1Atzun ja'lo, aqeye aj Jerusalén kyb'incham kytene tu'n kyklonte kyib'e, porke ma b'aj kytxolb'an kyib' aj q'oj qi'j, ex tu'n tze' k'okel kyjato'n tq'o'tx aju nejenel kye aj Israel.
2Chi Qman in tma'n kyja': Atzun teya tnam Belén Efrata, maske tal ch'ina kyxol txqantl tnam tuj Judá, ex tuja tzul itz'j wu'ne jun kawil kyib'aj aj Israel, aju atxix ojtxi ttzajlen xe't t-xe'chel, chi Qman.
3Ex che kyjel tkolin Qman qe xjal etzan tu'n, okxi tul itz'j tal ju xu'j in ayon ti'j tu'n tul itz'j. Atzun qe terman otoq che pon q'i'n tuj juntl tnam najchaq k'okel kychmon kyib' juntl maj kyuk'il aj Israel.
4Oktzun tul, kpastoril kyi'j qe xjal etzan tu'n, noq tu'n tipumal ex tajwalil Qman aju Tdios, ex qe xjal che anq'il tuj txub'txaj, porke kjawil nimsa'n Qman tuj tkyaqil twitz tx'otx'.
5Ex tu'n che kyjel ten xjal tuj txub'txaj.
Ok tkub' ti'j qtanmi kyu'n aj Asiria ex ok kyokx kyuj qe nmaq ja te qkolb'il qib', che xel qsama'n wuq nejenel ex wajxaq xjal ma' kyoklen tu'n kyxi' q'ojlel kyi'j.
6Atzun qe jlu che kawil tuj tnam Asiria, aju ttanmi Nimrod, kb'el kyi'j aj Asiria kyu'n tu'n spad, ex qo kletel kyu'n tuj kyq'ab' aj Asiria, aqeju otoq che oktz tuj tmojonil qtx'otx' tu'n kyq'ojin qi'j.
7Qe tiyjil Jacob che kyjel anq'in kyxol nimku nasyon, che okel te jun ky'iwb'il ik tza'n tq'ab' che'w in tzaj t-sama'n Qman, ex ik tza'n jb'al in kub' tib'aj k'ul, mya tu'n jun xjal in tzaj t-sama'n.
8Ex qe tiyjil Jacob che kyjel anq'in kyxol nimku nasyon, che okel ik tza'n jun b'alun kyxol qe txkup te tjaq' k'ul, ex ik tza'n jun b'alun kyxol txqan ẍne'l ok tok noj kyi'j, in xi t'ikpaj kyi'j ex b'i'x in che b'aj ttzaqun ex mi jun in tzoqpaj.
9Kyja'xtzun che okel tzoqpaj aj Israel kyi'j kykyaqil aj q'oj kyi'j ex che najel kyu'n.
10Chi Qman in tma'n kyja': Tuj tq'ijlalil tzul, che najel qe kycheje wu'ne ex b'i'x che b'ajel xitj kycarwaje in che ajb'en tuj q'oj;
11che b'ajel nxitune qe kytanmiye ex qe nmaq ja in che ajb'en te kykolb'il kyib'e;
12wu'ne che b'ajel naj qe aj ky'a' ate' kyxole ex mlay che tentl aj q'ij kyxole;
13kb'ajel nb'uchine qe tilb'ilal in che k'ulune kywitz, kyuk'ix qe ab'j in che ok kydiosine, ex mi'ntltzun che k'ulune kywitz qe dios kyu'nxe e b'ant.
14Che jawitz nb'aqo'ne qe tilb'ilal Asera aju nno'k kydiosine, ex jumajx che b'ajel naj qe kytanmiye wu'ne.
15Tuk'il nim ntx'u'jile k'okel t-xel wu'ne kyi'j qe nasyon minti' xi kyniman nyole, chi Qman.
Who We AreWhat We EelieveWhat We Do
2025 by iamachristian.org,Inc All rights reserved.
