n tkyim, atzun ja'lo aya kymel te t-xel, ex aqeju t-xjalila ok che najel te kyxel qe t-xjalil.
43Ajtzun meltz'aj ju rey kye aj Israel tu'n tpon tja tuj Samaria in b'isun ex in q'ojl wen.
Who We AreWhat We EelieveWhat We Do
2025 by iamachristian.org,Inc All rights reserved.
