Salmos 22 - Mam Huehuetenango New Ortography

Jun na'j Dios tu'n b'is ex jun aq'b'il chjonteB'itz tu'n David

1Nman Dios, Nman Dios, ¿tiqu'n ma chin kyaj tkolina? ¿Tiqu'n mi'n saja kolol wi'je? ¿Tiqu'n minti' in tzaj tq'o'na twi'ya wi'je ok in chin ayayane?

2Aya Nman Dios, in chin kub'sane twitza q'ijl ex qonik'an, ex minti' in tzaj ttzaq'we'na, minti' ch'in ojlab'l weye.

3Ex aya xjan; q'uqliya tuj tq'uqb'ila tu'n tkawina ex tu'n tjaw nimsa'na kyu'n aj Israel.

4Qe qxe'chele o qe' kyk'u'j ti'ja ex o che kolpet tu'na;

5xi kyqanin onb'il teya ex e tzoqpet tu'na. O qe' kyk'u'j ti'ja ex tu'n jlu minti' kub' kych'ixwi.

6Ja'lo mer ik tza'n mya xjal qine, ma chin oke ik tza'n jun tal ẍuq', ma chin el ik'une kyu'n xjal.

7Qeju in che ke'yin weye in che xmayin wi'je, in xi kyyukun kywi' te jun techal kyxmayb'il,

8ex in kyma'n: O qe' tk'u'j ti'j Qman, ¿tiqu'ntzun minti' ma tzul kolol ti'j qa ax tok at tgan ti'j? Che chi.

9Ex tu'na in ul itz'je ti'j ntxu'ye, ex aya q'uqb'ante nk'u'je tej ntene ttzi t-xu'k ntxu'ye.

10Tej na'nxtoq wul itz'je kwentin qine tu'na, ex axa Ndiosa tej atinxtoqe tuj talb'il ntxu'ye.

11Mi'n tz'el tpa'n tib'a wi'je, ex ch'ix ttzaj jun b'is wib'aje ex mi a'l jun onil weye.

12Ma b'aj kytxolb'an kyib' qe aj q'oj wi'je, mer ik tza'n qe tor puro jawni ate' tuj tx'otx' Basán.

13In che tzanun wi'je ik tza'n qe b'alun puro tx'u'j, ex in xi kyk'ab'in tuj kytzi' tu'n kytzaj lipan wi'je.

14Ma chin oke ik tza'n a' nne'l qojl, ex ma che q'ulpaj qe nb'aqile. Aju wanmiye in kub' ulj max wuje mer ik tza'n xkab'.

15Puro tzqij tuj ntzi'ye, mer ik tza'n xk'o'n, ex b'i'x ma tz'ok tlak'on tib' waq'e twitz nk'o'ne. Ma chin ku'x tq'o'na tuj kymuqb'il kyimni.

16At jun k'loj xjal mya b'a'n ma b'aj kytxolb'an kyib' wi'je, ik tza'n tx'yan tu'n kyok tzoqpaj wi'je. Ma b'aj kyxyu'n ti'j nq'ab'e ex ti'j nqane.

17Q'ancha'lxix qe nb'aqile. Minti' nne'l kyi'n kywitz aj q'oj wi'je.

18Ma jaw kyi'n swert ti'j nxb'alune ex ma b'aj kysipan kyxolx.

19Ex aya Nman q'ol wipumale, mi'n tz'el laq'e'ya wi'je, tzaj naja onil weye.

20Chin tkloma tu'n mi'n nkyime tu'n spad, ex mi'n txi tq'o'na amb'il tu'n nkub'e kyu'n qe xjal mer tx'yan qe.

21Chin tkloma kye qe xjal mer b'alun qe, ex chin tkloma kye xjal mer at kykach ik tza'n qe tor.

22Kxel nma'ne tqanil ti'ja kye wermaniye, ex kxel nq'o'ne chjonte teya kyxol qeju in kub' kyb'uyin kyib'.

23Aqeye b'a'n che niman te Qman, kyq'onxe chjonte te; kykyaqil qeye tiyjil Jacob kynimsa'n jawe tb'i, che k'ulune kykyaqile twitz, aqeye tiyjil Israel.

24Minti' in che el tik'un qe xjal meb'a, ex minti' nnik' tna'l tu'n aju yajb'il kye, minti' nne'l tewan twitz kyi'j, ex in che tzaj tb'i'n ok in kyqanin onb'il.

25Ok tkub' kyb'uyin kyib' nim xjal etzan tu'na, kxel nq'o'ne chjonte teya kywitz, ti'j ju ma tb'inchaya, ex kywitz qeju in che niman teya kjapunel wu'ne aju o txi ntziyane teya.

26Qe xjal meb'a ok che wa'l okxi tnoj kyk'u'j, kxel kyq'o'n chjonte te Qman qeju in che jyon onb'il tuk'il, kukxwit che tzalaje.

27Aqeye xjal te tkyaqil k'loj kyiyjile, ex te tkyaqil tnam, ex kykyaqil xjal ttxa'npun tx'otx', tzulx Qman ti'j kyk'u'je ex kytzaje tuk'il; che ẍmejekuye twitz.

28Porke ate Qman aju rey ex a in kawin kyib'aj qe nasyon.

29Mok'ek kywi'ye ex che k'ulune o'kx te, kykyaqile aqeye at nim kyeye, ex kykyaqil qeju che kymel, ex mlay che anq'in kyu'nx kyib'.

30Qe wiyjile che ul itz'j te tib'ajxi che k'ulul te Qman ex mlay che q'ajen tu'n kyyolin ti'j;

31kxel kyma'n kye qeju che ul itz'j te tib'ajxi ti'j taq'unb'en Qman, qa ate Qman tz'aqlxix.