Éxodo 38 - Mam Huehuetenango New Ortography

B'ant altar q'an k'uxb'il Éxodo 27.1-8

1Ax ikx tb'incha Bezaleel aju altar ti'j tze' ch'i'x acacia, jun var kyuk'il kab' xk'achub' twa'l, kab' var kyuk'il kab' xk'achub' tnuqb'il ex kab' var kyuk'il kab' xk'achub' twitz; junx kyaj echb'il te twitz tuk'il tnuqb'il.

2Tb'incha kyaje tkach, jun ti'j teyle junjun tb'utx', ax in che el ti'j altar; ex ok tlo'tzin q'an k'uxb'il ti'j.

3Q'an k'uxb'il kytx'otx'il kykyaqil qe makb'il te altar; qe tkub'il tza'j, qe jokb'il tza'j, qe laq matij, qe jakul twitz chib'j ex qe tkub'il xq'a'l.

4Ti'j q'an k'uxb'il tb'incha jun k'uxb'il xawk'in toy', aju in kyaj tjaq' chojb'il ok tkub' patit. Ku'x tq'o'n k'uxb'il lu tuj tpe'n altar tu'n tkyaj ten ax tuj tmij.

5Ax ikx kub' tb'incha'n kyaje argoy tu'n kyok ten kyi'j tkyajil t-skyin ju q'an k'uxb'il xawk'in toy', tu'ntzun kyokx qeju tze' kyuj.

6Tb'incha qe tze' tolin kyi'j ti'j tze' ch'i'x acacia ex ok tlo'tzin q'an k'uxb'il kyi'j.

7E ex tq'o'n qe tze' lu kyuj qe argoy kyoksa'n ti'j tk'u'j altar tu'n t-xi tanut. Tz'lom altar b'ant tu'n ex katl tuj tk'u'j.

B'ant tkub'il a' q'an k'uxb'il Éxodo 30.18

8Kyi'j respej q'an k'uxb'il kytx'otx'il kye qe xu'j in che ajb'entoq ttzi ja xb'alun te mojb'ab'l tib'il, o tb'incha Bezaleel aju tkub'il a', tuk'ix tq'uqb'il.

B'ant ttxa'n tpe'n tja Dios Éxodo 27.9-19

9Ax ikx tb'incha aju ttxa'n tpe'n ja xb'alun. Tuj jun pak' ttxa'n pe'n lu, tuj tumlal tnayaj q'ij tb'incha xb'alun te maqb'il ti'j tb'anil noq' lino chub'emaj. Aju pak' lu 50 var tnuqb'il.

10Tb'incha winqin tqan ex winqin kyq'uqb'il tqan q'an k'uxb'il kytx'otx'il, ex saq pwaq kytx'otx'il qe ganch ex qe argoy.

11Ax ikx 50 var tnuqb'il pak' ttxa'n pe'n tuj tumlal tb'anq'ab' q'ij, ex tb'incha xb'alun te maqb'il, tuk'ix winqin tqan ex winqin kyq'uqb'il tqan q'an k'uxb'il kytx'otx'il, ex saq pwaq kytx'otx'il qe ganch ex qe argoy.

12Tuj juntl pak' tuj tumlal telex q'ij, tb'incha xb'alun te maqb'il kyuk'ix laj tqan ex laj kyq'uqb'il tqan. Aju pak' lu 25 var tnuqb'il.

13Tuj pak' tuj tumlal tjawitz q'ij tb'incha xb'alun te maqb'il, ax 25 var tnuqb'il.

14Ttxlaj ttzi pe'n jatum in che okx xjal, tb'incha xb'alun te maqb'il te wuq var kyuk'il kab' xk'achub' tnuqb'il, ex ate'k ox tqan ex ox kyq'uqb'il tqan.

15Tuj juntl ttxlaj ttzi pe'n, tb'incha xb'alun te maqb'il te wuq var kyuk'il kab' xk'achub' tnuqb'il, ex ate'k ox tqan ex ox kyq'uqb'il tqan.

16Kykyaqil qe xb'alun toksa'n ti'jele pe'n b'animaj ti'j noq' lino chub'emaj.

17Q'an k'uxb'il kytx'otx'il kyq'uqb'il tqan, ex saq pwaq kytx'otx'il qe argoy ex qe ganch kyuk'ix qe adorn kyjax kyuj kywi' qe tqan. Kykyaqil qe argoy kyok kyi'j qe tqan ate'k ti'jele pe'n, saq pwaq kytx'otx'il.

