Isaías 21 - Mam Huehuetenango New Ortography

Aju yol o q'manjtz ti'j tnam Babilonia, tu'n tkub' xitj

1Aju yol o q'manjtz ti'j ju attoq ttzajel tuj lugar tzqij tx'otx' ttzi mar:

Ik tza'n kyq'iq' jb'al in tzaj tuj tnayaj q'ij, iktzun che tzajel aj q'oj tuj tzqij tx'otx' tuj lugar xob'ajilxix.

2Xob'ajilxix aju ma tzaj tyek'un Dios weye; aju xjal sb'ul kukx t-sb'un, aju xjal xitul kukx t-xitun. Kyjaxe aj Elam, atzun kyeye aj Media, kyok tzoqpaje kyi'j aj q'oj. Mlay txi nq'o'ne amb'il tu'n kukx kyyajlanjtz xjal kyu'n aj Babilonia.

3In lu'lun nximlale tu'n ta'w k'ixk'oj, in b'aj nẍokpin wib'e tu'n ta'w k'ixk'oj ik tza'n jun xu'j nnu'l itz'j tal, aju b'is minti' in tq'o'n amb'il tu'n t-xi nb'i'ne, aju xob'ajil in chin tmayo'n tu'n mi'n t-xi nke'yine.

4Tzpetni ta' nnab'le, in chin lu'lune tu'n xob'ajil. Aju wojlab'le te qale ok tchewix q'ij, aju in chin tzalajtoqe ti'j, ma tz'ok te jun xob'ajil te weye.

5Aju mes ma b'ant tten, ma kub' lik'un qe xb'alun te kyq'uqb'il xjal, ma tzyet nintz wa'n. Aqeye capitán che we'ktze, kyq'o'nke aseyt kyi'j qe maqb'il in che ajb'en tuj q'oj.

6Porke ma tzaj tma'n Qman weye kyja': Txi'ya ex q'on kyaja jun xq'uqil tu'n ttzaj tma'n tkyaqil aju ktila'.

7Qa ma til qe carwaj jawo'n kyu'n kab'chaj chej cabay ex qa ma til qe xjal kyjax kyib'aj qe bur ex qa qe chej camey, b'a'n tu'n t-xi tke'yinxix wen.

8Ex aju xjal tkyajsa'n xq'uqil jaw sch'in: Nman, ax atine tuj nlugare tkyaqil q'ij, ex tkyaqil qonik'an in chin xq'uqine.

9Lu tzul jun carwaj jawo'n kyu'n kab'e chej cabay ex ma nb'iye jun tq'ajq'ajel wib'aj kyja': Ma kub' xitj, ma kub' xitj Babilonia. Kykyaqil kyilb'ilal kydios ma che kub' tz'aq twitz tx'otx' ex b'i'x ma che kub' b'uchj, chi xjal.

10Aqeye nxjalile o che b'aj wab'ane ik tza'n triw, kxel nma'ne kyeye aju ma nb'iye te Qman aju Tajaw Tkyaqil, aju Kydios aj Israel.

Aju tqanil o q'manjtz ti'j ju ktzajel ti'j Edom

11Aju tqanil o q'manjtz ti'j ju attoq ttzajel ti'j tnam Edom:

At jun xjal ma tzaj q'ajt wi'je max tuj tnam Seir: Aya xq'uqil, ¿nik'pun atx taj tu'n tkub' q'ij? Aya xq'uqil, ¿nik'pun atx taj tu'n tkub' q'ij? Chi xjal.

12Ex atzunte xq'uqil ma tzaj ttzaq'we'n: Ch'ix tkub' q'ij, ax ikx ch'ix ttzaj qonik'an. Qa kyaje tu'n kyqanine ti'j, b'a'n tu'n t-xi kyqanine ex tu'n kyajtz meltz'aje juntl maj.

Aju yol o q'manjtz ti'j ju ktzajel ti'j Arabia

13Aju yol o q'manjtz ti'j ju attoq ttzajel ti'j Arabia:

Aqeye xjal aj Dedán in che b'ete tuj k'lojin, nne'x aq'b'il kyeye tjaq' chk'ul tuj tzqij tx'otx' tuj Arabia:

14Kyexe kanul kyi'j qeju at txqetle'n kyi'j ex kyq'onxe kyk'a a'. Aqeye xjal najl tuj tx'otx' Tema, kyexe kanul kyi'j qeju in che el oq ex kyq'onxe kywa.

15Porke in che el oq twitz spad, aju spad b'anin ttzi' wen, ex twitz ju xob'l plech b'anin tten tu'n t-xi t-xo'n plech, ex twitz ju q'oj xob'ajilxix.

16Tzaj tma'n Qman weye kyja': Tuj juntl ab'q'i ja'lo, mlay tzik' tib'aj, tloqtzun otoq b'aj tkyaqil aju toklen Cedar ma'xix wen.

17Ex nik'xi kyb'et qe xjal che kyjel ten, aqeju b'a'n che xo'n plech tu'n xob'l plech ex elni qe twitz q'oj, aqeju najl tuj Cedar. Ate Qman aju Kydios aj Israel ma q'mante jlu.