18Aju xb'alun te maqb'il ttzi pe'n jatum in che okx xjal, chmo'maj ti'j noq' ẍq'ilun ke'yin, ẍjulun ke'yin, kyaq ke'yin ex lino chub'emaj. Aju xb'alun lu, laj var tnuqb'il ex kab' var tuk'il kab' xk'achub' twitz, ex qa aju twa'l, ax ik tza'nx qe xb'alun te maqb'il ti'jele pe'n.

19Kyaje tqan ex kyaje kyq'uqb'il tqan q'an k'uxb'il kytx'otx'il. Sak pwaq kytx'otx'il qe ganch ex qe adorn kyjax tuj kywi' qe tqan, ax ikx qe argoy.

20Q'an k'uxb'il kytx'otx'il kykyaqil qe stak in che ajb'en te tzinb'il xb'alun ti'j ja xb'alun, ex qe stak in che ajb'en kyi'j tqan pe'n.

Tajlal k'uxb'il ajb'en ti'j tja Dios

21Tu'n orden tu'n Moisés, jaw kyi'n aj Leví jun tajlal kyi'j qe k'uxb'il o che ajb'en tu'n tb'ant tja Dios, jatum tu'n tokx ten ju kax k'ub'l tley Dios; ex a Itamar tky'ajal pal Aarón ok te nejenel kye ti'j jlu.

22Ate Bezaleel aju tky'ajal Uri, tal tchman Hur ex tiyjil Judá, tb'incha tkyaqilju otoq tzaj tma'n Qman te Moisés tu'n tb'ant,

23ex o onin Aholiab ti'j, aju tky'ajal Ahisamac ex tiyjil Dan. Ate jlu b'a'n ximan ex mejor b'inchan tkyaqil txkaj aq'untl; b'a'n chmon xb'alun tuk'ix twitz ti'j noq' ẍq'ilun ke'yin, ẍjulin ke'yin, kyaq ke'yin ex lino tb'anilxix.

24Tkyaqil q'an pwaq ajb'en tu'n tb'ant tkyaqil aq'untl ti'j tja Dios, oyaj jlu pon q'i'n, ex japun 21 quintal talil tu'n tkyaqil, ik tza'nx malb'il in ajb'en tuj tja Dios.

25Aju saq pwaq jaw chmet kyxol xjal, japun 75 quintal tuk' 45 libr talil tu'n tkyaqil, ik tza'nx malb'il in ajb'en tuj tja Dios.

26Kykyaqil qeju otoq jaw kyajlal, tzaj qe' kyi'j qeju otoq che japun twi' winqin ab'q'i, o japun 603,550 kyajlal xinaq tu'n tkyaqil; ex teyle junjun kye xi tq'o'n jun tal saq pwaq ch'ixmi mey ons talil ik tza'nx malb'il in ajb'en tuj tja Dios.

27Ax ikx xi ti'n 75 quintal saq pwaq tu'n kyb'ant qe kyq'uqb'il tqan tja Dios ex qe kyq'uqb'il tqan xb'alun te maqb'il. Tkyaqil saq pwaq lu ajb'en tu'n kyb'inchet 100 kyq'uqb'il tqan ja, ex teyle junjun tq'uqb'il xi ti'n 75 libr saq pwaq.

28Ti'j ju 45 libr saq pwaq jaw chmet kyxol kykyaqil xjal, e b'aj tb'incha'n Bezaleel qe ganch, qe argoy ex qe adorn kyjax tuj kywi' qe tqan.

29Aju q'an k'uxb'il xi q'o'n te oyaj, japun 50 quintal tu'n tkyaqil.

30Ti'jtzun q'an k'uxb'il lu, e b'aj b'incha'n qe tq'uqb'il ttzi ja xb'alun te mojb'ab'l tib'il, tuk'ix altar q'an k'uxb'il ttx'otx'il, ex aju k'uxb'il xawk'in toy' tu'n tkyaj ten tjaq' chojb'il ok tkub' patit, ex kykyaqil qe makb'il in che ajb'en ti'j altar,

31kyuk'ix qe kyq'uqb'il tqan ti'jele pe'n, qe kyq'uqb'il tqan ttzi ttxa'n pe'n, kykyaqil qe stak in che ajb'en ti'j ja xb'alun, ex qe stak in che ajb'en kyi'j ttxa'n pe'n.